• ໂຮງຮຽນ ສະຖາພອນ ຈັດແຂ່ງຂັນກີລານັກຮຽນ ຄັ້ງທີ 1

ໂດຍ: ສີເປື້ອນມື 30 ພະຈິກ 2020 (17.28 ນ.) Read : 1,323

ໃນວັນທີ 27 ພະຈິກ 2020 ທີ່ຜ່ານມາ ທາງໂຮງຮຽນ ອະນຸບານ-ປະຖົມ-ມັດຖະຍົມຕອນຕົ້ນ ສະຖາພອນ ໄດ້ຈັດກິດຈະກຳແຂ່ງຂັນກີລາ ແລະການສະແດງສິລະປະຂຶ້ນ ທີ່ເດີ່ນບານ ກູດໄລ (Good life stadium) ນະຄອນຫຼວງວຽງຈັນ ໂດຍການເປັນປະທານຂອງທ່ານ ນາງ ສຸກສະຖາພອນ ສູນທະວົງ ປະທານ ໂຮງຮຽນອະນຸບານ-ປະຖົມ-ມັດຖະຍົມຕອນຕົ້ນ ສະຖາພອນ ແລະໃຫ້ກຽດເຂົ້ິາຮ່ວມ ທ່ານ ຄຳສິງ ດວງດາລາ ຫົວໜ້າຫ້ອງການສຶກສາທິການ ແລະ ກີລາ ເມືອງສີສັດຕະນາກ, ພ້ອມດ້ວຍຄະນະອໍານວຍການ ໂຮງຮຽນ ສະຖາພອນ, ຄະນະຜູ້ບໍລິຫານ, ບັນດາຄູ-ອາຈານ, ພໍ່ແມ່ຜູ້ປົກຄອງ ແລະນ້ອງໆນັກຮຽນເຂົ້າຮ່ວມຢ່າງຫຼວງຫຼາຍ.

ທ່ານ ນາງ ສຸກສະຖາພອນ ສູນທະວົງ ປະທານ ໂຮງຮຽນອະນຸບານ-ປະຖົມ-ມັດຖະຍົມຕອນຕົ້ນ ສະຖາພອນ ໄດ້ກ່າວວ່າ: ຈຸດປະສົງຂອງການຈັດການແຂ່ງຂັນກີລາ ແລະສິລະປະຂອງໂຮງຮຽນ ສະຖາພອນ ໃນຄັ້ງນີ້ ກໍແມ່ນເພື່ອສ້າງຄວາມສາມັກຄີພາຍໃນໂຮງຮຽນ ເວົ້າສະເພາະກໍແມ່ນການສ້າງຄວາມສາມັກຄີ ລະຫວ່າງ ຄູ-ອາຈານ ແລະພໍ່ແມ່ຜູ້ປົກຄອງຂອງນ້ອງໆນັກຮຽນ ແລະນ້ອງໆນັກຮຽນ ໄດ້ເຮັດກິດຈະກໍາຕ່າງໆຮ່ວມກັນ, ເພື່ອໃຫ້ນ້ອງໆນັກຮຽນ ໄດ້ມີເວລາອອກກໍາລັງກາຍຮ່ວມກັບໝູ່ເພື່ອນ, ຮຸ່ນອ້າຍ, ຮຸ່ນນ້ອງ, ຄູອາຈານ ແລະພໍ່ແມ່ຂອງຕົນເອງ ເພື່ອໃຫ້ສຸຂະພາບແຂງແຮງຂຶ້ນ ພ້ອມທັງເຝິກທັກສະໃນການເປັນຜູ້ນຳ, ຮູ້ຈັກການມີນໍ້າໃຈ,​ ການເສຍສະຫຼະ, ເສີມສ້າງທັກສະ ແລະພອນສະຫວັນ ທາງດ້ານກີລາ ແລະສິລະປະ ໃຫ້ແກ່ນ້ອງໆນັກຮຽນ ເຊິ່ງເຮັດໃຫ້ນ້ອງນັກຮຽນສາມາດສະແດງຄວາມສາມາດ ແລະຄວາມກ້າຫານຂອງຕົນອອກສູ່ສາຍຕາມວນຊົນ.

ນອກຈາກນີ້, ການຈັດກິດຈະກຳດັ່ງກ່າວ ແມ່ນເພື່ອເປັນການສະເຫລີມສະຫຼອງວັນສຳຄັນຂອງຂອງຊາດລາວເຮົາ ທີ່ກຳລັງຈະໝູນວຽນມາເຖິງ ນັ້ນກໍຄື ວັນປະກາດເອກະລາດ ກອງປະຊຸດໃຫຍ່ຄັ້ງທີ 7 ຂອງອົງຄະນະພັກນະຄອນຫຼວງວຽງຈັນ ແລະວັນຊາດ ທີ 2 ທັນວາ ຄົບຮອບ 45 ປີ.

      ສຳລັບການກິດຈະກໍາໃນງານດັ່ງກ່າວ ປະກອບມີ ການແຂ່ງຂັນກີລາປະເພດຕ່າງໆ 12 ລາຍການ ໄດ້ແກ່: ຟ້ອນມວຍລາຍລາວ,​ ການສະແດງເຕັ້ນເຊຍ,​ ການສະແດງເຕັ້ນໂຊ, ກີລາແລ່ນຫາຜູ້ປົກຄອງ, ເກັບອຸປະກອນໃສ່ກະຕ່າ, ແລ່ນສົ່ງບານຕໍ່ກັນ, ກີລາດຶງເຊືອກ, ປິດຕາສົ່ງແປ້ງຄືນຫຼັງ, ເຕັ້ນຍາດຕັ່ງ, ຕີກອງ, ຮ້ອງເພງ, ເຕະບານ ແລະອື່ນໆ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ