3 ປີຜ່ານມາວົງການເພງລາວສະໄໝຂອງບ້ານເຮົາຮູ້ສຶກວ່າຫງຽບເຫງົາ ຍ້ອນຜົນກະທົບຈາກຫລາຍໆດ້ານໂດຍສະເພາະແມ່ນຜົນກະທົບຈາກທຶນຮອນທີ່ບໍ່ມີຄົນສະຫນັບສະຫນູນພຽງພໍໃນການສ້າງຜົນງານເພງລາວສະໄໝ ທີ່ຕ້ອງໃຊ້ງົບສູງກວ່າເພງ ລູກທົ່ງບ້ານນາ ຈຶ່ງເປັນສາເຫດຫນຶ່ງເຮັດໃຫ້ເພງລາວສະໄໝຖືກຜະລິດອອກມາສູ່ຕະຫລາດໜ້ອຍ.

ໃນປີ 2020 ວົງການເພງລາວສະໄໝ ຈະຄຶກຄັກຂຶ້ນ ຍ້ອນມີສິລະປິນນ້ອງໃຫມ່ທີ່ເປີດຊ່ອງຍູທູບຂອງຕົນເອງ ແລ້ວປ່ອຍເພງອອກມາຫລາກຫລາຍແນວເພງເຮັດໃຫ້ຜູ້ຟັງມີທາງເລືອກແລະກັບມານິຍົມຟັງເພງລາວສະໄໝອີກຄັ້ງ. ສ່ວນຄ້າຍເພງລາວກະປ່ອຍອອກມາເປັນໄລຍະໄລຍະ ເຊັ່ນດຽວກັບຄ້າຍທີເຄ ທີ່ຢຸດປ່ອຍເພງລາວສະໄໝມາຫລາຍປີ. ໃນປີນີ້ກໍຈະມີເພງແນວນີ້ອອກມາອີກຄັ້ງ ເຊ່ິງເພງທໍາອິດຂອງປີ ແມ່ນ ໂປເຈັກຮ່ວມມືກັບຄ້າຍເພງ ລາວລ້ານຊ້າງ ກັບຜົນງານຄຸນນະພາບ ທີ່ມີຊື່ວ່າ: ຢາກລົບຄວາມຊົງຈຳ ເຊິ່ງຮ້ອງ ໂດຍ: TANE ຜິວພອນ ພົມມີໄຊ ເນື້ອຮ້ອງ ແລະ ທຳນອງ ກໍແມ່ນ ຜິວພອນ ພົມມີໄຊ ເຊິ່ງໄດ້ປ່ອຍອອກອາກາດທາງວິທະຍຸ ໂທລະພາບ ແລະ ໂຊຊຽວມີເດຍ ແລ້ວໃນວັນທີ່ 3 ກຸມພາ 2020 ເຊິ່ງເປັນວັນຄ້າຍວັນເກີດຂອງນັກຮ້ອງເອງ ໃນຮູບແບບມິວຊິກວີດີໂອເລີຍ.

    ສໍາຫລັບມິວຊິກວີດີໂອເພງນີ້ ກໍແມ່ນການຜະລິດຂອງ ທີມງານ ທີເຄ ການບັນເທີງ ເຊິ່ງໄດ້ຮັບການສະຫນັບສະຫນູນໂດຍ: ເຂົ້າຈີ້ແຊບບ້ານພ້າວ ແລະ ທະນາຄານຮ່ວມພັດທະນາ ເຊິ່ງຂຽນບົດ ແລະ ກຳກັບໂດຍ: ທະວີສັກ ທຳມະວົງສາ ຜູ້ກຳກັບຮູບເງົາ ຂ້ອຍຮັກເຈົ້າ ແລະ ຄວາມຮັກຫລຸຍໃບຕອງ ເປັນເລື່ອງລາວຂອງຊາຍຄົນຫນຶ່ງທີ່ຫລາຍໃຈ ມີຄອບຄົວຢູ່ແລ້ວ ແຕ່ກໍຍັງມີສາວຄົນໃຫມ່ເຂົ້າມາ ເຮັດໃຫ້ຊິວິດຄອບຄົວພັງທະລາຍ ຫລັງຈາກນັ້ນ ຊາຍຄົນນັ້ນໄດ້ເກີດອຸບັດຕິເຫດຈົນຂາຍ່າງບໍ່ໄດ້ເປັນປົກກະຕິ ແລະ ມີຖານະຢາກຈົນ ສາວໃຫມ່ຈີ່່ງຫນີ້ຈາກ ຍັງເຫລືອແຕ່ພຽງພັນລະຍາເກົ່າທີ່ມາຄ່ອຍເປັນກຳລັງໃຈ ສຸດທ້າຍເມື່ອຊາຍຄົນນັ້ນຄິດໄດ້ຈິ່ງຢາກກັບໄປຫາຄືນ ແຕ່ກໍສາຍເກີນໄປເພາະພັນລະຍາເກົ່າມີຄົນຮັກໃຫມ່ແລ້ວ

ນອກນັ້ນ ອາຈານແຕນ ຍັງມີເພງເປັນຂອງຕົນເອງຫລາຍເພງເຊັ່ນ ຮັກເຈົ້າເທົ່ານັ້ນ, ຂ້ອຍເຈັບຄົນດຽວ, ຢ່າພົບກັນເລີຍ, ຈັງໃດລະອີຫລ້າຄຳແພງ......ຈົນມາຮອດຜົນງານຫລ້າສຸດກັບເພງ:ຢາກລົບຄວາມຊົງຈຳ