• ເມືອງ​ຈອມເພັດ​ຈັດ​ຕັ້ງ​ການ​ສອບເສັງ​ຈົບ​ຊັ້ນ​ ປ5 ທົ່ວເມືອງ​ ສົກ​ປີ​ 2020​-2021

ໂດຍ: ສີເປື້ອນມື 01 ກໍລະກົດ 2021 (10.22 ນ.) Read : 5,699

ວັນທີ​ 29​ ມິຖຸນາ​ 2021​ ທີ່ຜ່ານມາ,​ ຢູ່ທີ່​ໂຮງຮຽນ​ປະຖົມ​ສົມບູນ​ບ້ານ​ ຊຽງແມນ​ ເມືອງ​ຈອມເພັດ, ໄດ້​ຈັດ​ພິທີ​ເປີດ​ການ​ສອບ​ເສັງ​ຈົບ​ຊັ້ນ​ປະຖົມ​ສຶກສາ​ປີ​ທີ​ 5 ທົ່ວ​ເມືອງ​ ສົກປີ 2020​ ​- 2021​ ຂື້ນຢ່າງເປັນ ທາງການ,​ ໂດຍ​ການ​ເປັນ​ປະທານ​ຂອງ​ ທ່ານ​ ສົມ​ສັກ​ ສີ​ລິ​ວົງ​ ຮອງ​ເຈົ້າ​ເມືອງ​ຈອມ​ເພັດ​ ໃຫ້​ກຽດ​ເຂົ້າ​ຮ່ວມ​ ຂອງທ່ານ​ ນາງ​ ບົວທອງ​ ຕັນແສນສີ ຮອງ​ຫົວໜ້າ​ພະແນກ​ສຶກສາ​ ທິການ​ ແລະ​ ກິລາ​ ແຂວງ​ຫຼວງ​ພະ​ບາງ,​ ມີບັນດາ​ທ່ານ​ຄະນະ​ຫ້ອງການ​ສຶກສາ,​ ຄະນະ​ພັດທະນາ​ການ​ສຶກສາ​ຂັ້ນ​ບ້ານ,​ ຄະນະ​ກຳມະການ​ເຝົ້າ​ຫ້ອງ​ສອບເສັງ​ ແລະ​ ການຈັດຕັ້ງບ້ານ​ ຕະຫຼອດ​ຮອດ​ ນ້ອງ​ນັກຮຽນ​ເຂົ້າ​ຮ່ວມ.​
ໃນ​ພິທີ​ ໄດ້​ຜ່ານ​ຂໍ້ຕົກລົງ​ ຂອງ​ທ່ານ​ເຈົ້າ​ເມືອງ​ ຈອມເພັດ​ ສະບັບ​ເລກທີ​ 115/ຈມຈພ, ລົງ​ວັນທີ​ 27 ເມສາ​ 2021​ ວ່າດ້ວຍການ​ແຕ່ງ​ຕັ້ງ​ຄະນະ​ຮັບຜິດຊອບ​ຊີ້ນຳ​ລວມ​ ໃນການ​ຈັດຕັ້ງ​ການ​ສອບເສັງ​ຈົບ​ຊັ້ນ​ປະຖົມ​ປີທີ​ 5​ ປະ​ຈຳ​ສົກ​ຮຽນ​ 2020​ - 2021, ຜ່ານ​ຂໍ້ຕົກລົງ​ຂອງ​ ທ່ານຫົວໜ້າ​ຫ້ອງ​ການ​ສຶກສາ​ທິການ​ແລະ​ກິລາ​ ເມືອງ​ຈອມເພັດ​ ວ່າ​ດ້ວຍ​ການ​ແຕ່ງ​ຕັ້ງ​ຄະນະ​ຮັບຜິດຊອບ​ ແຕ່ລະ​ໜ້າ​ວຽກ​ ຕາມແຕ່ລະຈຸດສອບເສັງ,​ ແລະ​ ຮັບຟັງ​ການ​ລາຍງານ​ໂດຍ​ຫຍໍ້​ກ່ຽວກັບ​ການ​ກະກຽມ​ຄວາມ​ພ້ອມ​ໃນ​ການ​ຈັດຕັ້ງ​ປະຕິບັດ​ການ​ສອບເສັງ​ຈົບ​ຊັ້ນ​ປະຖົມ​ສຶກສາ​ປີ​ທີ​ ​5​ ສົກ​ຮຽນ​ 2020​ -​ 2021, ໂດຍ​ໄດ້ປະ​ຕິ​ບັດ​ ແລະ​ຈັດຕັ້ງ​ການ​ຮຽນ​-ການ​ສອນ​ ຕາມ​ຫຼັກ​ສູດ​ສາຍ​ສາມັນ​ສຶກສາ​ຊັ້ນ​ປະຖົມ​ປີ​ທີ​5.​
ໃນ​ສົກ​ປີ​ 2020​-2021​ ນີ້, ມີນັກ ສອບເສັງເຂົ້າຮ່ວມ​ທັງໝົດ​: 644 ນ້ອງ, ຍິງ​ 275 ນ້ອງ,​ ໄດ້​ແບ່ງ​ອອກ​ເປັນ​ 14​ ສູນສອບເສັງ​ ແລະ​ ມີຫ້ອງສອບເສັງທັງໜົດ 36​ ຫ້ອງ,​ ວິຊາທີ່ນໍາມາສອບເສັງລວມມີ 4 ວິຊາຄື: ພາສາລາວ,​ ພາກຂຽນທວາຍ,​ ໂລກອ້ອມຕົວ ແລະວິຊາຄະນິດສາດ.​
ຈາກນັ້ນ,​ ໃນພິທີ ທ່ານ ສົມ​ສັກ ສີລິ​ວົງ​ ຮອງ​ເຈົ້າ​ເມືອງ​ຈອມ​ເພັດ​ ໄດ້​ມີ​ຄຳ​ເຫັນ​ໃນ​ໂອກາດ​ທີ່​ມີ​ຄວາມ​ໜາ​ຍ​ຄວາມ​ສໍາ​ຄັນ​ນີ້ວ່າ: ການ​ສອບເສັງ​ຈົບ​ຊັ້ນ​ປະຖົມ​ປີ​ທີ​5​ ໃນ​ຄັ້ງ​ນີ້​ ແມ່ນ​ມີ​ຄວາມ​ສໍາ​ຄັນ​ຫຼາຍ​ ຊຶ່ງ​ມັນ​ສະແດງ​ໃຫ້​ເຫັນ​ເຖິງຕົວຊີ້ວັດ,​ ສະແດງ​ໃຫ້​ເຫັນ​ຄຸນນະພາບ​ຂອງ​ການ​ຮຽນ​-ການ​ສອນ, ສອນດີ- ສອນ​ເດັ່ນ​ ຂອງ​ຄູ​ອາ​ຈານ​ ແລະ​ ສະແດງ​ໃຫ້​ເຫັນ​ຄວາມ​ບຸກ​ບືນ​ ຄວາມ​ເອົາ​ໃຈ​ໃສ່​ໃນການ​ຄົ້ນຄວ້າ​ຮ່ຳຮຽນ​ ຂອງ​ນ້ອງ​ນັກຮຽນ​; ພ້ອມ​ກັນ​ນັ້ນ,​ ທ່ານ​ຍັງ​ໄດ້​ຮຽກ​ຮ້ອງ​ມາ​ຍັງ​ຄະນະ​ກຳມະການ​ຮັບຜິດຊອບ​ຊີ້ນຳ​ລວມ,​ ຄະນະ​ກຳມະການເຝົ້າຫ້ອງສອບເສັງ​ ໃນແຕ່ລະຈຸດ ຈົ່ງເພີ່ມຄວາມ ຮັບ​ຜິດ​ຊອບ​ຕໍ່​ໜ້າທີ່​ຂອງຕົນ​ທີ່​ໄດ້ຮັບ​ການ​ມອບໝາຍ,​ ມີຄວາມ​ສັດຊື່​ບໍລິສຸດ​ຕໍ່ນັກ ສອບເສັງ​ ພ້ອມທັງປະຕິບັດກົດລະບຽບຂອງການສອບເສັງ​ ໃຫ້ເຂັ້ມງວດ ພ້ອມ​ກັນ​ຈັດ​ຕັ້ງ​ປະຕິບັດ​ ແລະ​ຄວບຄຸມ​ການ​ສອບເສັງ​ໃນ​ຄັ້ງ​ນີ້​ ໃຫ້​ບັນ​ລຸ ຕາມ​ຈຸດປະສົງ​ຄາດໝາຍ​ທີ່ວາງໄວ້,​ ການສອບເສັງໃນຄັ້ງນີ້ ໄດ້ດໍາເນີນເປັນເວລາ 2 ວັນ​ ຈຶ່ງສໍາເລັດ.

ທີ່ມາ: Media Laos
  • ຮູບພາບ

  • ແທັກທີ່ກ່ຽວຂ້ອງ