• ວາງສະແດງສິນຄ້າໂອດ໊ອບ ເພື່ອກະຕຸ້ນເສດຖະກິດ ຍຸກໂຄວິດ-19

ໂດຍ: ສີເປື້ອນມື 02 ເມສາ 2021 (16.22 ນ.) Read : 5,165

ໃນວັນທີ 1 ເມສາ 2021 ຜ່ານມາ ທີ່ສູນການຄ້າພາກຊັນ ໄດ້ມີງານຕະຫລາດນັດໂອດ໊ອບສັນຈອນ ຫລື ODOP Lao Canival ເພື່ອເພີ່ມຊ່ອງທາງໂຄສະນາ ແລະ ຈໍາໜ່າຍສິນຄ້າກະຕຸ້ນເສດຖະກິດ ໂດຍການເຂົ້າຮ່ວມຂອງ ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກຳ ແລະ ການຄ້າ, ມີຫົວໜ້າກົມ, ຕາງໜ້າສະຖານທູດ, ຫົວໜ່ວຍທຸລະກິດເຂົ້າຮ່ວມ. ພາຍໃນງານ ມີຜູ້ປະກອບການສິນຄ້າໂອດ໊ອບ, ຄອບຄົວຕົວແບບຫລາຍກວ່າ 140 ຫົວໜ່ວຍ, ນໍາສິນຄ້າໂອດ໊ອບ, ສິນຄ້າຄອບຄົວຕົວແບບເຂົ້າວາງສະແດງ, ງານດັ່ງກ່າວຈະດຳເນີນໄປຈົນເຖິງວັນທີ 4 ເມສາ 2021 ທີ່ສູນການຄ້າພາກຊັນ ນະຄອນຫລວງວຽງຈັນ (ໜອງຈັນຕອນເໜືອ).
ໃນໂອກາດດັ່ງກ່າວ, ທ່ານ ຄໍາພະມິດ ໄຊຍະສົມບັດ ທີ່ປຶກສາບໍລິສັດໄປໃສ ກ່າວວ່າ: ງານດັ່ງ ກ່າວ, ເປັນການຊ່ວຍຜູ້ປະກອບການຂອງລາວ ໂດຍສະເພາະຫົວໜ່ວຍທຸລະກິດຂະໜາດນ້ອຍ ແລະ ກາງ ໄດ້ສາມາດຜ່ານຜ່າວິກິດການແຜ່ລະບາດຂອງພະຍາດໂຄ ວິດ-19 ຫລື ອີກດ້ານໜຶ່ງ ກໍແມ່ນການຫັນວິກິດເປັນໂອກາດ ໃນການປັບປຸງທຸລະກິດຕົນເອງ ຂອງຜູ້ປະກອບການໃຫ້ມີຄວາມເຂັ້ມແຂງ ໃນໄລ ຍະນີ້, ເນື່ອງຈາກການເຄື່ອນຍ້າຍສິນຄ້າ ຫລື ການນໍາເຂົ້າສິນຄ້າຕ່າງໆມີຄວາມຫຍຸ້ງຍາກ ຕົ້ນທຶນຂົນສົ່ງເພີ່ມຂຶ້ນ ແລະ ອື່ນໆ. ໂອກາດນີ້, ຫົວໜ່ວຍທຸລະກິດຂະໜາດນ້ອຍ ແລະ ກາງຂອງລາວ ຄວນຫັນມາປັບຕົວ ເພື່ອຍາດເອົາລູກຄ້າ ຫລື ຕີຕະຫລາດພາຍໃນຂອງເຮົາໃຫ້ໄດ້. ດ້ວຍເຫດຜົນນັ້ນ ວິສາຫະກິດສ່ວນບຸກຄົນ ວາລະສານໄປໃສ ຈຶ່ງຮ່ວມກັບກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ຈັດງານຕະຫລາດນັດສັນຈອນໂອດ໊ອບ ຫລື ODOP Lao Carnival ຂຶ້ນ ໃນຂອບເຂດທົ່ວປະເທດ ເພື່ອເປັນເວທີໃຫ້ຜູ້ປະກອບການໄດ້ປຶກສາຫາລືກັນ ແລະ ກັນ ໃນການປັບປຸງສິນຄ້າຂອງຕົນໃຫ້ສາມາດແຂ່ງຂັນ ແລະ ຊື້ຂາຍໃນທ້ອງຕະຫລາດ ແລະ ກ້າວໄປເຖິງການສົ່ງອອກໄປຕ່າງປະເທດ.
ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ກ່າວວ່າ: ງານດັ່ງກ່າວ, ເນັ້ນສ້າງຜູ້ປະກອບການລາວໃຫ້ມີຄວາມເຂັ້ມແຂງ ສາມາດພົ້ນຜ່ານວິກິດໂຄວິດ-19, ຂະນະດຽວກັນ ພວກເຮົາສົ່ງເສີມໃຫ້ສິນຄ້າລາວ ສາມາດພັດທະນາປັບປຸງມາດຕະຖານການຜະລິດສິນຄ້າລາວໃຫ້ມີຄຸນນະພາບສູງຂຶ້ນ. ມາຮອດປັດຈຸບັນ ໄດ້ອອກອະນຸຍາດຢັ້ງຢືນໂອດ໊ອບ ໃນທົ່ວປະເທດ ໄດ້ 242 ຫົວໜ່ວຍ, 876 ສິນຄ້າ, ໃນ 235 ບ້ານ 103 ເມືອງ ໃນທົ່ວປະເທດ, ໃນນັ້ນໝວດສິນຄ້າຫັດຖະກໍາກວມ 56% ມີ 136 ຫົວໜ່ວຍ, ໝວດອາຫານ ແລະ ເຄື່ອງດື່ມ 33% ມີ 95 ຫົວໜ່ວຍ ແລະ ສະໝຸນໄພຮັກສາສຸຂະພາບ 5% ມີ 11 ຫົວໜ່ວຍ.
ພາຍໃນງານແບ່ງເປັນ 3 ເຂດ ຄື: ເຂດສະແດງສິນຄ້າໂອດ໊ອບ, ເຂດສິນຄ້າຄອບຄົວຕົວແບບ ແລະ ສິນຄ້າທ່າແຮງ ຈໍານວນ 50 ຫ້ອງ, ເຂດວາງສະແດງສິນຄ້າກ່ຽວກັບການສຶກສາ ແລະ ເຄື່ອງນຸ່ງຫົ່ມ ຈໍານວນ 42 ຫ້ອງ, ເຂດອາຫານ, ເຄື່ອງດື່ມ ແລະ ພືດຜັກ 55 ຫ້ອງ ຈະມີການແຂ່ງຂັນຈັດກະຕ່າອວຍພອນສິນຄ້າໂອດ໊ອບ ແລະ ສິນຄ້າລາວ, ເວທີສົນທະນາ ລິເລີ່ມທຸລະກິດ Startup ແລະ ທຸລະກິດຊຸມຊົນ, ເວທີສົນທະນາເຂົ້າຫາແຫລ່ງທຶນດອກເບ້ຍຕໍ່າ SME, ກິດຈະກໍາຊີມອາຫານ ແລະ ກິດຈະກໍາຂອງນ້ອງນັກສຶກສາ ແລະ ສິລະປະການສະແດງອື່ນໆ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ