• ເບຍຫວານ ອາຫານແຊບ ລາຄາສະບາຍກະເປົ໋າ ທີ່ BANMOU café

ໂດຍ: ດວງຕາວັນ 11 ມິຖຸນາ 2018 (16.42 ນ.) Read : 332

ຊວນຊິມສະບາຍດີ! ຄໍລຳນີ້ຈະນຳພາທ່ານຜູ້ອ່ານໄປຮູ້ຈັກກັບຮ້ານອາຫານໜ້າສົນໃຈຫຼາກຫຼາຍຮູບແບບ ທີ່ພວກເຮົາໄດ້ເລືອກເຟັ້ນນຳມາສະເໜີ ເພື່ອເປັນແນວທາງສຳລັບຄົນມັກຊິມມັກຊິວ ໂດຍເລີ່ມຕົ້ນປີກັບຮ້ານນີ້ເລີຍ!
BANMOU café ຮ້ານອາຫານບັນຍາກາດອົບອຸ່ນ ເກີດຈາກຄອບຄົວທີ່ມີພື້ນຖານການເຮັດກະສິກຳປະສົມປະສານ ເຊັ່ນ ລ້ຽງກຸ້ງກ້າມແດງ, ປູກຜັກໄຮໂດຣໂປນິກ ບວກກັບມີຄວາມມັກຮັກໃນການແຕ່ງອາຫານໃຫ້ໝູ່ເພື່ອນທີ່ມາຢ້ຽມຢາມໃນວັນເສົາວັນອາທິດ ຫຼືວັນພັກຜ່ອນໄດ້ຮັບປະທານ ເມື່ອມີເງື່ອນໄຂອຳນວຍຄວາມສະດວກດັ່ງກ່າວ ເພິ່ນກໍເລີຍຕັດສິນໃຈເປີດຮ້ານພາຍໃຕ້ຊື່ ບ້ານໝູ່ຄາເຟ ໝາຍເຖິງແຫຼ່ງພົບປະສັງສັນລະຫວ່າງໝູ່ເພື່ອນ ທີ່ສາມາດມານັ່ງຮັບປະທານອາຫານ, ໂອ້ລົມສົນທະນາກັນແບບເປັນກັນເອງ ຕາມຄອນເຊັບທີ່ວ່າ ເບຍຫວານ ອາຫານແຊບ ລາຄາສະບາຍກະເປົ໋າ.
ສະເໜ່ອີກຢ່າງໜຶ່ງຂອງຮ້ານ ຄືການຕົບແຕ່ງທີ່ມີສະຕາຍເປັນຂອງຕົວເອງ, ການປະດິດປະດອຍເຄື່ອງເກົ່າຂອງແກ່ ໃຫ້ກາຍເປັນເຟີນີເຈິີ ແລະຂອງຕົບແຕ່ງໄດ້ຢ່າງ classic ສະທ້ອນໃຫ້ເຫັນເຖິງໄອເດຍສ້າງສັນ ແລະຄວາມເອົາໃຈໃສ່ທຸກລາຍລະອຽດຂອງເຈົ້າຂອງຮ້ານ.
ນອກຈາກການຕົບແຕ່ງ ອາຫານຢູ່ທີ່ນີ້ກໍມີຄວາມໂດດເດັ່ນໃນເລື່ອງຣົດຊາດ ເນື່ອງຈາກປຸງແຕ່ງດ້ວຍວັດຖຸດິບທີ່ມີຄຸນນະພາບ ແລະສົດໃໝ່ສະເໝີ ເຊັ່ນ ຜັກບາງຊະນິດທີ່ນຳມາປະກອບອາຫານແມ່ນທາງຮ້ານປູກເອງ ແລະນຳມາຈາກສວນແບບມື້ຕໍ່ມື້ ສ່ວນຈຳພວກຊີ້ນງົວ-ຊີ້ນແກະກໍເປັນຂອງນຳເຂົ້າທີ່ໄດ້ຮັບການເລືອກເຟັ້ນຢ່າງພິຖີພິຖັນ. ເມນູຍອດນິຍົມຂອງທາງຮ້ານໄດ້ແກ່ສະຫຼັດປະເພດຕ່າງໆ, ຈຳພວກສະເຕັກ ເຊັ່ນ ສະເຕັກແກະ, ສະເຕັກງົວ, ສະເຕັກເອິກໄກ່; ປີ້ງເສືອຮ້ອງໄຫ້, ປີ້ງສັນຄໍໝູ; ສ່ວນເມນູທີ່ສາວໆມັກເປັນພິເສດໄດ້ແກ່ປະເພດຕຳ ຮັບປະທານຄູ່ກັບຕົ້ມຍຳ ເຊັ່ນ ຕົ້ມຍຳກະດູກອ່ອນ, ຕົ້ມຍຳຕີນໄກ່ ແຖມໃຫ້ອີກໜຶ່ງເມນູທີ່ຊິມແລ້ວຕ້ອງສັ່ງເພີ່ມກັບເຮືອນນັ້ນກໍຄືປາຊາບະປີ້ງສະອິ້ວ. ເວົ້າງ່າຍກໍຄືທາງຮ້ານເມນູຫຼາກຫຼາຍປະເພດ ເປັນອາຫານກໍໄດ້ ເປັນຂອງແກ້ມກໍດີ ທີ່ສຳຄັນຄືລາຄາບໍ່ແພງແນ່ນອນ.
BANMOU café ຍິນດີຕ້ອນຮັບລູກຄ້າທຸກປະເພດ ບໍ່ວ່າຈະເປັນນັກສຶກສາ, ຄອບຄົວ, ພະນັກງານໝູ່ຄະນະ ດ້ວຍການບໍລິການທີ່ອົບອຸ່ນເປັນກັນເອງ. ພ້ອມດຽວກັນ,ທາງຮ້ານກໍຍັງຮັບຈັດງານລ້ຽງ, ງານວັນເກີດຕາມຄອນເຊັບທີ່ລູກຄ້າຕ້ອງການ ໂດຍມີສ່ວນຫຼຸດໃຫ້ພິເສດ ຫຼຶໃຜຢາກໄດ້ກະຕ່າຜັກສົດເພື່ອນຳໄປມອບເປັນຂອງຂວັນໃຫ້ແກ່ຄົນສຳຄັນກໍມາປຶກສາທາງຮ້ານເພິ່ນໄດ້ ເພິ່ນຍິນດີຮັບຈັດໃຫ້ຕາມໃຈລູກຄ້າ.

ທີ່ມາ:

  • ຮູບພາບ

  • ແທັກທີ່ກ່ຽວຂ້ອງ