• ນ້ຳຕົກຕາດຊາຍ ຄວາມມະຫັດສະຈັນທີ່ຄວນໄປສຳຜັດ

ໂດຍ: ດວງຕາວັນ 11 ມິຖຸນາ 2018 (16.24 ນ.) Read : 290


ຫຼາຍສະບັບທີ່ຜ່ານມາຜູ້ຂຽນໄດ້ພາທ່ານຜູ້ອ່ານໄປຮູ້ຈັກກັບແຫຼ່ງທ່ອງທ່ຽວທາງພາກເໜືອມາແລ້ວຫຼາຍແຫ່ງ ແຕ່ສະບັບນີ້ຜູ້ຂຽນຈະພາບັນດາທ່ານລົງມາພາກກາງເພື່ອນ້ຳຕົກທີ່ມີຄວາມງາມຈົນໜ້າອັດສະຈັນໃຈ ແລະເຊື່ອວ່າຫຼາຍທ່ານຍັງບໍ່ເຄີຍໄດ້ໄປສຳຜັດນັ້ນກໍຄື: “ນໍ້າຕົກຕາດຊາຍ”.

ນ້ຳຕົກຕາດຊາຍຕັ້ງຢູ່ເຂດປ່າສະຫງວນແຫ່ງຊາດພູເຂົາຄວາຍ, ບ້ານຫາດໄຄ້, ເມືອງທ່າພະບາດ, ແຂວງບໍລິຄຳໄຊ ຫ່າງຈາກເທດສະບານເມືອງທ່າພະບາດ 19 ກິໂລແມັດ, ເຊິ່ງໄດ້ເລີ່ມເປີດເປັນແຫຼ່ງທ່ອງທ່ຽວຕັ້ງແຕ່ປີ 2004 ເປັນຕົ້ນມາແຕ່ກໍຍັງຮັກສາຄວາມເປັນທຳມະຊາດທີ່ອຸດົມສົມບູນໄວ້ໄດ້ໂດຍບໍ່ມີການດັດແປງແຕ່ຢ່າງໃດ. ເນື່ອງຈາກວ່າເປັນນ້ຳຕົກຕາດທີ່ຕັ້ງຢູ່ບໍລິເວນປ່າສະຫງວນແຫ່ງຊາດ,

ອ້ອມຮອບໄປດ້ວຍປ່າໄມ້ນາໆພັນຈຶ່ງເຮັດໃຫ້ມີຄວາມຊຸ່ມເຢັນພ້ອມທັງມີນ້ຳໄຫຼຕະຫຼອດປີແບບບໍ່ເຫືອດແຫ້ງ, ສິ່ງດັ່ງກ່າວຖືໄດ້ວ່າເປັນຄວາມມະຫັດສະຈັນທາງທຳມະຊາດອີກຢ່າງໜຶ່ງທີ່ດຶງດູດນັກທ່ອງທ່ຽວທັງພາຍໃນ ແລະຕ່າງປະເທດໃຫ້ໄປທ່ຽວຊົມ. ນອກຈາກນີ້, ຍັງເປັນນ້ຳຕົກຕາດທີ່ມີຫຼາຍຊັ້ນໃນລະດູຝົນນ້ຳຈະຫຼາຍ ແລະງາມເປັນພິເສດ, ເຊິ່ງນັກທ່ອງທ່ຽວສາມາດຊົມນ້ຳຕົກໄດ້ສອງຈຸດຄື: ຈຸດທີ່ເປັນນ້ຳຕົກໄຫຼລົງມາຕາມພະລານຫີນທີ່ຄ້າຍຄືກັບຂັ້ນໄດໄຫຼລົງສູ່ວັງນ້ຳທີ່ມີຄວາມເຢັນ, ໃສ ເຊິ່ງນັກທ່ອງທ່ຽວສາມາດລົງຫຼິ້ນນ້ຳໄດ້ ແລະອີກຈຸດໜຶ່ງນັກທ່ອງທ່ຽວສາມາດເບິ່ງເຫັນສາຍນ້ຳຕົກຕາດຊາຍທີ່ຕົກລົງມາຈາກຜາຫີນສູງທີ່ມີຄວາມງາມບໍ່ໜ້ອຍໄປກວ່າຈຸດທຳອິດເຊິ່ງເປັນຈຸດທີ່ນັກທ່ອງທ່ຽວ, ຊ່າງພາບຫຼາຍທ່ານມັກໃຊ້ເປັນບ່ອນຖ່າຍຮູບ.
ເພື່ອຄວາມສະດວກ ນັກທ່ອງທ່ຽວສາມາດນັ່ງກິນເຂົ້າຕາມພະລານຫີນທີ່ຢູ່ແຄມນ້ຳເພື່ອສຳຜັດກັບບັນຍາກາດ ແລະອາຍນ້ຳທີ່ເຢັນສະບາຍໄດ້ ແຕ່ຕ້ອງຢູ່ພາຍໃຕ້ກົດລະບຽບຂອງແຫຼ່ງທ່ອງທ່ຽວ ຫຼືຈະນັ່ງພັກຜ່ອນເທິງສາລາທີ່ເປັນທັງຈຸດຊົມນ້ຳຕົກ ແລະພັກຜ່ອນ, ພ້ອມທັງມີຮ້ານອາຫານໄວ້ໃຫ້ບໍລິການກັບນັກທ່ອງທ່ຽວນຳອີກ,

ນອກຈາກນີ້ ຍັງມີຫ້ອງພັກສຳລັບນັກທ່ອງທ່ຽວທີ່ຢາກສຳຜັດກັບທຳມະຊາດແບບເຕັມອິ່ມໃນການນອນແຮມຄືນທ່າມກາງປ່າໄມ້ ແລະສາຍນ້ຳ.
ຖ້າຫາກນັກທ່ອງທ່ຽວທ່ານໃດກຳລັງຊອກຫາສະຖານທີ່ພັກຜ່ອນທ່າມກາງທຳມະຊາດ,

ອາກາດບໍລິສຸດທີ່ຢູ່ບໍ່ໄກຈາກເມືອງໃຫຍ່ກໍຢ່າລືມໄປພັກຜ່ອນຢູ່ທີ່ນ້ຳຕົກຕາດຊາຍແຫ່ງນີ້, ເຊິ່ງເໝາະສຳລັບນັກທ່ອງທ່ຽວທຸກເພດ, ທຸກໄວສາມາດໄປທ່ຽວໄດ້ທຸກລະດູ, ສຳລັບການເດີນທາງໄປ-ມາກໍສະດວກສະບາຍທັງລົດໂດຍສານ ຫຼືລົດສ່ວນຕົວກໍສາມາດເດີນທາງໄປໄດ້. ໃນນາມສ່ວນຕົວຜູ້ຂຽນເອງຂໍແນະນຳໃຫ້ບັນດາທ່ານໄປທ່ຽວຊົມໃນລະດູຝົນ

ເພາະທ່ານຈະໄດ້ເຫັນນ້ຳຕົກຕາດທີ່ສວຍງາມແບບພິເສດບໍ່ດ້ອຍໄປກວ່ານ້ຳຕົກຕາດແຫ່ງອື່ນໆແນ່ນອນ, “ຢ່າລືມວ່າປະເທດລາວກໍມີສະຖານທີ່ໃຫ້ທ່ຽວຊົມຢ່າງຫຼວງຫຼາຍພຽງແຕ່ເຮົາຍັງບໍ່ໄດ້ໄປສຳຜັດເທົ່ານັ້ນເອງ”.



ທີ່ມາ: ກິນທີ່ນີ້, ທ່ຽວທີ່ນີ້

  • ແທັກທີ່ກ່ຽວຂ້ອງ