• LAO TOP 3 EXPO 2019 ຍິ່ງໃຫຍ່ທີ່ສຸດໃນລາວ

ໂດຍ: ສີເປື້ອນມື 12 ມິຖຸນາ 2019 (17.24 ນ.) Read : 292

ໃນວັນທີ 12 ມິຖຸນາ 2019 ໄດ້ມີການຈັດງານຖະແຫຼງຂ່າວຈັດງານ LAO TOP 3 EXPO 2019 ຢູ່ທີ່ຫ້ອງປະຊຸມຂອງໂຮງແຮມ ຈັນທະປັນຍາ. ງານດັ່ງກ່າວເປັນການຮ່ວມມືກັນລະຫວ່າງ ສະພາການຄ້າ ແລະ ອຸດສາຫະກໍາແຫ່ງຊາດລາວ, ສະມາຄົມ ສະຖາປານິກ ແລະ ວິສະວະກອນກໍ່ສ້າງລາວ ແລະກຸ່ມບໍລິສັດ ເອເອັມບີ ທາສັສ ອີເວັ້ນ.

ງານ LAO TOP 3 EXPO 2019 ຈະຈັດຂຶ້ນໃນວັນທີ 20-22 ມິຖຸນາ 2019 ທີ່ຫໍປະຊຸມແຫ່ງຊາດ ຫຼັກ 6 ເປັນງານວາງສະແດງ 3 ງານມາຮວມໃນງານດຽວກັນ ປະກອບດ້ວຍ: LAOBUILD 2019 ງານວາງສະແດງລະດັບສາກົນທາງດ້ານອຸດສາຫະກໍາອາຄານ ແລະການກໍ່ສ້າງທີ່ໃຫຍ່ທີ່ສຸດຂອງລາວ,​ LAOFOOD 2019 ງານວາງສະແດງລະດັບສາກົນທາງດ້ານອາຫານ ແລະເຄື່ອງດື່ມທີ່ໃຫຍ່ທີ່ສຸດຂອງລາວ ແລະLAOWATER 2019 ງານວາງສະແດງລະດັບສາກົນກ່ຽວກັບນໍ້າ ແລະເຕັກໂນໂລຊີບໍາບັດນໍ້າເສຍ ອັນດັບ 1 ຂອງລາວ. ງານວາງສະແດງນີ້ ຍັງປະກອບດ້ວຍ LAOENERGY ງານວາງສະແດງສິນຄ້າລະດັບສາກົນດ້ານພະລັງງານ ແລະອຸດສາຫະກໍາໄຟຟ້າອັນດັບ 1 ຂອງລາວ ແລະ LIVAR ງານວາງສະແດງລະດັບສາກົນກ່ຽວກັບການລະບາຍອາກາດ, ເຄື່ອງປັບອາກາດ ແລະເຄື່ອງເຮັດຄວາມເຢັນ.

ງານດັ່ງກ່າວຈະນໍາເອົາຫຼາຍກວ່າ 200 ບໍລິສັດ ຈາກພາຍໃນ ແລະຕ່າງປະເທດ ໃນນີ້ບໍລິສັດໃນລາວ ກວມ 30% ເຊັ່ນ: ຈີນ, ເຢຍລະມັນ, ອີຕາລີ, ຍີ່ປຸ່ນ, ເກົາຫຼີ, ມາເລເຊຍ, ສິງກະໂປ, ໄທ ແລະສະຫະລັດອາເມລິກາ. ນອກນັ້ນ, ງານດັ່ງກ່າວຈະມີການມອບລາງວັນການກໍ່ສ້າງ ແລະອະສັງຫາຂອງລາວໃນປີ 2019. ພ້ອມດຽວກັນນັ້ນ, ສະມາຄົມນັກສະຖາປານິກ ແລະວິສະວະກອນກໍ່ສ້າງລາວ (ສສວ) ຈະຈັດກອງປະຊຸມປະຈໍາປີ ເປັນເວລາ 2 ມື້ ພາຍໃນງານ LAOBUILD 2019 ຄາດວ່າຈະມີນັກສະຖາປານິກ ແລະວິສະວະກອນ ເຂົ້າຮ່ວມຫຼາຍກວ່າ 350 ຄົນ ຈາກທົ່ວປະເທດ.

 


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ