• ຊຽງຂວາງເຜີຍແຜ່ກົດໝາຍ ວ່າດ້ວຍ ການກວດກາລັດ

ໂດຍ: Admin Mahason 12 ມິຖຸນາ 2019 (13.35 ນ.) Read : 242

      ຂປລ. ແຂວງຊຽງຂວາງ ຮ່ວມກັບ ອົງການກວດກາ ລັດຖະບານ ເຜີຍແຜ່ກົດໝາຍ ວ່າດ້ວຍ ການກວດກາລັດ ໃນວັນທີ 12 ມິຖຸນາ 2019 ຢູ່ທີ່ຫ້ອງວ່າການ ແຂວງຊຽງຂວາງ ທັງ​ນີ້ ກໍເພື່ອ​ເປັນ​ການແນະນຳ ອະທິບາຍ ແລະ ຍົກຕົວຢ່າງ ໃຫ້ຂະແໜງການ, ທ້ອງຖິ່ນ ມີຄວາມເຂົ້າໃຈແຈ້ງ ແລະ ສະດວກ ໃນການຈັດຕັ້ງ ປະຕິບັດຕົວຈິງ ແນໃສ່ເຮັດ ໃຫ້ການເຄື່ອນໄຫວ ວຽກງານ ກວດກາລັດ ຖືກຕ້ອງຮັດກຸມ ເຂັ້ມງວດ ມີຜົນສັກສິດ ຕາມກົດໝາຍ ໄດ້ກຳນົດໄວ້ ເພື່ອໃຫ້ອົງການປົກຄອງທ້ອງຖິ່ນ ແລະ ອົງການກວດກາລັດ ແຕ່ລະຂັ້ນ ພະນັກງານ-ລັດຖະກອນ, ທະຫານ, ຕຳຫຼວດ ແລະ ພົນລະເມືອງ ມີຄວາມເຂົ້າໃຈ ທີ່ເປັນເອກະພາບ ແລະ ເປັນບ່ອນອີງ ໃນການຈັດຕັ້ງ ປະຕິບັດຕົວຈິງ
      ການ​ເຜີຍ​ແຜ່​ ກົດໝາຍ​ ດັ່ງກ່າວ​ ຈັດ​ຂຶ້ນ​ໂດຍ ​ການ​ເປັນ​ປະທານ​ ທ່ານນາງ ອຸເທນ ມາສີຊົນໄຊ ຮອງເຈົ້າແຂວງໆ ຊຽງຂວາງ, ທ່ານ ດາວບົວລະພາ ບາວົງເພັດ ຮອງປະທານ ອົງການກວດກາລັດຖະ ບານ, ມີຄະນະປະຈຳ ພັກແຂວງ, ຫົວໜ້າ ຮອງຫົວໜ້າ ພະແນກການ, ເມືອງ ແລະ ອົງການຈັດຕັ້ງ ເຂົ້າຮ່ວມ ຮັບຟັງ, ​ເຊິ່ງກົດໝາຍ ວ່າດ້ວຍ ການກວດກາລັດ (ສະບັບປັບປຸງ)  ເລກທີ041/ສພຊ, ລົງວັນທີ16ພະຈິກ2017 ປະກອບດ້ວຍ 10 ພາກ, 6 ໝວດ, 80 ມາດຕາ ໄດ້ກຳນົດລະບຽບການ ຫລັກການ ມາດຕະການ ກ່ຽວກັບ ການຈັດຕັ້ງ ແລະ ການເຄື່ອນໄຫວ ກວດກາລັດ ເວົ້າລວມ ແມ່ນຄົບຖ້ວນ ແລະ ຈະແຈ້ງ, ການເຜີແຜ່ຄັ້ງນີ້ ເປັນການຜັນ ຂະຫຍາຍເນື້ອໃນບາງມາດຕາທີ່ປັບປຸງ ແລະ ສ້າງໃໝ່ ຈຳນວນ​ໜຶ່ງ.

ທີ່ມາ: ປະເທດລາວ
  • ແທັກທີ່ກ່ຽວຂ້ອງ