• ໂຮງງານຜະລິດລິບລາວ (Lao Factory Elevator)

ໂດຍ: ສີເປື້ອນມື 11 ມິຖຸນາ 2019 (16.57 ນ.) Read : 887

ໃນວັນທີ 9 ມິຖຸນາ 2019 ທີ່ຜ່ານມາ ໄດ້ມີພິທີເປີດໂຮງງານ ຜະລິດລິບລາວ, ໂຮງງານຜະລິດລິບນີ້ຖື ວ່າເປັນໂຮງງານແຫ່ງທຳອິດໃນ ສປປ ລາວ. ໂຮງງານດັ່ງກ່າວນີ້ ໄດ້ນຳໃຊ້ສ່ວນປະກອບ ແລະເຕັກໂນໂລຊີຈາກເອີລົບ, ມໍເຕີ້ ສັ່ງຈາກປະເທດ ອີຕາລີ, ລະບົບປະຕູຈາກປະເທດແອັດສະປາຍ ແລະລະບົບຄວາມຄຸມລິບຂຶ້ນລົງເປັນເຕັກໂນໂລຊີຈາກປະເທດຝຣັ່ງ. ລະບົບປ້ອງກັນປະຕູໜີບຜູ້ໂດຍສານ ຫຼືສິ່ງຂອງດ້ວຍແຖບເຊັນເຊີ ທີ່ບານປະຕູທັ້ງສອງຂ້າງ.

ຜະລິດຕະພັນຫລັກຂອງໂຮງງານຜະລິດລິບລາວ ແມ່ນລິບໂດຍສານ, ລິບສົ່ງອາຫານ, ລິບຂົນເຄື່ອງ ແລະລິບໂຮງໝໍ. ນອກຈາກນີ້, ໂຮງງານຜະລິດລິບລາວ ຍັງມີຄວາມສາມາດຜະລິດຂັ້ນໄດເລື່ອນ ແລະຕັ່ງຍົກສຳລັບຄົນພິການ ແລະຄົນຊະລາອີກດ້ວຍ.

ໂຮງງານດັ່ງກ່າວ ແມ່ນການຮ່ວມລົງທຶນຂອງນັກທຸລະກິດລາວ 100% ລະຫວ່າງ ທ່ານ ດຣ ສີສະຫຼຽວ ສະແຫວງສຶກສາ ແລະທ່ານ ພູວົງ ສີຫາປັນຍາ. ທ່ານ ພູວົງ ສີຫາປັນຍາ ເປັນນັກວິສະວະກອນທີ່ມີປະສົບການເຮັດວຽກກັບໂຮງງານຜະລິດລິບຍີ້ຫໍ້ ໂອເລໂອດີນ ທີ່ປະເທດຝຣັ່ງ ຫລາຍກວ່າ 30 ປີ ແລະທ່ານຍັງເປັນຜູ້ອຳນວຍການໂຮງງານຜະລິດລິບ ໂອເລໂອດີນ ລາວ-ເອເຊຍ ທີ່ປະເທດໄທອີກ 10 ກວ່າປີ.

ທ່ານ. ດຣ ສີສະຫຽວ ສະແຫວງສຶກສາ ໄດ້ກ່າວວ່າ: ແນວຄວາມຄິດ ຈຸດປະສົງທີ່ຢາກສ້າງ ໂຮງງານຜະລິດລິບລາວ ເກີດມາຈາກການສຶກສາຄົ້ນຄວ້າແນວທາງນະໂຍບາຍຂອງພັກ:

-    ກ່ຽວກັບ ນະໂຍບາຍການພັດທະນາເສດຖະກິດສັງຄົມໃນໄລຍະໃໝ່ຢູ່ ສປປ ລາວ.

-    ກ່ຽວກັບນະໂຍບາຍການຫັນເປັນອຸດສະຫະກໍາ ແລະທັນສະໄໝ.

-    ກ່ຽວກັບນະໂຍບາຍຂົນຂວາຍ, ຮຽກເອີ້ນເອົານັກທຸລະກິດລາວຢູ່ຕ່າງປະເທດ ໃຫ້ກັບມາພັດທະນາບ້ານເກີດເມືອງນອນ.

-    ກ່ຽວນະໂຍບາຍການເຊື່ອມໂຍງພາກພື້ນ ແລະນະໂຍບາຍບໍ່ຢາກສະກັດກັ້ນການຮົ່ວໄຫຼຂອງເງິນຕາອອກນອກປະເທດ.

ໃນປັດຈຸບັນ ດ້ວຍຄວາມຮຽກຮ້ອງຕ້ອງການໃນການພັດທະນາ ເສດຖະກິດ-ສັງຄົມ ແລະດ້ວຍຄວາມມຸ້ງໝັ້ນ ທີ່ຢາກນຳເອົາເຕັກໂນໂລຊີຂັ້ນສູງກັບມາພັດທະນາປະເທດລາວ ຈຶ່ງໄດ້ສ້າງຕັ້ງໂຮງງານຜະລິດລິບລາວແຫ່ງນີ້ ເພື່ອຮັບໃຊ້ສັງຄົມ. ໃນໄລຍະຜ່ານມາ, ທາງໂຮງງານກໍໄດ້ຜະລິດລິບສະໜອງໃຫ້ແກ່ຕຶກ ແລະອາຄານຕ່າງໆ ໃນນະຄອນຫລວງວຽງຈັນ ແລະເມືອງວັງວຽງ ເຊັ່ນ: ລິບແກ້ວທີ່ອາຄານ 6 ຊັ້ນ ຂອງກະຊວງແຜນການ ແລະ ການລົງທຶນ, ລິບອາຄານໂຮງໝໍ 103 ກອງທັບ ທີ່ບ້ານ ໂພນປ່າເປົ້າ, ລິບອາຄານໂຮງແຮມ ສິມມາ ແຄມຂອງ, ລິບອາຄານໂຮງແຮມ ຣັດສະໝີ, ລິບອາຄານລັດວິສາຫະກິດໄປສະນີລາວ ທີ່ສາຍລົມ, ລິບໂຮງແຮມ ລີຊາ ແກຣນທີ່ວັງວຽງ ແລະອື່ນໆ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ