• ມອບ-ຮັບ​ໂຄງ​ການ​ປັບ​ປຸງ​ຕ່ອງ​ໂສ້ ແລະ​ເພີ່ມ​ມູນ​ຄ່າ​ເຂົ້າ​ເມືອງ​ຈຳ​ພອນ

ໂດຍ: ສີເປື້ອນມື 11 ມິຖຸນາ 2019 (11.11 ນ.) Read : 93

ພິທີມອບ-ຮັບໂຄງການ ປັບປຸງຕ່ອງໂສ້ ແລະເພີ່ມມູນຄ່າເຂົ້າ ທີ່ຈັດຕັ້ງປະຕິບັດພາຍໃຕ້ ໂຄງການພັດທະນາຊົນນະບົດແບບມີສ່ວນຮ່ວມ (ແຊມາອຸນ ດົງ) ຢູ່ແຂວງ ສະຫວັນນະເຂດ ໄດ້ຈັດຂຶ້ນໃນວັນທີ 6 ມິຖຸນາ 2019 ນີ້, ທີ່ຫ້ອງວ່າການປົກຄອງເມືອງຈຳພອນໂດຍການເປັນປະທານຂອງທ່ານ ຄຳລຸຍ ຍາດຕິວົງ ຫົວໜ້າພະແນກກະສິກຳ-ປ່າໄມ້ແຂວງ, ທ່ານ ສຸທິ ຜິວສຸລິຍະມາດ ເຈົ້າເມືອງຈຳ ພອນ, ທ່ານ ເຈນ ແຊຈັງ ຊ່ຽວຊານກິດຈະກຳປັບປຸງຕ່ອງໂສ້ ແລະເພີ່ມມູນຄ່າເຂົ້າຈາກ ສສ. ເກົາຫຼີ, ມີຫ້ອງການກ່ຽວຂ້ອງຂອງເມືອງ, ສູນກະສິກຳຫຼັກ 35, ເລຂາພັກບ້ານ-ນາຍບ້ານ ແລະບັນດາສະມາຊິກກຸ່ມຜະລິດຈາກ 2 ບ້ານ ເປົ້າໝາຍຄື: ໂພນມ່ວງ ແລະພາຍຂອງເຂົ້າຮ່ວມ.
ໂອກາດນີ້, ທ່ານ ຄຳລຸຍ ຍາດຕິວົງ ໄດ້ກ່າວວ່າ: ກອງປະ ຊຸມຄັ້ງນີ້ແມ່ນມີຄວາມໝາຍ ສຳຄັນຫຼາຍ ເຊິ່ງເປັນໂອກາດ ທີ່ດີທີ່ຈະໄດ້ມີການມອບ-ຮັບ ຜົນການຈັດຕັ້ງປະຕິບັດກິດ ຈະກຳ, ມອບຄູ່ມືເຕັກນິກການ ຜະລິດເຂົ້າທີ່ມີຄຸນະພາບສູງ ໃຫ້ແກ່ຊາວນາທີ່ເຮັດການຜະ ລິດ ນອກນີ້ຍັງຈະໄດ້ຮັບຟັງ ການບັນຍາຍກ່ຽວກັບກົດລະບຽບຂອງກຸ່ມຜະລິດ ເພື່ອເປັນແນວທາງໃນການຈັດຕັ້ງປະຕິບັດໃນຕໍ່ໜ້າ ແລະໃຫ້ມີຄວາມ ຍືນຍົງຂອງໂຄງການ ພ້ອມ ດຽວກັນນັ້ນ ຍັງຈະໄດ້ມີການຝຶກອົບຮົມຕື່ມກ່ຽວກັບການຜະລິດເຂົ້າແນວພັນ ແລະການຜະ ລິດເຂົ້າເປັນສິນຄ້າ ເພື່ອຍົກສູງ ລາຍຮັບ ໃຫ້ແກ່ຊາວນາໃນ 2 ບ້ານເປົ້າໝາຍຂອງເມືອງຈຳ ພອນຄື: ບ້ານໂພນມ່ວງແມ່ນ ກຸ່ມຜະລິດເຂົ້າແນວພັນ ແລະ ບ້ານພາຍຂອງແມ່ນຜະລິດ ເຂົ້າເປັນສິນຄ້າ. ພາຍຫຼັງສິ້ນ ສຸດໂຄງການກໍ່ຂໍຮຽກຮ້ອງໃຫ້ ຄະນະນຳຂອງເມືອງ, ຫ້ອງ ການກະສິກຳ-ປ່າໄມ້ເມືອງ, ການນຳບ້ານເປົ້າໝາຍໂດຍ ສະ ເພາະກຸ່ມຜູ້ຜະລິດຈົ່ງເອົາໃຈ ໃສ່ໃນຖານຕິດຕາມ, ຊຸກຍູ້ ເຮັດໃຫ້ກຸ່ມມີຄວາມເຂັ້ມແຂງ ສາມາດຈັດການບໍລິຫານ, ຄຸ້ມຄອງ ແລະຈັດຕັ້ງປະຕິບັດຕາມລະບຽບການຂອງກຸ່ມໃນການດຳເນີນການຜະລິດ, ຄຸ້ມຄອງເຄື່ອງມືການຜະລິດ, ຄຸ້ມຄອງກອງທຶນເຂົ້າ ແລະອື່ນໆ ເພື່ອເຮັດໃຫ້ກາຍເປັນຕົວແທນທີ່ດີທີ່ສາມາດສືບຕໍ່ໄດ້ຢ່າງມີປະສິດທິພາບ ແລະໃຫ້ມີຄວາມຍືນຍົງ. 
ຈາກນັ້ນ, ໃນພິທີກໍ່ໄດ້ມອບຜົນສຳເລັດໃນການຈັດຕັ້ງ ປະຕິບັດໂຄງການໃຫ້ທ່ານຫົວ ໜ້າພະແນກກະສິກຳ-ປ່າໄມ້ ແຂວງ, ທ່ານເຈົ້າເມືອງຈຳ ພອນ ແລະຫົວໜ້າກຸ່ມຊາວນາ 2 ບ້ານເປົ້າໝາຍ, ຈາກນັ້ນກໍ່ໄດ້ມອບໃບຢັ້ງຢືນໃຫ້ພະນັກງານໂຄງການ, ມີການອະທິບາຍກົດລະບຽບ, ຊົມວິດີໂອການກຳເນີດແຊມາອຸນດົງຢູ່ ສ ເກົາຫຼີ ແລະການຈັດຕັ້ງໂຄງການຢູ່ທີ່ແຂວງວຽງຈັນ, ມີການນຳສະເໜີແຜນປັບປຸງລະບົບຕ່ອງໂສ້ ແລະເພີ່ມມູນຄ່າເຂົ້າ ພ້ອມນີ້ກໍ່ຍັງໄດ້ມີການຝຶກອົບຮົມເຕັກນິກຍົກສູງຜົນຜະລິດເຂົ້າ ແລະຄຸນນະພາບນຳອີກ.

ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ