• ສະໜາມບິນສາກົນວັດໄຕ ປອດຄວັນຢາສູບ

ໂດຍ: ສີເປື້ອນມື 03 ມິຖຸນາ 2019 (15.55 ນ.) Read : 242

ໃນວັນທີ 31 ພຶດສະພາ 2019 ທີ່ຜ່ານມາ ໄດ້ມີການຈັດພິທີປະກາດໃຫ້ສະໜາມບິນສາກົນວັດໄຕ ເປັນເຂດປອດຄວັນຢາສູບ ພ້ອມທັງເປັນການສະເຫຼີມສະຫຼອງວັນງົດສູບຢາໂລກ (WNTD); ກໍຄືວັນງົດສູບຢາແຫ່ງຊາດ. ໃຫ້ກຽດເຂົ້າຮ່ວມ ໄດ້ແກ່: ທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ດຣ. ມາກ ຈ່າຄອບ (Dr. Mark Jacobs) ຜູ້ຕາງໜ້າ ອົງການອະນາໄມໂລກ ປະຈໍາ ສປປ ລາວ ແລະທ່ານ ດຣ. ນາງ ດອມມີລີນ ຜູ້ຕາງໜ້າສະມາພັນຄວບຄຸມຢາສູບອາຊຽນ ພ້ອມທັງຕາງໜ້າຈາກພາກລັດ ແລະເອກຊົນຢ່າງຫຼວງຫຼາຍ.

ຈຸດປະສົງຂອງການເຮັດໃຫ້ ສະໜາມບິນສາກົນວັດໄຕ ປອດຄວັນຢາສູບ ແມ່ນປົກປ້ອງສຸຂະພາບຂອງຜູ້ທີ່ບໍ່ສູບຢາ ຈາກການໄດ້ຮັບຄວັນຢາສູບຂອງຄົນອື່ນ ແລະປົກປ້ອງອັກຄີໄພທີ່ອາດຈະເກີດຂຶ້ນ. ການຈັດໃຫ້ສະໜາມບິນວັດໄຕ ປອດຄວັນຢາສູບນີ້ ຈະສ້າງສະພາບແວດລ້ອມທີ່ສົດໃສ, ມີຄວາມເປັນລະບຽບຮຽບຮ້ອຍ, ສະອາດງາມຕາໃຫ້ແກ່ພະນັກງານປະຈໍາສະໜາມບິນ, ຜູ້ໂດຍສານ, ແຂກທຸກຄົນທີ່ເຂົ້າມາໃນສະໜາມບິນ ລວມເຖິງນັກທ່ອງທ່ຽວທັງພາຍໃນ ແລະຕ່າງປະເທດ.

ອົງການອະນາໄມໂລກ ໄດ້ກໍານົດເອົາວັນທີ 31 ພຶດສະພາ ຂອງທຸກປີ ເປັນວັນສະເຫຼີມສະຫຼອງງົດສູບຢາໂລກ ລວມທັງ ສປປ ລາວເອງ. ວັນງົດສູບຢາແມ່ນມີຄວາມໝາຍສໍາຄັນຢ່າງຍິ່ງ ພາຍໃຕ້ຄໍາຂວັນ ການສູບຢາ ພາໃຫ້ເປັນປອດ ຫຼື Tobacco and lung health” ທັງນີ້ເພື່ອເປັນການປຸກລະດົມ ແລະໃຫ້ຄວາມຮູ້ກ່ຽວກັບຄວາມອັນຕະລາຍຂອງການສູບຢາ ແລະໄດ້ຮັບຄວັນຢາສູບ ເຊິ່ງເປັນສາເຫດຂອງການເກີດພະຍາດປອດຮ້າຍແຮງ, ຊໍ້າເຮື້ອ, ທໍລະມານຈາກການເຈັບປ່ວຍ ແລະນໍາໄປສູ່ການເສຍຊີວິດກ່ອນໄວອັນຄວນ.

ຈາກການສໍາຫຼວດແຫາງຊາດ ກ່ຽວສກັບການສູບຢາຂອງຜູ້ໃຫຍ່ ໃນປີ 2015 ພົບວ່າ ການໄດ້ຮັບຄວັນຢາສູບພາຍໃນສະຖານທີ່ສາທາລະນະຍັງສູງ ໂດຍສະເພາະແມ່ນ ການໄດ້ຮັບຄວັນຢາສູບພາຍໃນອາຄານບ່ອນເຮັດວຽກ ສູງເຖິງ 63%. ດັ່ງນັ້ນ, ຈຶ່ງຮຽກຮ້ອງໃຫ້ທຸກພາກສ່ວນ ຕ້ອງເພີ່ມທະວີການມີສ່ວນຮ່ວມ ແລະເປັນເຈົ້າການ ໃນການປົກປ້ອງສຸຂະພາບຂອງຕົນເອງ ແລະຄົນອ້ອມຂ້າງຈາກຄວັນຢາສູບ ພ້ອມທັງແນະນໍາໃຫ້ຜູ້ທີ່ສູບຢາ ມາສູບຢູ່ ບ່ອນອະນຸຍາດສູບຢາເທົ່ານັ້ນ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ