• ປະທານປະເທດ ຕ້ອນຮັບທູດຍື່ນສານຕາຕັ້ງ

ໂດຍ: Admin Mahason 09 ພະຈິກ 2017 (12.08 ນ.) Read : 584

ວັນ​ທີ 8 ພະຈິກ 2017 ທີ່​ທຳນຽບ​ຫ້ອງ​ວ່າການ​ປະທານ​ປະເທດ (ຫໍຄຳ) ທ່ານ ບຸນ​ຍັງ ວໍລະຈິດ ປະທານ​ປະເທດ ໄດ້​ຕ້ອນຮັບ​ການ​ເຂົ້າ​ຍື່ນ​ສານ​ຕາ​ຕັ້ງ​ຂອງທ່ານ​ນາງ ມາ​ເຣຍ ອາລີ​ເຊຍ ກຸດ​ໂຊ​ນີ ເດີ ຊອງ​ເຊັນ (Maria Alicia Cuzzonl de sonchein) ໃຫ້​ມາ​ດຳລົງ​ຕຳແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອຳນາດ​ເຕັມ ແຫ່ງ ສ ອາກ​ຊັງ​ຕິນ ປະຈຳ​ລາວ​ຄົນໃໝ່ ທີ່​ມີ​ສຳນັກງານ​ຕັ້ງ​ຢູ່​ບາງກອກ ປະເທດ​ໄທ 

ເຊິ່ງ​ອາກ​ຊັງ​ຕິນ ແລະ ​ສປປ ລາວ ໄດ້​ມີ​ສາຍ​ພົວພັນ​ການ​ທູດ ໃນ​ວັນ​ທີ 24 ກໍ​ລະກົດ 1975 ຜ່ານ​ມາ ​ການ​ພົວພັນໄດ້​ມີ​ການ​ແລກປ່ຽນ​ສານ​ອວຍພອນ​ເຊິ່ງ​ກັນ ແລະ ກັນ ເນື່ອງ​ໃນໂອກາດ​ວັນ​ສຳຄັນ​ຕ່າງໆ. ວັນ​ດຽວ​ກັນ ທ່ານ​ປະທານ​ປະເທດ ໄດ້​ຕ້ອນຮັບ​ການ​ເຂົ້າ​ຍື່ນສານ​ຕາ​ຕັ້ງຂອງ​ທ່ານ ເຊ​ອິກ ຈາດ​ຊິມ ບິນ ອັບດຸນ​ລາມາ ອາລ-ທານີ (Sheikh jassim Bin Abdulrahman AI-Thani) ໃຫ້​ມາ​ດຳລົງ​ຕຳແໜ່ງ​ເປັນ​ເອກອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອຳນາດ​ເຕັມ​ແຫ່ງ ລັດ​ກາ​ຕາ ປະຈຳ​ລາວ ທີ່​ມີ​ສຳນັກງານ​ຕັ້ງ​ຢູ່​ບາງກອກ ປະເທດ​ໄທ ເຊິ່ງລາວ ແລະ ກາ​ຕາ ໄດ້​ສ້າງຕັ້ງ​ສາຍ​ພົວພັນ​ການ​ທູດ​ນຳ​ກັນ ໃນ​ວັນ​ທີ 3 ກຸມພາ 2005 

ເຊິ່ງຜ່ານ​ມາ ​ໄດ້​ມີ​ການ​ຮ່ວມ​ມື​ແລກປ່ຽນ​ບົດຮຽນ ໃຫ້ການ​ສະໜັບສະ​ໜູນ​ເຊິ່ງ​ກັນ ແລະ ກັນ. ໂອກາດ​ນີ້ ທ່ານ​ປະທານ​ປະເທດ ​ໄດ້​ສະແດງ​ຄວາມ​ຊົມເຊີຍຕໍ່​ການ​ມາ​ດຳລົງ​ຕຳແໜ່ງ ເປັນເອກ​ອັກ​ຄະ​ລັດ​ຖະ​ທູດ​ວິສາມັນຜູ້​ມີ​ອຳນາດ​ເຕັມ ປະຈຳ​ລາວ ຄົນໃໝ່​ຂອງ​ທັງ​ສອງ​ປະເທດ ເຊິ່ງເປັນ​ການ​ເສີມ​ຂະຫຍາຍ​ສາຍ​ພົວພັນ​ຄວາມ​ສາມັກຄີ​ຮັກແພງ ລະຫວ່າງ​ປະເທດ​ລາວກັບ​ປະເທດອາກ​ຊັງ​ຕິນ ແລະ ກາ​ຕາ ໃຫ້​ນັບມື້​ແໜ້ນ​ແຟ້ນ​ຍິ່ງໆ​ຂຶ້ນ ເປັນ​ການສືບຕໍ່​ສະໜັບສະໜູນ​ການ​ຮ່ວມມື​ພັດທະນາ ​ສປປ ລາວ ຕື່ມ​ອີກ.

ທີ່ມາ:
  • ແທັກທີ່ກ່ຽວຂ້ອງ