• ລັດຖະບານ ສັ່ງໂຈະເນື້ອທີ່ປູກກ້ວຍທີ່ຂະຫຍາຍໃໝ່

ໂດຍ: Admin Mahason 22 ພຶດສະພາ 2019 (14.57 ນ.) Read : 210

     ວັນ​ທີ 21 ພຶດ­ສະ­ພາ 2019 ທີ່​ກະ­ຊວງ​ກະ­ສິ­ກຳ ແລະ ປ່າ­ໄມ້ ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ໄດ້​ໃຫ້​ສຳ­ພາດ​ຕໍ່​ສື່​ມວນ​ຊົນ​ວ່າ: ການ​ປູກ​ກ້ວຍ​ເປັນ​ສິນ­ຄ້າ ໄດ້​ສ້າງ​ລາຍ​ຮັບ​ອັນ​ດັບ​ໜຶ່ງ​ຈາກ​ຜົນ​ຜະ­ລິດ​ກະ­ສິ­ກຳ​ທີ່​ສົ່ງ​ອອກ ໂດຍ​ສະ­ເພາະ​ແມ່ນ​ຕະ­ຫຼາດ​ຈີນ ດັ່ງ­ນັ້ນ ຈຶ່ງ​ໄດ້​ມີ​ການ​ຂະ­ຫຍາຍ​ເນື້ອ­ທີ່​ປູກ​ກ້ວຍ​ເປັນ​ຈຳ­ນວນ​ຫຼວງ­ຫຼາຍ ກວມ​ທຸກ​ພາກ​ຂອງ​ປະ­ເທດ​ລາວ​ເຮົາ ນັບ​ແຕ່​ພາກ​ເໜືອ​ຮອດ​ພາກ​ກາງ ແລະ ພາກ​ໃຕ້ ໃນ​ໄລ­ຍະ​ຜ່ານ​ມາ ແຕ່​ພາຍ­ຫຼັງ​ທີ່​ມີ​ແຈ້ງ​ການ ແລະ ຄຳ​ສັ່ງ​ຈາກ​ລັດ­ຖະ­ບານ ໃນ​ປີ 2017 ເປັນ­ຕົ້ນ​ແມ່ນ ກົດ­ໝາຍ​ວ່າ​ດ້ວຍ​ກັກ​ກັນ​ພືດ ກົດ­ໝາຍ​ວ່າ​ດ້ວຍ​ເຄ​ມີ ການ​ນຳ​ໃຊ້​ສານ​ເຄ​ມີ ແລະ ສານ​ຕ້ອງ​ຫ້າມ​ໃນ​ການ​ປູກ­ຝັງ​ຕະ­ຫຼອດ​ຮອດ​ລະ­ບຽບ​ການ​ຕ່າງໆ ພິ­ເສດ​ປະ­ເທດ​ທີ່​ນຳ​ເຂົ້າ­ໝາກ​ກ້ວຍ​ໄດ້​ມີ​ມາດ​ຕະ­ການ​ກະ­ສິ­ກຳ​ສະ­ອາດ ດ້ວຍ​ເຫດ​ນັ້ນ ເຫັນ​ວ່າ​ທ່າ​ອ່ຽງ​ການ​ປູກ​ກ້ວຍ​ຫອມ​ເພື່ອ​ສົ່ງ​ອອກ​ໄປ​ຕະ­ຫຼາດ​ຈີນ ມີ​ທ່າ​ອ່ຽງ​ຫຼຸດ​ລົງ ສະ­ແດງ​ອອກ​ໃນ​ເມື່ອ​ກ່ອນ​ມີ 26.000 ເຮັກ­ຕາ ມາ​ຮອດ​ປີ 2018 ຍັງ​ເຫຼືອ 20.400 ເຮັກ­ຕາ ແລະ ປີ 2019 ມີ​ເນື້ອ­ທີ່ 15.000 ກວ່າ​ເຮັກ­ຕາ ໃນ​ນີ້ ຢູ່​ພາກ​ເໜືອ​ມີ​ສາ­ເຫດ​ຫຼຸດ​ລົງ​ໃນ​ຕົວ​ຂອງ​ມັນ​ເອງ ເນື່ອງ​ຈາກ​ຫ້າມ​ການ​ນຳ​ໃຊ້​ສານ​ເຄ​ມີ​ທີ່​ຕ້ອງ​ຫ້າມ ກໍ່­ໃຫ້­ເກີດ​ກໍ­ລະ­ນີ​ພະ­ຍາດ​ໃບ​ກ້ວຍ​ຫ່ຽວ​ໃບ​ເຫຼືອງ ຈຶ່ງ​ເຮັດ​ໃຫ້​ຫຼາຍ​ເມືອງ​ທີ່​ປູກ​ກ້ວຍ​ຢູ່​ທາງ​ພາກ​ເໜືອ ໄດ້​ມີ​ການ​ຢຸດ​ເຊົາ​ຫັນ​ໄປ​ປູກ​ພືດ​ອື່ນ​ທົດ​ແທນ.

      ສຳ­ລັບ​ລາຍ​ຮັບ​ຈາກ​ການ​ປູກ​ກ້ວຍ​ເປັນ​ສິນ­ຄ້າ​ຢູ່​ພາກ​ເໜືອ ຈາກ​ມູນ​ຄ່າ​ເບື້ອງ​ຕົ້ນ​ສະ­ເລ່ຍ 50 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 430 ຕື້​ກີບ​ຕໍ່​ປີ ຂະ­ຫຍາຍ​ລົງ​ໄປ​ຮອດ​ພາກ​ກາງ ແລະ ພາກ​ໃຕ້ ສະ­ເລ່ຍ 200 ລ້ານ​ໂດ​ລາ ຫຼື ປະ­ມານ 1.700 ຕື້​ກີບ​ຕໍ່​ປີ ນອກ​ນີ້ ຍັງ​ໄດ້​ສ້າງ​ລາຍ​ຮັບ​ໃຫ້​ປະ­ຊາ­ຊົນ​ຜູ້​ທີ່​ມີ​ດິນ​ໃຫ້​ສຳ​ປະ­ທານ​ໃຫ້​ເຊົ່າ ຫຼື ມີ​ສ່ວນ​ຮ່ວມ​ໃນ​ການ​ປູກ​ກ້ວຍ​ຕື່ມ​ອີກ ສະ­ເພາະ​ແຂວງ​ພາກ​ເໜືອ​ສະ­ເລ່ຍ 6-8 ລ້ານ​ກີບ​ຕໍ່​ເຮັກ­ຕາ​ຕໍ່​ປີ ແລະ ນະ­ຄອນ­ຫຼວງ​ວຽງ​ຈັນ 2-4 ລ້ານ​ກີບ​ຕໍ່​ເຮັກ­ຕາ​ຕໍ່​ປີ ພ້ອມ​ນັ້ນ ອົງ​ການ­ຈັດ­ຕັ້ງ​ລັດ​ຂັ້ນ​ແຂວງ​ໃຫ້​ເກັບ​ຄ່າ​ຊົດ​ເຊີຍ​ຕໍ່​ສິ່ງ­ແວ­ດລ້ອມ​ສະ­ເລ່ຍ​ບໍ່​ຫຼຸດ 5 ລ້ານ​ກີບ​ຕໍ່​ເຮັກ­ຕາ​ຕໍ່​ປີ ແລະ ຄ່າ​ແຮງ​ງານ​ຂອງ​ກຳ­ມະ­ກອນ​ທີ່​ເຮັດ​ວຽກ​ຢູ່​ສວນ​ກ້ວຍ​ສະ­ເລ່ຍ 10 ລ້ານ​ກີບ​ຕໍ່​ຄົນ​ຕໍ່​ປີ.

      ເພື່ອ​ຫຼີກ​ລ່ຽງ​ຜົນ​ກະ­ທົບ​ຈາກ​ການ​ປູກ​ກ້ວຍ ລັດ­ຖະ­ບານ​ໄດ້​ມີ​ນິ­ຕິ​ກຳ ຄຳ​ສັ່ງ ກົດ­ໝາຍ ແລະ ແຈ້ງ​ການ​ຂອງ​ກົມ​ປູກ­ຝັງ ກະ­ຊວງ​ກະ­ສິ­ກຳ ແລະ ປ່າ­ໄມ້ ເຊິ່ງ​ໃນ​ນິ­ຕິ​ກຳ​ໄດ້​ຫ້າມ​ເດັດ­ຂາດ​ບໍ່​ໃຫ້​ມີ​ການ​ປູກ​ກ້ວຍ​ໃກ້​ແຫຼ່ງ​ນ້ຳ ແລະ ຊຸມ​ຊົນ​ທີ່​ຄົນ​ອາ­ໄສ​ຢູ່ ທັງ​ນີ້​ເພື່ອ​ບໍ່​ໃຫ້​ມີ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ແລະ ຄົນ​ທີ່­ຢູ່​ໃກ້​ຄຽງ ພ້ອມ​ນັ້ນ ຍັງ​ໄດ້​ມີ​ການ​ຄຸ້ມ​ຄອງ​ການ​ນຳ​ເຂົ້າ​ຢາ​ຂ້າ​ຫຍ້າ 55 ປະ­ເພດ​ທີ່​ຫວງ​ຫ້າມ ທີ່​ມີ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ຄົນ ແລະ ສັດ ກໍ​ຄື ຜູ້​ບໍ­ລິ­ໂພກ ນອກ​ນັ້ນ ໄດ້​ແນະ­ນຳ​ໃຫ້​ຂຶ້ນ​ທະ­ບຽນ​ສວນ​ກ້ວຍ ທີ່​ປະ­ຕິ­ບັດ​ຕາມ​ມາດ­ຕະ­ຖານ​ກະ­ສິ­ກຳ​ສະ­ອາດ ທີ່​ກົມ​ປູກ­ຝັງ​ໄດ້​ກຳ­ນົດ ໄດ້​ມີ​ການ​ເຝິກ­ອົບ­ຮົມ​ໃຫ້​ຊາວ​ກະ­ສິ­ກອນ ຜູ້​ປະ­ກອບ​ການ​ໃນ​ຂະ​ບວນ​ການ​ປະ­ຕິ­ບັດ​ກະ­ສິ­ກຳ​ທີ່​ດີ ແລະ ໃຫ້​ບັນ­ດາ​ຮ້ານ​ຂາຍ​ຢາ​ຂ້າ​ແມງ­ໄມ້​ຂຶ້ນ​ທະ­ບຽນ ເພື່ອ​ຕິດ­ຕາມ​ກວດ­ກາ​ເປັນ​ແຕ່​ລະ​ໄລ­ຍະ.

      ທ່ານ ບຸນ​ຂວາງ ຄຳ​ບຸນ​ເຮືອງ ຍັງ​ກ່າວ​ຕື່ມ​ວ່າ: ປັດ­ຈຸ­ບັນ ເນື້ອ­ທີ່​ປູກ​ກ້ວຍ​ທີ່​ຂະ­ຫຍາຍ​ໃໝ່​ນັ້ນ ລັດ­ຖະ­ບານ​ໄດ້​ສັ່ງ​ໂຈະ ພ້ອມ​ແນະ­ນຳ​ຫັນ​ເປັນ​ທັນ​ສະ­ໄໝ ໂດຍ​ເນັ້ນ​ໃສ່​ການ​ປູກ​ພືດ​ຊະ­ນິດ​ອື່ນໆ​ເປັນ​ສິນ­ຄ້າ​ທົດ​ແທນ ສະ­ເພາະ​ການ​ປູກ​ກ້ວຍ​ໃນ​ນະ­ຄອນ­ຫຼວງ​ວຽງ​ຈັນ ໄດ້​ມີ​ການ​ບຸກ­ເບີກ​ເນື້ອ­ທີ່​ປູກ​ແຕ່​ເມືອງ​ສັງ​ທອງ​ຈົນ​ຮອດ​ປາກ​ງື່ມ ໃນ​ນີ້ ໄດ້​ມີ​ຄຳ​ສັ່ງ​ເດັດ­ຂາດ​ໃຫ້​ຫັນ​ປູກ​ພືດ​ແນວ​ອື່ນ​ທີ່​ເປັນ​ສິນ­ຄ້າ ພ້ອມ​ທັງ​ແນະ­ນຳ​ໃຫ້​ສົມ­ທົບ​ກັບ​ພະ​ແນກ ຫ້ອງ­ການ​ກະ­ສິ­ກຳ ແລະ ປ່າ­ໄມ້ ແລະ ກົມ​ປູກ­ຝັງ​ໃນ​ການ​ເຜີຍ­ແຜ່​ລະ­ບຽບ​ການ ແລະ ນິ­ຕິ​ກຳ​ຕ່າງໆ​ໃຫ້​ປະ­ຊາ­ຊົນ ແລະ ຜູ້​ປະ­ກອບ​ການ​ໄດ້​ເຂົ້າ­ໃຈ.


ທີ່ມາ: ABC Laos News
  • ແທັກທີ່ກ່ຽວຂ້ອງ