• ປະສົບການໃນວັນນັ້ນ ຄືບົດຮຽນສູ່ຄວາມສໍາເລັດໃນວັນນີ້ “ຄໍາເພົ້າ ສັ່ງໄດ້”

ໂດຍ: Admin Mahason 05 ທັນວາ 2017 (04.44 ນ.) Read : 1,242

ນັບແຕ່ປີ 2003 ເປັນຕົ້ນມາໄດ້ລົງທຶນສ້າງໂຮງງານຕັດຫຍິບ “ຄໍາເພົ້າ ຈະເລີນ” ເຊິ່ງໄດ້ດໍາເນີນມາເປັນເວລາ 10 ກວ່າປີ ແຕ່ເຫດການປັບປ່ຽນ ເມື່ອຕົນເອງຕັດສິນຈັດຮ່ວມຫຸ້ນກັບຕ່າງປະເທດ ໃນໄລຍະ 3 ປີ ຍ້ອນຕົນເອງເປັນຄົນທີ່ບໍ່ມີຄວາມຮູ້ສູງ ແລະຂາດປະສົບການ. ສຸດທ້າຍຈຶ່ງເຮັດໃຫ້ຖືກເຂົາເຈົ້າເອົາປຽບ ແລະຂາດທຶນຫຼາຍຈົນໃນທີ່ສຸດໂຮງງານຕັດຫຍິບດັ່ງກ່າວກໍລົ້ມລະລາຍໄປ.

ທ່ານ ຄໍາເພົ້າ ບົວພັນ ຫຼື ຄໍາເພົ້າ ສັ່ງໄດ້ ໄດ້ກ່າວວ່າ: ຕອນນັ້ນຮູ້ສຶກເສຍໃຈຫຼາຍ ຈຶ່ງໄດ້ຕັດສິນໃຈເອົາທາງສາສະໜາເຂົ້າຊ່ວຍ ເພື່ອເຮັດໃຫ້ຈິດໃຈສະຫງົບຂຶ້ນ ແລະມີເວລາໃນການວາງແຜນສູ້ຊີວິດຕໍ່ໄປ. ໃນປີ 2015 ເມື່ອເຫດການທຸກຢ່າງເລີ່ມເຂົ້າສູ່ພາວະປົກກະຕິ ກໍໄດ້ໃຊ້ທຶນກ້ອນໜຶ່ງມາສ້າງຮ້ານຕັດເຄື່ອງແຫ່ງນີ້. ຈາກປະສົບການໃນການຕັດຫຍິບເຄື່ອງມາຫຼາຍປີ ຈຶ່ງເຮັດໃຫ້ສີມືມີການພັດທະນາຂຶ້ນເລື້ອຍໆ ແລະຮ້ານກໍເລີ່ມມີຊື່ສຽງຂຶ້ນ ໂດຍມີສິລະປິນແຖວໜ້າຂອງລາວເຂົ້າມາໃຊ້ບໍລິການ ແລະເກີດຄວາມປະທັບໃຈໃນຄວາມງາມຂອງເຄື່ອງທີ່ຕັດໃຫ້ຕາມຄວາມຕ້ອງການຂອງລູກຄ້າ. ຈາກຊື່ຮ້ານທີ່ເປັນ “ຄໍາເພົ້າ ຈະເລີນ” ກໍໄດ້ປ່ຽນມາເປັນ “ຄໍາເພົ້າ ສັ່ງໄດ້” ຍ້ອນຄໍາເວົ້າທີ່ຂອງລູກຄ້າທີ່ສະດຸດຫູ.

ຍ້ອນເປັນທີ່ນິຍົມຂອງຄົນທີ່ມີຊື່ສຽງໃນແຖວໜ້າປະເທດ ຈຶ່ງເຮັດໃຫ້ຮ້ານ ຄໍາເພົ້າ ສັ່ງໄດ້ ເປັນທີ່ຮູ້ຈັກໃນສັງຄົມວົງກວ້າງ ແລະນິຍົມກັນເຂົ້າມາໃຊ້ບໍລິການ ບໍ່ວ່າຈະເປັນນັກທຸລະກິດ, ບໍລິສັດເອກະຊົນ, ລັດວິສາຫະກິດ, ສິລະປິນ, ນັກສະແດງ, ນາຍແບບ, ນາງແບບ, ພິທີກອນ, ພະນັກງານ, ນັກສຶກສາ ແລະປະຊາຊົນທົ່ວໄປ... ຍ້ອນລາຄາທີ່ທຸກຄົນສາມາດເຂົ້າເຖິງໄດ້ ໂດຍເລີ່ມຕົ້ນທີ່ລາຄາ 800,000 - 1,500,000 ກີບ (ຂຶ້ນກັບປະເພດຂອງຜ້າ).

ຮ້ານ ຄໍາເພົ້າ ສັ່ງໄດ້ ໄດ້ມີໂອກາດຮັບຕັດຊຸດຂອງເຈົ້າບ່າວ ແລະໝູ່ເຈົ້າບ່າວ ທີ່ໃຫຍ່ທີ່ສຸດທີ່ເຄີຍມີມາ ເພາະປົກກະຕິ ງານແຕ່ງດອງຈະມີລູກຄ້າເຂົ້າມາສັ່ງຕັດປະມານ 15-30 ຊຸດ. ແຕ່ງານທີ່ໄດ້ຮັບຫຼາຍວ່າໝູ່ນັ້ນກໍຄື ງານແຕ່ງດອງຂອງ ໜຸ່ມ ອາລີ້ ແລະ ສາວ ເໝີຍ ທີ່ມີຍອດສັ່ງຕັດເຄື່ອງສູງສຸດ. ສ່ວນຈຸດເດັ່ນຂອງຮ້ານທີ່ເຮັດໃຫ້ດຶງດູດໃຈລູກຄ້າໄດ້ຄື: ການບໍລິການດ້ວຍຄວາມຈິງໃຈ, ລາຄາຖືກ, ລູກຄ້າທີ່ຕັດເຄື່ອງກັບທາງຮ້ານສາມາດປັບຂະໜາດໄດ້ຟຣີ ແລະການບໍລິການເຖິງສະຖານທີ່. ໃນມື້ໜຶ່ງສາມາດອອກແບບເສື້ອຜ້າໄດ້ 15-20 ແບບ ແລະໃຊ້ເວລາການຜະລິດ 1 ຊຸດ/ອາທິດ (ສໍາຫຼັບລູກຄ້າທົ່ວໄປ ເພື່ອເຮັດໃຫ້ຊຸດອອກມາສົມບູນ). ສ່ວນລູກຄ້າປະຈໍາ (VIP) ທີ່ພວກເຮົາຮູ້ຂະໜາດ ແລະຄວາມຕ້ອງການຂອງເຂົາເຈົ້າແລ້ວກໍຈະງ່າຍຂຶ້ນ ຈະໃຊ້ເວລາພຽງ 1-3 ມື້ກໍໄດ້ແລ້ວ.

ໃນອະນາຄົດມີແຜນທີ່ຈະພັດທະນາສີມືໃນການອອກແບບຂຶ້ນໄປເລື້ອຍໆ ພ້ອມນໍາເຂົ້າຜ້າທີ່ມີລາຄາແພງ ແລະມີຊື່ສຽງເຂົ້າມາເພີ່ມຕື່ມ ເພື່ອຕອບສະໜອງຄວາມຕ້ອງການຂອງລູກຄ້າ ໃຫ້ເຂົາເຈົ້າມີຫຼາຍທາງເລືອກ. ສຸດທ້າຍນີ້ ຢາກຂໍຂອບໃຈລູກຄ້າທຸກທ່ານທີ່ເຂົ້າມາໃຊ້ບໍລິການ ແລະໄວ້ວາງໃຈພວກເຮົາໃຫ້ພວກເຮົາຮັບໃຊ້ງານສໍາຄັນຂອງທ່ານ. ສິ່ງທີ່ປະທັບໃຈທີ່ສຸດກໍຄືງານແຕ່ງດອງຂອງ ໜຸ່ມ ອາລີ້ ແລະ ສາວ ເໝີຍ ທີ່ຕົນເອງໄດ້ກຽດຮັບໃຊ້ຕັດຊຸດໃຫ້ເຈົ້າບ່າວ-ເຈົ້າສາວ ແລະໝູ່ເຈົ້າບ່າວ ລວມທັງໝົດ 60 ຊຸດ ພ້ອມທັງໄດ້ເປັນແຂກຮັບເຊີນໃນງານ.

ທ່ານໃດສົນໃຈໃຊ້ບໍລິການກັບຮ້ານ “ຄໍາເພົ້າ ສັ່ງໄດ້” ສະຖານທີ່ຕັ້ງຢູ່ບ້ານ ຈອມເພັດໃຕ້ ເມືອງ ສີສັດຕະນາກ ນະຄອນຫຼວງວຽງຈັນ ເປີດທຸກວັນ ຕັ້ງແຕ່ເວລາ 8:00-19:00 ໂມງ ສາມາດເຂົ້າໄປໂອລົມກັບເຈົ້າຂອງຮ້ານໂດຍກົງໄດ້ທີ່ເບີໂທ: 020 5592 6222 ແລະ 020 5663 1663 ເຈົ້າຂອງຮ້ານໃຈດີ ພ້ອມທັງໃຫ້ຄໍາປຶກສາກ່ຽວກັບການອອກແບບຟຣີ.




ທີ່ມາ: ໂດຍ: ສີເປື້ອນມື
  • ຮູບພາບ

  • ແທັກທີ່ກ່ຽວຂ້ອງ