• ທ່ານ ເກຍ ອູສິດທິເດດ ໄດ້ໃຊ້ເງິນສ່ວນຕົວ 15 ຕື້ກວ່າກີບ ປ່ຽນຊີວິດຄົນຂໍທານ 400 ກວ່າຄົນ

ໂດຍ: Admin Mahason 08 ພຶດສະພາ 2019 (13.19 ນ.) Read : 1,373

     ຂປລ. ນັກທຸລະກິດລາວທ່ານໜຶ່ງ, ຜູ້ຊຶ່ງໄດ້ຮັບນາມມະຍົດ “ນັກພັດທະນາດີເດັ່ນແຫ່ງຊາດ” ຈາກລັດຖະບານ ເມື່ອບໍ່ນານມານີ້, ໄດ້ທຸ່ມເທທັງສະຕິປັນຍາ, ເຫື່ອແຮງ, ເວລາ ລວມທັງຊັບສິນຈຳ ນວນມະຫາສານ ເພື່ອປ່ຽນຄວາມຄິດ ແລະ ຫັນປ່ຽນຊີວິດ 400 ກວ່າຄົນ ທີ່ຢຶດອາຊີບຂໍທານຫາລ້ຽງຊີບ, ລ້ຽງຄອບຄົວ ເປັນເວລາຫລາຍສິບປີມາເຮັດມາສ້າງຢູ່ກັບທີ່ ຈົນສາມາດພົ້ນທຸກໄດ້ໂດຍພື້ນຖານ ແລະ ຢຸດຕິພຶດຕິກຳຂໍທານແບບຖາວອນ.
     ນັກພັດທະນາດີເດັ່ນແຫ່ງຊາດ ທ່ານນີ້ມີຊື່ວ່າ ເກຍ ອູ໊ສິດທິເດດ, ເຊິ່ງເປັນເຈົ້າຂອງໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳ, ບໍລິສັດ ອຸດົມຊັບ ກໍ່ສ້າງຂົວທາງ ແລະ ບໍລິສັດ ອຸດົມຊັບ ແຮ່-ຊາຍ ຢູ່ ແຂວງສະຫວັນນະເຂດ ໂດຍໄດ້ມີແນວຄິດລິເລີ່ມຢາກຊ່ວຍເຫລືອ ບັນດາຄອບຄົວທຸກຍາກ ຈຳນວນທັງໝົດ 77 ຄອບຄົວ ລວມມີ 400 ກວ່າຄົນ ຢູ່ບ້ານ ຄໍາປ່າແໜ ແລະ ບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ ທີ່ບໍ່ມີລາຍຮັບ, ບໍ່ມີວຽກເຮັດງານທຳ, ບໍ່ມີໄຮ່ນາ, ຮົ້ວສວນທີ່ສາມາດທຳການຜະລິດໄດ້ ຫລື ແມ່ນແຕ່ເຂົ້າກິນໃນແຕ່ລະວັນ.
     ຈາກນັ້ນ, ຈຶ່ງເກີດມີໂຄງການລຶບລ້າງຄວາມທຸກຍາກ (ລຶບລ້າງຄອບຄົວຄົນຂໍທານ) ຂຶ້ນໃນປີ 2016 ໂດຍນັກທຸລະກິດທ່ານນີ້ ໄດ້ທຸ່ມເທສະຕິປັນຍາ, ເງິນ, ເຫື່ອແຮງ ແລະ ເວລາ ເພື່ອຈັດສັນທີ່ດິນ, ປຸກເຮືອນເຄິ່ງຖາວອນ, ສະໜອງເຂົ້າກິນ, ຈັດສັນເນື້ອທີ່ທຳການຜະລິດ, ປູກຝັງ, ລ້ຽງສັດ, ສະໜອງແນວພັນພືດ-ສັດ, ປັບປ່ຽນລະບົບນິເວດໃນຂອບເຂດຂອງບ້ານ, ຝຶກອົບຮົມທາງດ້ານເຕັກນິກ, ພັດທະນາແນວຄິດ, ນຳພາປະຊາຊົນ ລົງມືເຮັດຕົງວຈິງ ແລະ ອື່ນໆ ຈົນເຮັດໃຫ້ປະຊາຊົນເຫລົ່ານີ້ມີຊີວິດທີ່ດີຂຶ້ນ, ສາມາດເຂົ້າເຖິງການສຶກສາ ແລະ ສາທາລະນະສຸກ, ຫັນຈາກແນວຄິດຂໍທານ ມາທຳມາຫາກິນດ້ວຍຕົນເອງ ກ້າວໄປສູ່ການມີອາຊີບທີ່ໝັ້ນຄົງ ແລະ ມີສະພາບແວດລ້ອມທີ່ອຸດົມສົມບູນ ພາຍໃນໄລຍະເວລາ 3 ປີ.
     ຕະຫລອດເວລາ 3 ປີ (2016-2018), ທ່ານ ເກຍ ອູສິດທິເດດ ໄດ້ໃຊ້ເງິນສ່ວນຕົວ 15 ຕື້ກວ່າກີບ, ພ້ອມເສຍສະຫລະເວລາ ແລະ ເຫື່ອແຮງ ເພື່ອພາປະຊາຊົນ ລົງມືເຮັດຕົວຈິງຈົນເຂົາເຈົ້າເຮັດເປັນ, ມີຄວາມຊຳນານ, ມີແນວຄິດໝັ່ນທ່ຽງ, ຮູ້ຢາກເຮັດຢາກໄດ້ ແລະ ເຮັດທຸກວິທີທາງ ຈົນສາ ມາດເຮັດໃຫ້ປະຊາຊົນທຸກຍາກເຫລົ່ານີ້ ມີການດຳລົງຊີວິດທີ່ດີ, ມີຮອຍຍີ້ມ, ມີຄວາມສຸກ, ມີຫລາຍໆຢ່າງເປັນຂອງໂຕເອງ, ກຸ້ມຢູ່ກຸ້ມກິນດ້ວຍຕົນເອງ, ຮູ້ທຳມາຫາກິນ, ຮູ້ຄ້າຂາຍ, ມີຊີວິດໃໝ່ທີ່ສົດໃສກວ່າເກົ່າ ປຽບສະເໝືອນຕາຍແລ້ວເກີດໃໝ່.
     ໃນກອງປະຊຸມສະຫລຸບ ການມີສ່ວນຮ່ວມຂອງໂຮງງານຜະລິດນ້ຳດື່ມ ແລະ ນ້ຳກ້ອນໂລມາຄຳ ໃນການລຶບລ້າງຄວາມທຸກຍາກຂອງປະຊາຊົນສອງບ້ານດັ່ງກ່າວ, ໃນວັນທີ 29 ເມສາ 2019, ທ່່ານ ສັນຕິພາບ ພົມວິຫານ ເຈົ້າແຂວງສະວັນນະເຂດ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາ ຄາສູງຕໍ່ການຕັດສິນໃຈຂອງ ທ່ານ ເກຍ ອູ໊ສິດທິເດດ, ເຊິ່ງເປັນການປະກອບສ່ວນອັນສໍາຄັນເຂົ້າໃນການລຶບລ້າງຄວາມທຸກຍາກ ຂອງປະຊາຊົນຢູ່ສອງບ້ານດັ່ງກ່າວ ໃຫ້ກາຍເປັນບ້ານພົ້ນທຸກໂດຍພື້ນ ຖານ ແລະ ກ້າວໄປສູ່ບ້ານພັດທະນາເທື່ອລະກ້າວ. ຕະຫລອດເວລາທີ່ຜ່ານມາ, ໃນຈຳນວນ 60 ກວ່າຄອບຄົວຢູ່ບ້ານຄຳປ່າແໜ ຈະມີພຽງແຕ່ 4-5 ຄອບຄົວເທົ່ານັ້ນ ທີ່ບໍ່ໄປຂໍກິນ, ແຕ່ມາຮອດປັດຈຸບັນ ບໍ່ມີໃຜໄປຂໍກິນອີກແລ້ວ ທຸກຄົນພາກັນຕັ້ງໜ້າທຳມາຫາກິນດ້ວຍການປູກຝັງ, ລ້ຽງສັດ, ເຮັດໄຮ່ໃສ່ນາ, ຄ້າຂາຍ ແລະ ອື່ນໆ ທີ່ໂຄງການມອບໃຫ້ ຈົນສາມາດຊ່ວຍເຫລືອໂຕເອງໄດ້.

ທີ່ມາ: ABC Laos News
  • ຮູບພາບ

  • ແທັກທີ່ກ່ຽວຂ້ອງ