• ຄິດໃຫ້ດີ ກ່ອນໄຂຝາໝໍ້ ເປີດຮ້ານອາຫານ

ໂດຍ: 05 ທັນວາ 2017 (04.35 ນ.) Read : 984

ອາຫານຄືປັດໄຈຫຼັກທີ່ທຸກຄົນປາສະຈາກບໍ່ໄດ້ ແຕ່ດ້ວຍການດໍາເນີນຊີວິດແບບຮີບຮ້ອນໃນປັດຈຸບັນ ເຮັດໃຫ້ຄົນສ່ວນໃຫຍ່ນິຍົມໄປຝາກທ້ອງໄວ້ກັບຮ້ານອາຫານ. ດ້ວຍເຫດນັ້ນ, ຈຶ່ງກາຍເປັນຊ່ອງທາງໃຫ້ນັກທຸລະກິດ ຫັນມາປະກອບການດ້ານຮ້ານອາຫານ-ຮ້ານກິນດື່ມຫຼາຍຂຶ້ນ. ແຕ່ລະປີມີຮ້ານອາຫານ,ຮ້ານກິນດື່ມ, ຮ້ານເບຍ, ຮ້ານບຸບບເຟ້, ພັດຕະຄານ...ເກີດຂຶ້ນໃໝ່ເລື້ອຍໆ ໃນທາງກົງກັນຂ້າມກໍມີຮ້ານທີ່ລົ້ມລະລາຍລົງໄປໃຫ້ເຫັນຢູ່ເລື້ອຍໆເຊັ່ນດຽວກັນ. 

ສຳລັບຜູ້ທີ່ມີແນວຄິດຢາກປະກອບການດ້ານຮ້ານອາຫານຕ້ອງຄິດໃຫ້ຮອບຄອບ, ພິຈາລະນາເຖິງຄວາມສ່ຽງຕ່າງໆໃຫ້ຖີ່ຖ້ວນ. ຜູ້ຂຽນຈະບໍ່ຂໍເອີ່ຍໃນແລວທຸລະກິດ ແຕ່ຈະຂໍແນະນໍາໃນຖານະເປັນລູກຄ້າຜູ້ໜຶ່ງທີ່ເຄີຍສຳຜັດຮ້ານອາຫານມາເກືອບທຸກຮູບແບບພາຍໃນຕົວເມືອງ ແລະຕ່າງແຂວງ ວ່າປັດໄຈໃດທີ່ຮ້ານອາຫານສາມາດມັດໃຈລູກຄ້າໄດ້.

1. ຣົດຊາດ: 
ອາຫານຣົດຊາດດີ ຈະສະແດງໃຫ້ເຫັນເຖິງຄວາມໃສ່ໃຈໃນການເລືອກວັດຖຸດິບ, ຄວາມພິຖີພິຖັນໃນການປຸງແຕ່ງ ອັນເປັນຕົວຍຶດຈ່ອງໃຫ້ລູກຄ້າກັບມາຮ້ານຂອງທ່ານອີກຄັ້ງ ທີ່ສໍາຄັນເຂົາຍັງນຳເປັນບອກຕໍ່ໃຫ້ຜູ້ອື່ນມາພ້ອມ ນັ້ນຖືວ່າເປັນການຕະຫຼາດທີ່ມີປະສິດຕິພາບໂດຍທີ່ເຈົ້າຂອງຮ້ານບໍ່ໄດ້ເສຍເງິນຄ່າລົງໂຄສະນາຈັກກີບ. 
ປລ. ຣົດຊາດດີທີ່ວ່ານີ້ ບໍ່ແມ່ນດີຍ້ອນເທແປ້ງນົວລົງໃສ່ເດີ! ອັນນັ້ນມັນຄືຄວາມແຊບແບບປອມໆ ທີ່ລູກຄ້າຫຼາຍຄົນເລີ່ມບໍ່ຍອມຮັບ.

2. ຄວາມກຸ້ມຄ່າ: 
ລາຄາທີ່ຈ່າຍໄປກັບຄຸນນະພາບອາຫານທີ່ໄດ້ມາຕ້ອງສົມເຫດສົມຜົນ ບໍ່ວ່າຈະເປັນການນັ່ງກິນເຂົ້າຂາໝູແຄມທາງ ຫຼືອາຫານອີຕາລີໃນພັດຕະຄານສຸດຫຼູ ທຸກຢ່າງກໍຕ້ອງມີຈຸດທີ່ກຸ້ມຄ່າ. ຫາກມື້ໃດທີ່ເຈົ້າຂອງຮ້ານເອົາປຽບລູກຄ້າ ຫຼືລູກຄ້າຮູ້ສຶກວ່າຖີກເອົາປຽບພວກເຂົາຈະບໍ່ກັບມາຢຽບຮ້ານທ່ານອີກເລີຍ ຕົວຢ່າງ ເຂົ້າຂາໝູຈານ 15.000 ກີບ ແຕ່ມີໝູຕິດມັນເນົ່າໆສອງຕອນ ແບບນີ້ຂໍບ່າຍໆ (ແຖມນຳເອົາໄປນິນທາຕໍ່ອີກ)

3. ການບໍລິການ
ຈິດຕະວິທະຍາຂອງຄົນບໍ່ຕ້ອງການພຽງແຕ່ອີ່ມທ້ອງ ແຕ່ຕ້ອງການຄວາມອີ່ມໃຈໄປນຳ ທຸກຄົນປາຖະໜາຢາກໃຫ້ຄົນອື່ນປະຕິບັດກັບຕົນເອງຢ່າງຜູ້ມີກຽດ ແລະໃຫ້ຄວາມສຳຄັນ. ຖ້າການບໍລິການຂອງທ່ານສາມາດຊື້ໃຈລູກຄ້າໄດ້ ແນ່ນອນພວກເຂົາຈະກັບມາອີກ ແລະອາດກາຍເປັນລູກຄ້າປະຈຳຂອງທ່ານກໍເປັນໄດ້. 

ສ່ວນປັດໄຈອື່ນໆເຊັ່ນ ທຳເລທີ່ຕັ້ງເໝາະສົມ, ມີບ່ອນຈອດລົດພຽງພໍ, ມີໂປຣໂມຊັ້ນເອົາໃຈລູກຄ້າຢ່າງສົມເຫດສົມຜົນ....ກໍເປັນຕົວດຶງດູດລູກຄ້າໄດ້ເຊັ່ນດຽວກັນ ທີສໍາຄັນອີກຢ່າງໜຶ່ງຄືພະຍາຍາມສ້າງຮ້ານຂອງທ່ານໃຫ້ມີຈຸດໂດດເດັ່ນຢ່າງໃດຢ່າງໜຶ່ງ ແລ້ວຮ້ານຂອງທ່ານຈະກາຍເປັນກະແສທີ່ສາມາດດຶງດູດລູກຄ້າເຂົ້າຮ້ານໄດ້ຢ່າງຕໍ່ເນື່ອງ 5ປີ , 10ປີ ກໍວ່າກັນໄປ.



ທີ່ມາ:
  • ແທັກທີ່ກ່ຽວຂ້ອງ