• ກຽມສຳຫຼວດ ການສ້າງເຂື່ອນໄຟຟ້າ ນຳ້ປະຍູ ແຂວງເຊກອງ

ໂດຍ: Admin Mahason 23 ເມສາ 2019 (10.15 ນ.) Read : 287

     ການພັດທະນາໂຄງການກໍ່ສ້າງເຂື່ອນໄຟຟ້ານຳ້ຕົກ ນຳ້ປະຍູ ເມືອງດາກຈຶງ ແຂວງເຊກອງ ຈະສືບຕໍ່ສຳຫຼວດອີກຄັ້ງ ພາຍຫຼັງທີ່ລັດຖະບານໄດ້ອະນຸມັດໃຫ້ ບໍລິສັດ ວຽງຈັນ ໂອໂຕເມຊັນ ແອນ ໂຊລູຊັນ ເອັນຈີເນຍຣິງ ຈຳກັດຜູ້ດຽວ ສືບຕໍ່ສຳຫຼວດ – ອອກແບບ ແລະ ສຶກສາ ຄວາມເປັນໄປໄດ້ ຄາດວ່າຈະມີກຳລັງຕິດຕັ້ງທີ່ຫຼາຍ ກວ່າເກົ່າ.

     ພິທີເຊັນບົດບັນທຶກຄວາມເຂົ້າໃຈເພື່ອສຶກສາສຳຫຼວດຄວາມເປັນໄປໄດ້ຂອງ ໂຄງການເຂື່ອນໄຟຟ້ານຳ້ຕົກ ນຳ້ປະຍູ ( ຕອນລຸ່ມ ) ແຂວງເຊກອງ ຈັດຂຶ້ນໃນວັນທີ 19 ເມສາ 2019 ຜ່ານມາທີ່ ກະຊວງແຜນການ ແລະ ການລົງທຶນ ລະ ຫວ່າງ ທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ ແສງລາຕີ ສະຫວັນຄຳ ປະທານ ບໍລິສັດ ວຽງຈັນ ໂອໂຕເມຊັນ ແອນ ໂຊລູຊັນ ເອັນຈີເນຍຣິງ ຈຳກັດຜູ້ດຽວ ໂດຍມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

     ທ່ານ ແສງລາຕີ ສະຫວັນຄຳ ປະທານ ບໍລິສັດ ວຽງຈັນ ໂອໂຕເມຊັນ ແອນ ໂຊລູຊັນ ເອັນຈີເນຍຣິງ ຈຳກັດຜູ້ດຽວ ກ່າວວ່າ: ຕາມເດີມການສຶກສາສຳຫຼວດ ຄວາມເປັນໄປໄດ້ໃນການພັດທະນາເຂື່ອນໄຟຟ້ານຳ້ຕົກ ນຳ້ປະຍູ ແມ່ນໄດ້ຖືກຈັດຕັ້ງປະຕິບັດມາແຕ່ປີ 2014 ໂດຍການສຳຫຼວດມີກຳລັງການຕິດຕັ້ງ 14,8 MW ທີ່ໄດ້ຮັບອະນຸຍາດຈາກອຳນາດການປົກຄອງແຂວງເຊກອງ.

     ຍ້ອນຜົນຂອງການສຳຫຼວດທີ່ອອກມາຊີ້ໃຫ້ເຫັນວ່າເຂດທີ່ຈະສ້າງເຂື່ອນດັ່ງກ່າວນັ້ນສາມາດມີກຳລັງການຕິດຕັ້ງທີ່ສູງກວ່າທີ່ກຳນົດ ແລະ ເປັນເຂດທີ່ອຸດົມສົມບູນໄປດ້ວຍແຫຼ່ງນຳ້ທຳມະຊາດມີນຳ້ຕະຫຼອດປີ, ຕັ້ງຢູ່ຫ່າງໄກສອກຫຼີກ ແລະ ມີຜົນກະທົບໜ້ອຍທີ່ສຸດສາມາດສ້າງເຂື່ອນໄຟຟ້າທີ່ມີກໍາລັງການຕິດຕັ້ງສູງເຖິງ 33 MW ຕາມຜົນຂອງການສຶກສາ.

     ແນວໃດກໍຕາມ, ໂຄງການກໍ່ສ້າງເຂື່ອນໄຟຟ້ານຳ້ຕົກ ນຳ້ປະຍູ ດັ່ງກ່າວນີ້ ທາງລັດຖະບານໄດ້ມອບໃຫ້ກະຊວງພະລັງງານ ແລະ ບໍ່ແຮ່ ເປັນຜູ້ຄົ້ນຄວ້າທາງດ້ານມາດຖານເຕັກນິກ ກ່ຽວກັບການສຶກສາຄວາມເປັນໄປໄດ້ ແລະ ການອອກແບບໃນເບື້ອງຕົ້ນເພື່ອຮັບປະກັນມາດຖານ, ເຕັກນິກຕ່າງໆໃຫ້ຖືກຕ້ອງຕາມລະບົບ.

     ປະທານ ບໍລິສັດ ວຽງຈັນ ໂອໂຕເມຊັນ ແອນ ໂຊລູຊັນ ເອັນຈີເນຍຣິງ ຈຳກັດຜູ້ດຽວ ກ່າວຕື່ມວ່າ: ໂຄງການເຂື່ອນໄຟຟ້ານຳ້ຕົກ ນຳ້ປະຍູ ( ຕອນລຸ່ມ ) ຫາກໄດ້ຮັບການກໍ່ສ້າງສຳເລັດຈະນຳຜົນປະໂຫຍດຢ່າງຫຼວງຫຼາຍຕໍ່ການພັດທະນາເສດຖະກິດ – ສັງຄົມ ຂອງບັນດາແຂວງພາກໃຕ້ ໂດຍສະເພາະແມ່ນແຂວງເຊກອງ ແລະ ເມືອງດາກຈຶງເອງ. ນອກຈາກນີ້, ໂຄງການຍັງຈະສ້າງວຽກເຮັດງານທຳໃຫ້ກັບພໍ່ແມ່ປະຊາຊົນອ້ອມຂ້າງມີອາຊີບທີ່ໝັ້ນຄົງ, ມີລາຍຮັບຖາວອນ ແລະ ມີຊີວິດທີ່ດີຂຶ້ນ.


ທີ່ມາ: ABC Laos News
  • ຮູບພາບ

  • ແທັກທີ່ກ່ຽວຂ້ອງ