• ຜູ້ເສຍຊີວິດ ຈາກເຫດລະເບີດສະຫລະຊີບຢູ່ສີລັງກາ ເພີ່ມຂື້ນເປັນ 200 ກ່ວາສົບ

ໂດຍ: Admin Mahason 22 ເມສາ 2019 (09.28 ນ.) Read : 256

     ຈາກເຫດລະເບີດໂຈມຕີໂຮງແຮມຫລູ ແລະໂບດ ຂະນະທີ່ມີຊາວຄຣິດສໄປຮ່ວມພິທີອີສເຕີ ໃນນະຄອນ ໂຄລັມໂບປະເທດສີລັງກາ ເມື່ອວັນອາທິດຜ່ານມາ ມີຜູ້ເສຍຊີວິດເພີ່ມເປັນ 207 ສົບ

     ສຳນັກຂ່າວເອເອຟພີລາຍງານຈາກນະຄອນໂຄລັມໂບປະເທດສີລັງກາເມື່ອວັນທີ່ 21 ເມສາ 2019 ວ່າ ແຫຼ່ງຂ່າວຕຳຫຼວດສີລັງກາເປີດເຜີຍວ່າ ເຫດລະເບີດຄັ້ງທີ່ 8 ເກີດຂື້ນທີ່ບ້ານຫລັງຫນື່ງໃນເຂດຊານເມືອງຂອງນະຄອນໂຄລັມໂບ ຊື່ງເກີດຈາກມືລະເບີດຂ້າໂຕຕາຍລາຍຫນື່ງຈຸດຊະນວນລະເບີດປິດຊີບໂຕເອງ ຂະນະຕຳຫຼວດຍົກກຳລັງເຂົ້າກວດຄົ້ນ ແຮງລະເບີດນອກຈາກຈະຂ້າຊີວິດໂຕມືລະເບີດແລ້ວ ຍັງເຮັດໃຫ້ຊັ້ນສອງຂອງອາຄານບ້ານດັ່ງກ່າວພັງຖະຫຼົ່ມລົງມາມີຕຳຫຼວດເສຍຊີວິດອີກນຳ 3 ສົບ

     ສ່ວນເຈົ້າຫນ້າທີ່ໂຮງແຮມຊິນນາມອນ ແກຣນ ຫນື່ງໃນສາມຂອງໂຮງແຮມຫຼູຕັ້ງຢູ່ໃນນະຄອນໂຄລັມໂບທີ່ຖືກໂຈມຕີດ້ວຍລະເບີດເປີດເຜີຍວ່າ ເປັນລະເບີດທີ່ເກີດຈາກມືລະເບີດຂ້າໂຕຕາຍຈຸດຊະນວນລະເບີດໂຈມຕີຂະນະທີ່ມີຜູ້ຄົນຢູ່ໃນຫ້ອງອາຫານຂອງໂຮງແຮມ ຍັງບໍ່ມີກຸ່ມໃດອອກມາປະກາດອ້າງຄວາມຜິດຊອບ ເຫດໂຈມຕີດ້ວຍລະເບີດຕໍ່ເນື່ອງຄັ້ງທີ່ຮຸນແຮງທີ່ສຸດໃນປະເທດສີລັງການັບຕັ້ງແຕ່ສິ້ນສຸດສົງຄາມກາງເມືອງເມື່ອ 10 ປີກ່ອນ ໂຕເລກຜູ້ເສຍຊີວິດປັບຂື້ນເປັນ 207 ສົບແລ້ວສ່ວນທ່ານ ຣຸວັນ ວິຈີວາຣດິນີ ລັດຖະມົນຕີກະຊວງປ້ອງກັນປະເທດສີລັງກາຖະແຫຼງວ່າ ລັດຖະມົນຕີສີລັງກາໄດ້ປະກາດເຄີຣຟິວ (ຄຳສັ່ງຫ້າມອອກນອກເຄຫະສະຖານຍາມວິການ) ໂດຍໃຫ້ມີຜົນໃນທັນທີ ແລະຈະບັງຄັບໃຊ້ໄປຈົນກວ່າຈະຈັດການບັນຫາຕ່າງໆໄດ້ຮຽບຮ້ອຍ ນອກຈາກນັ້ນລັດຖະບານຍັງໄດ້ສັ່ງປິດໃຫ້ບໍລິການເຄືອຂ່າຍສັງຄົມອອນໄລນຕ່າງໆ ແລະແອັບພິເຄຊັ່ນຂ່າວສານ ເຊັ່ນ ເຟສບຸກ ວອຕສແອັບ ໃນປະເທດສີລັງກາເພາະເກງວ່າຈະເປັນເຄື່ອງມືເພື່ອເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງແລະຂ່າວລື

     ດ້ານປະຕິກິລິຍາຈາກຜູ້ນຳຈາກທົ່ວໂລກໄດ້ອອກມາປະນາມການໂຈມຕີດ້ວຍລະເບີດຕໍ່ເນື່ອງໃນປະເທດສີລັງກາ ຊື່ງກໍ່ມີຊາວຕ່າງຊາດເສຍຊີວິດດ້ວຍ ເລີ່ມທີ່ປະທານາທິບໍດີໂດນັລ ທຣັມ ຂອງອາເມຣິກາ ກ່າວສະແດງຄວາມເສຍໃຈຢ່າງສຸດຊື້ງ ສົມເດັດພະສັນຕະປາປາຟຣານຊິສ ປະມຸກແຫ່ງຄຣິສຕະຈັກໂຣມັນຄາທໍລິກ ຊົງກ່າວວ່າ ຮູ້ຂ່າວຮ້າຍທີ່ເກີດຂື້ນທີ່ສີລັງກາ ແລະຂໍສົ່ງຄວາມຮັກໄປຍັງຊຸມຊົນຄຣິສຕຽນທີ່ຖືກໂຈມຕີຂະນະຊຸມນຸມສວດມົນໃນວັນອິສເຕີຣ ແລະເຫຍື່ອຜູ້ເຄາະຮ້າຍໃນເຫດຮຸນແຮງຄັ້ງຮ້າຍແຮງ ນາຍົກລັດຖະມົນຕີເທເຣຊາ ເມ ແຫ່ງອັງກິດ ກ່າວວ່າຕົກໃຈກັບເຫດການທີ່ເກີດຂື້ນ ແລະຈະຢືນຄຽງຂ້າງໄປກັບສີລັງກາ ຕາມມາດ້ວຍນາຍົກລັດຖະມົນຕີສະກ໋ອດ ມໍຣິສສັນຂອງອອສເຕຣເລຍ ນາຍົກລັດຖະມົນຕີຈາຊິນດາ ອາຣເດິຣນ ແຫ່ງນິວຊີແລນ ແລະຜູ້ນຳສາສນະຈັກແຄທໍລິກໃນເຢຣູຊາເລັມປະເທດອິສຣາເອລກໍ່ອອກມາປະນາມການໂຈມຕີເຊັ່ນກັນ

    


ທີ່ມາ: ABC Laos News
  • ຮູບພາບ

  • ແທັກທີ່ກ່ຽວຂ້ອງ