• ຈັບໄດ້ແລ້ວ ຄາດຕະກອນໂຫດ ກໍ່ເຫດຂ້າຕັດຄໍຢູ່ຫົວພັນ!

ໂດຍ: Admin Mahason 18 ເມສາ 2019 (15.56 ນ.) Read : 1,219

     ເຫດການຄາດຕະກຳຕັດຄໍຢູ່ແຂວງຫົວພັນ ໃນວັນທີ 16 ເມສາ 2019, ຜູ້ເສຍຊີວິດ ຊື່ ທ້າວ ວົງສຸກ ອາຍຸ 45 ປີ ຢູ່ບ້ານບາວ ເມືອງຊຽງຄໍ້ ແຂວງຫົວພັນ (ເປັນຫົວໜ້າ ປກສ ບ້ານບາວ) ແລະ ຜູ້ກໍ່ເຫດຊື່ ທ້າວ ຄໍາ ອາຍຸ 29 ປີ ຄົນບ້ານດຽວກັນ, ສາເຫດເກີດຍ້ອນຜູ້ກໍ່ເຫດເຄີຍຖືກເຈົ້າໜ້າທີ່ປ້ອງກັນຄວາມສະຫງົບບ້ານບາວ ຈັບຕົວໄປສືກສາອົບຮົມກ່າວເຕືອນໃຫ້ຢຸດເຊົາຈາກເສບຢາເສບຕິດປະເພດຢາບ້າຫຼາຍຄັ້ງ, ດ້ວຍເຫດຜົນດັ່ງກ່າວ ເຮັດໃຫ້ມີຄວາມຄຽດແຄ້ນຝັງໃຈ ຈຶ່ງກໍ່ເຫດຂ້າຕະກໍາຫົວໜ້າ ປກສ ບ້ານ ດ້ວຍການເອົາພ້າຟັນຄໍຈົນເສຍຊີວິດ ແລ້ວໃຊ້ພ້າດວງເກົ່າຟັນຊໍ້າຈົນຄໍຂາດ.

     ເຈົ້າໜ້າທີ່ ປກສ ເມືອງຊຽງຄໍ້ ເປີດເຜີຍວ່າ: ພາຍຫຼັງໄດ້ຮັບແຈ້ງຄວາມຈາກອໍານາດການປົກຄອງບ້ານບາວ ວ່າ: ມີປະຊາຊົນພາຍໃນບ້ານຖືກຄາດຄະກໍາ ຈຶ່ງຟ້າວປະສານສົມທົບກັບພາກສ່ວນທີ່ກ່ຽວຂ້ອງລົງກວດກາສະຖານທີ່ເກີດເຫດ ພົບເຫັນຜູ້ເສຍຊີວິດ ຊື່ ທ້າວ ວົງສຸກ ເຊິ່ງເປັນຫົວໜ້າ ປກສ ບ້ານບາວ ສະພາບສົບຖືກພ້າຟັນຄໍຈົນຂາດອອກ ຢູ່ແຄມໜອງເຂດບ້ານດັ່ງກ່າວ. ຜ່ານການສອບສວນປະຊາຊົນເຂດບ້ານ ຈຶ່ງຮູ້ຜູ້ກໍ່ເຫດ ຊື່ ທ້າວ ຄໍາ ເປັນຄົນບ້ານດຽວກັນ, ວັນຕໍ່ມາ ເຈົ້າໜ້າທີ່ຈຶ່ງໄປຈັບຕົວຜູ້ກ່ຽວໄປສອບສວນ.

     ຜ່ານການສອບສວນເບື້ອງຕົ້ນຜູ້ກ່ຽວສາລະພາບວ່າ: ໄດ້ເສບຢາເສບຕິດປະເພດຢາບ້າແຕ່ປີ 2011 ເປັນຕົ້ນມາ, ພໍ່-ແມ່ ແລະ ເມຍຂອງຕົນເອງ ກໍໄດ້ບອກໃຫ້ເຊົາຫຼາຍຄັ້ງແຕ່ບໍ່ຟັງ ເຮັດໃຫ້ຜູ້ເປັນເມຍໜີປະຢ່າຮ້າງກັນ. ຈາກນັ້ນ, ທາງຜູ້ປົກຄອງຜູ້ກ່ຽວໄດ້ສົ່ງໄປປິ່ນປົວ-ບໍາບັດໃຫ້ເຊົາຈາກເສບຢາເສບຕິດປະເພດຢາບ້າ ແຕ່ພາຍຫຼັງກັບອອກມາ ກໍໄປເສບຢູ່ຄືເກົ່າ; ນອກນີ້, ຜູ້ກ່ຽວ ຍັງເຄື່ອນໄຫວຜິດກົດໝາຍອື່ນໆອີກ ຄື: ຊອກຫາໄມ້ມີລາຄາປະເພດໄມ້ຄໍາມູນຢູ່ພູ ແລ້ວຕັດໄປຂາຍມາຫຼາຍຄັ້ງ ແລະ ຖືກ ທ້າວ ວົງສຸກ ທີ່ເປັນຫົວໜ້າ ປກສ ບ້ານ ພ້ອມດ້ວຍຄະນະ ຢຶດເອົາໄມ້ທີ່ຕັດມາ ພ້ອມທັງສຶກສາໃຫ້ຢຸດເຊົາຕັດໄມ້ຊະຊາຍ ແລະ ສຶກສາອົບຮົມກ່ຽວກັບບັນຫາຢາເສບຕິດຫຼາຍຄັ້ງ ຈຶ່ງມີຄວາມຄຽດແຄ້ນ, ມີຄວາມອາຄາດບາດໝາງ ແລະ ມີແນວຄິດຢາກຂ້າ ທ້າວ ວົງສຸກ ໃຫ້ໄດ້.

     ເວລາ 13:00 ໂມງ ຂອງວັນທີ 16 ເມສາ 2019 ທ້າວ ຄໍາ ໄດ້ໄປໃສ່ມອງນົກ ຢູ່ຫ້ວຍດູກ ບ້ານບາວ ເມືອງຊຽງຄໍ້ ຮອດເວລາ 18:00 ໂມງ ໄດ້ກັບຄືນມາ ໃນລະຫວ່າງທາງຜູ້ກ່ຽວໄດ້ ເຫັນ ທ້າວ ວົງສຸກ ກໍາລັງເກືອປາຢູ່ໜອງ, ຈຶ່ງມີແນວຄິດວ່າເອົາໂອກາດນີ້ລ້າງແຄ້ນ; ທ້າວ ຄໍາ ໄດ້ຍ່າງໄປຫາ ທ້າວ ວົງສຸກ ລົມກັນປະມານ 20-30 ນາທີ ຈຶ່ງຊວນກັນກັບບ້ານ. ໃນຂະນະນັ້ນ, ທ້າວ ວົງສຸກ ກໍາລັງຕ່າວຫົວລົດຈັກ ສ່ວນ ທ້າວ ຄໍາ ຢືນຢູ່ດ້ານຫຼັງ ເມື່ອເຫັນ ທ້າວ ວົງສຸກ ເຜີຕົວ ຈຶ່ງໄດ້ໂອກາດຈັບພ້າທີ່ຖືມານຳ ຟັນເຂົ້າຄໍເບື້ອງຂວາ ທ້າວ ວົງສຸກ ຈໍານວນ 3 ບາດ ທ້າວ ວົງສຸກໄດ້ຮ້ອງຂຶ້ນ 1 ຄັ້ງ ແລ້ວລົ້ມລົງພື້ນຈົນເສຍຊີວິດ ແລ້ວທ້າວ ຄຳ ກໍເອົາພ້າດວງດຽວກັນຟັນຊໍ້າຈົນຄໍຂາດ ແລ້ວກັບຄືນເມືອເຮືອນ, ອາບນ້ໍາປ່ຽນເຄື່ອງເຂົ້ານອນ ເຮັດແບບ ບໍ່ມີເຫດການຫຍັງເກີດຂຶ້ນ, ມາຮອດວັນທີ 17 ເມສາ 2019 ເຈົ້າໜ້າທີ່ ກອງບັນຊາການ ປກສ ເມືອງຊຽງຄໍ້ ແລະ ປກສ ແຂວງ ກໍໄດ້ກັກຕົວຜູ້ກ່ຽວໄປດໍາເນີນຄະດີຕາມກົດໝາຍ.


ທີ່ມາ: ນສພ ຄວາມສະຫງົບ
  • ຮູບພາບ

  • ແທັກທີ່ກ່ຽວຂ້ອງ