• ຄິວສາຍໃຕ້ ເພີ່ມຈຳນວນລົດຮອງຮັບຜູ້ໂດຍສານໄລຍະປີໃໝ່ລາວ

ໂດຍ: ສີເປື້ອນມື 08 ເມສາ 2019 (23.23 ນ.) Read : 179

ໄລຍະສະເຫລີມສະຫລອງບຸນປີໃໝ່ລາວ ພສ 2562 ນີ້, ສະຖານນີຂົນສົ່ງໂດຍສານສາຍທາງໄກ ສາຍໃຕ້-ສາຍຕາງປະເທດ ໄດ້ເພີ່ມຈຳນວນລົດໂດຍສານຈຳນວນ 30 ຄັນ ຈາກ 60 ຄັນມາເປັນ 90 ຄັນ. ທັງນີ້, ກໍເພື່ອຮອງຮັບຈຳນວນຜູ້ໂດຍສານ ທີ່ຈະເດີນທາງໄປສະຖານທີ່ຕ່າງໆໃນພາກກາງ-ພາກໃຕ້, ທັງຮັບປະກັນ ບໍ່ໃຫ້ມີຜູ້ໂດຍສານອັ່ງອໍ ແລະ ຕົກຄ້າງ.
ທ່ານ ວັນເພັງ ສີສຸກ ຜູ້ອຳນວຍການ ສະຖານີຂົນສົ່ງໂດຍສານສາຍທາງໄກສາຍໃຕ້-ສາຍຕາງປະເທດ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 8 ເມສາ 2019 ນີ້ວ່າ: ປັດຈຸບັນ ສະຖານນີຂົນສົ່ງໂດຍສານສາຍທາງໄກສາຍໃຕ້-ສາຍຕາງປະເທດ ມີຄວາມກຽມພ້ອມໃຫ້ບໍລິການແກ່ພໍ່ແມ່ປະຊາຊົນ, ພະນັກງານ, ທະຫານຕຳຫລວດ ທີ່ຈະເດີນທາງກັບບ້ານ ໃນໄລຍະສະເຫລີມສະຫລອງບຸນປີໃໝ່ລາວ ພສ 2562 ດ້ວຍການເພີ່ມລົດໂດຍສານ ໃນແຕ່ລະມື້ປະມານ 30 ຄັນ ຈາກປົກກະຕິ 60 ຄັນ ເປັນ 90 ຄັນ ເພື່ອຮັບປະກັນບໍ່ໃຫ້ມີຜູ້ໂດຍສານຕົກຄ້າງ, ສ່ວນລາຄາແມ່ນປົກກະຕິ ແລະ ຈະບໍ່ໄຂຶ້ນລາຄາເດັດຂາດ. ສຳລັບບັນຫາຫ່າງສຽງກ່ຽວກັບຕັ່ງເສີມນັ້ນ ສະເພາະລົດທີ່ອອກຈາກຄິວ ແມ່ນຮັບປະກັນວ່າບໍ່ມີຕັ່ງເສີມ, ຊື້ປີ້ນຳສະຖານີແມ່ນຈະບໍ່ໄດ້ນັ່ງຕັ່ງເສີມ ນອກຈາກວ່າ ຜູ້ໂດຍສານຈະຂຶ້ນລົດຢູ່ຕາມສາຍທາງ ເມື່ອບໍ່ມີບ່ອນນັ່ງຈຳເປັນຕ້ອງໄດ້ໃຊ້ຕັ່ງເສີມ.
ໂອກາດນີ້, ທ່ານ ວັນເພັງ ສີສຸກ ຍັງໄດ້ຮຽກຮ້ອງມາຍັງຜູ້ໂດຍສາຍທຸກໆທ່ານ ທີ່ຈະເດີນທາງນຳ ສະຖານີຂົນສົ່ງໂດຍສານ ສາຍທາງໄກສາຍໃຕ້-ສາຍຕາງປະເທດພວກເຮົາ ແມ່ນຂໍໃຫ້ມາຂຶ້ນລົງຢູ່ສະຖານີເລີຍ ເພື່ອຮັບປະກັນບໍ່ໃຫ້ມີຫາງສຽງຕ່າງ ເປັນຕົ້ນໄດ້ນັ່ງຕັ່ງເສີມ, ເກັບຄ່າໂດຍສານແພງ, ເຄື່ອງຂອງເສຍຫາຍບໍ່ມີຄົນຮັບຜິດຊອບ ແລະ ອື່ນໆ. ພ້ອມທັງຮຽກຮ້ອງໃຫ້ຜູ້ໂດຍສານ ຕິດຕາມລົດໂດຍສານທີ່ຈະເດີນທາງໄປຕາມສາຍທາງຕ່າງໆ ເນື່ອງຈາກວ່າໄລຍະບຸນປີໃໝ່ ຄາດວ່າຈະມີຜູ້ໂດຍສານມາໃຊ້ບໍລິການຫລາຍ. ສະນັ້ນ, ລົດໂດຍສານບາງທ່ຽວ ຈະບໍ່ອອກຕາມໂມງປົກກະຕິ ລົດເຕັມຄັນໃດແມ່ນຈະອອກໄປເລີຍ, ເຊິ່ງຈະເລີມເປີດສະຖານີໂດຍສານແຕ່ 04:00 ໂມງ ແລະ ປິດ 22:00 ໂມງ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ