• ສະຖານີລົດໄຟລາວ-ຈີນ ເມືອງບໍ່ເຕັນ ໃຫຍ່ເປັນອັນດັບ 2 ຮອງຈາກນະຄອນຫຼວງວຽງຈັນ:

ໂດຍ: Admin Mahason 03 ເມສາ 2019 (10.20 ນ.) Read : 730

     ສະຖານີລົດໄຟລາວ-ຈີນ ຢູ່ເມືອງບໍ່ເຕັນ ແຂວງຫຼວງນໍ້າທາ ແມ່ນສະຖານີທຳອິດຈາກຊາຍແດນປະເທດຈີນເຂົ້າສູ່ປະເທດລາວ ເຊິ່ງມີເນື້ອທີ່ກໍ່ສ້າງອັນກ້ວາງໃຫຍ່ເປັນອັນດັບ 2 ຮອງຈາກສະຖານີລົດໄຟລາວ-ຈີນ ຢູ່ນະຄອນຫຼວງວຽງຈັນ ໂດຍແມ່ນບໍລິສັດລົດໄຟລາວ – ຈີນ ເປັນຜູ້ລົງທຶນກໍ່ສ້າງທັງໝົດໃນເນື້ອທີ່ 20 ເຮັກຕາ.

     ທ່ານ ໂຈ່ຈີ້ລ້ຽງ, ຜູ້ອຳນວຍການໂຄງການກໍ່ສ້າງສະຖານີລົດໄຟ ແລະ ອຸບໂມງ ໄດ້ໃຫ້ສໍາພາດວ່າ : ໃນພື້ນທີ່ກໍ່ສ້າງດັ່ງກ່າວ ແມ່ນໄດ້ແບ່ງອອກເປັນ 13 ສ່ວນ ແລະ 2 ຊ່ອງທາງເພື່ອແລ່ນລົດໂດຍສານເຂົ້າອອກເມືອງ, ເຂດບໍລິການຂົນສົ່ງສິນຄ້າ, ເຂດສາທາລະນະສຸກ, ອູ່ສ້ອມແປງລົດ, ດ່ານຄົນເຂົ້າເມືອງ ແລະ ສິ່ງອໍານວຍຄວາມສະດວກອື່ນໆ.

     ປະຈຸບັນນີ້, ໂຄງການແມ່ນພວມຢູ່ໃນຂັ້ນຕອນການປັບໜ້າດິນບົນເນື້ອທີ່ທັງໝົດ 20 ເຮັກຕາ ເພື່ອໃຫ້ແລ້ວກ່ອນລະດູຝົນທີ່ຈະມາເຖິງນີ້ ແລ້ວ ຈຶ່ງຈະ ເລີ່ມລົງມືກໍ່ສ້າງອາຄານຕ່າງໆ ໃຫ້ ສຳເລັດກ່ອນທ້າຍເດືອນຕຸລາ 2020.

     ທ່ານຍັງໃຫ້ຮູ້ຕື່ມອີກວ່າ : ສະຖານີລົດໄຟລາວ-ຈີນ ເມືອງບໍ່ເຕັນ, ເມື່ອສ້າງສໍາເລັດແລ້ວ ຈະສາມາດຮອງຮັບຜູ້ໂດຍສານເບື້ອງຕົ້ນໄດ້ປະມານຫ້າພັນຄົນຕໍ່ມື້ ແລະ ຈະເພີ່ມປະລິມານຂຶ້ນໄປເລື້ອຍໆ.

     ການກໍ່ສ້າງສະຖານີລົດໄຟລາວ-ຈີນ ກໍ່ຄື ການສ້າງທາງລົດໄຟຈາກເມືອງບໍ່ເຕັນແຂວງຫຼວງນໍ້າທາ ຫາ ນະຄອນຫຼວງວຽງຈັນ, ນອກຈາກຈະຊ່ວຍເຮັດໃຫ້ນັກທ່ອງທ່ຽວຈາກປະເທດຈີນ ເດີນທາງເຂົ້າມາທ່ອງທ່ຽວ ແລະ ປະກອບທຸລະກິດຕ່າງໆຢູ່ປະເທດລາວເຮົາໄດ້ຢ່າງສະດວກສະບາຍຫຼາຍຂື້ນແລ້ວ, ຍັງເຮັດໃຫ້ທຸລະກິດການຂົນສົ່ງລະຫວ່າງປະເທດ ມີຄວາມຄ່ອງຕົວຫຼາຍຂຶ້ນ, ລວມທັງເປັນການສ້າງວຽກເຮັດງານທຳໃຫ້ຄົນພາຍໃນທ້ອງຖິ່ນ ກໍ່ຄື ທົ່ວປະເທດແລ້ວ, ກໍ່ຍັງຊ່ວຍເຮັດໃຫ້ເສດຖະກິດລະຫວ່າງສອງຊາດລາວ-ຈີນນັບມື້ຂະຫຍາຍຕົວຂຶ້ນເທື່ອລະກ້າວ. ພາບ-ຂ່າວ: ວທສ


ທີ່ມາ: ABC Laos News
  • ຮູບພາບ

  • ແທັກທີ່ກ່ຽວຂ້ອງ