• ໄປພັກຜ່ອນຢູ່ສິງກະໂປ ບໍ່ແມ່ນເລື່ອງຍາກອີກຕໍ່ໄປ

ໂດຍ: ສີເປື້ອນມື 02 ເມສາ 2019 (14.53 ນ.) Read : 713

ໃນວັນທີ 01 ເມສາ 2019 ທີ່ຜ່ານມາ ສາຍການບິນສະກູ໊ດ ໄດ້ຈັດງານພົບປະກັບບັນດາສື່ມວນຊົນໃນລາວ ທີ່ຮ້ານ ເບລ ຈີ້ ວຽງຈັນ. ໃຫ້ກຽດເຂົ້າຮ່ວມ ໄດ້ແກ່: ທ່ານ ວິນັອດ ຄານັນ ປະທານເຈົ້າໜ້າທີ່ບໍລິຫານ ຝ່າຍການຄ້າຂອງສະກູ໊ດ ແລະທ່ານ ໂດມີນິກ ໂກ ເອກອັກຄະລັດຖະທູດປະເທດສິງກະໂປ ປະຈໍາ ສປປ ລາວ ພ້ອມດ້ວຍແຂກທີ່ຖືກເຊີນ.

ສະກູ໊ດ (Scoot) ແມ່ນສາຍການບິນລາຄາປະຢັດຂອງກຸ່ມສາຍການບິນສິງກະໂປ (Singapore Airlines) ໃຫ້ບໍລິການຕັ້ງແຕ່ ປີ 2012 ເປັນຕົ້ນມາ, ສາມາດນໍາຜູ້ໂດຍສານຫຼາຍກວ່າ 60 ລ້ານຄົນໄປສູ່ຈຸດໝາຍປາຍທາງແຫ່ງຕ່າງໆ ໄດ້ເປີດຖ້ຽວບິນຮອບປະຖົມມະເລີກເສັ້ນທາງຈາກລາວໄປຫາສິງກະໂປ ຖືວ່າເປັນການເລີ່ມຕົ້ນໃຫ້ບໍລິການ 3 ຖ້ຽວບິນຕໍ່ອາທິດຈາກນະຄອນຫຼວງວຽງຈັນ ແລະນະຄອນຫຼວງພະບາງ ຫາ ປະເທດສິງກະໂປ (ວັນຈັນ, ພະຫັດ ແລະເສົາ) ເຊິ່ງໃຫ້ບໍລິການດ້ວຍເຮືອບິນ 787 ດຼີມລາຍເນີ ແລະຮຸ້ນ ແອບັດ A320 ເສັ້ນທາງລະຫວ່າງສິງກະໂປ ຫານະຄອນຫຼວງວຽງຈັນ, ນະຄອນຫຼວງພະບາງ ແລະອື່ນໆ 67 ປາຍທາງ ໃນ 19 ປະເທດ. ນອກນັ້ນ, ຍັງມີແຜນທີ່ຈະເພີ່ມເຄືອຂ່າຍອີກ 15 ຈຸດໝາຍປາຍທາງຈາກອິນເດຍ, ຈີນ, ມາເລເຊຍ ແລະອິນໂດເນເຊຍ ໃນປີ 2020.

ທ່ານ ວິນັອດ ຄານັນ, ປະທານເຈົ້າໜ້າທີ່ບໍລິຫານຝ່າຍການຄ້າຂອງສະກູ໊ດ ໄດ້ກ່າວວ່າ: ພວກເຮົາເວລາໃດ ກໍຢາກນຳເອົາການທ່ອງທ່ຽວທີ່ບໍ່ແພງມາໃຫ້ຫຼາຍໆຄົນ ຄຽງຄູ່ກັບການສ້າງປະສົບການທ່ອງທ່ຽວທີ່ພິເສດເພື່ອລູກຄ້າຂອງພວກເຮົາ. ດ້ວຍເຫດນີ້ ພວກເຮົາຈຶ່ງມີຄວາມຕື່ນເຕັ້ນທີ່ຈະຂະຫຍາຍການບໍລິການມາສູ່ລາວ ເຊິ່ງເປັນປະເທດທີ່ຂຶ້ນຊື່ເລື່ອງທິວທັດ, ປະຫວັດສາດ ແລະ ວັດທະນະທຳທີ່ໜ້າຫຼົງໄຫຼ.

 

ທ່ານ ໂດມິນິກ ໂກ, ເອກອັກຄະລັດຖະທູດປະເທດສິງກະໂປ ປະຈຳ ສປປ ລາວ ໄດ້ກ່າວວ່າ: ຂ້າພະເຈົ້າເຊື່ອໝັ້ນວ່າລາຄາປີ້ຖ້ຽວບິນທີ່ບໍ່ແພງ ແລະການບໍລິການທີ່ມີຄຸນນະພາບຂອງສະກູ໊ດຈະຊ່ວຍສົ່ງເສີມດ້ານທຸລະກິດ ແລະການທ່ອງທ່ຽວລະຫວ່າງສິງກະໂປ ແລະລາວພວກເຮົາຫວັງວ່າຄົນສິງກະໂປ ຈະໃຊ້ປະໂຫຍດຈາກຖ້ຽວບິນເສັ້ນທາງນີ້ເພື່ອຄົ້ນຫາວ່າປະເທດລາວມີຫຍັງແນ່. ໃນທາງກົງກັນຂ້າມ, ຄົນລາວ ແລະຄົນຕ່າງປະເທດທີ່ເຮັດວຽກຢູ່ລາວກໍຈະມີຄວາມສະດວກສະບາຍຫຼາຍກວ່າເກົ່າໃນການໃຊ້ເວລາທ້າຍອາທິດ ຫຼືມື້ພັກຜ່ອນຍາວຢູ່ສິງກະໂປ.

 

ສະກູ໊ດ ຕິດ 10 ອັນດັບ ຂອງການເປັນສາຍການບິນລາຄາປະຢັດທີ່ສຸດໃນໂລກໃນປີ 2015 ແລະ2018 ໂດຍສະກາຍແທັກ. ສໍາລັບລາຄາຖ້ຽວບິນເລີ່ມຕົ້ນຂອງຊັ້ນປະຢັດ (Economy FLY) ຈາກນະຄອນຫຼວງວຽງຈັນ ຫາ ສິງກະໂປ ແມ່ນ 75$ ແລະຈາກນະຄອນຫຼວງພະບາງ ຫາ ສິງກະໂປ ແມ່ນ 65$. ສອບຖາມຂໍ້ມູນເພີ່ມຕື່ມ ໄດ້ທີ່: FlyScoot.com


ທີ່ມາ:
  • ຮູບພາບ