• ຮອງນາຍົກເນັ້ນ ຍທຂ ຕ້ອງໃຊ້ງົບໃຫ້ຖືກເປົ້າໝາຍຫຼີກເວັ້ນງົບທີ່ບໍ່ຈຳເປັນ

ໂດຍ: Admin Mahason 01 ເມສາ 2019 (14.46 ນ.) Read : 200

     ໃນໂອກາດທີ່ທ່ານ ສົມດີ ດວງດີ ຮອງນາຍົກລັດຖະມົນຕີ,ລັດຖະມົນຕີກະຊວງການເງິນໃຫ້ກຽດເຂົ້າຮ່ວມກອງປະຊຸມໂຍທາທິການ ແລະຂົນສົ່ງ (ຍທຂ) ທົ່ວປະເທດປະຈຳປີ 2018 ວັນທີ 29 ມີນາ 2019, ທີ່ຫໍປະຊຸມແຫ່ງຊາດ, ທ່ານກໍໄດ້ມີຄຳເຫັນຕໍ່ບັນຫາທີ່ຍັງຄົງຄ້າງ, ພ້ອມດຽວກັນນັ້ນກໍຍັງໃຫ້ທິດຊີ້ນຳຫຼາຍບັນຫາຕື່ມໂດຍສະເພາະທີ່ນອນໃນວຽກການຊົມໃຊ້ງົບປະມານໃຫ້ຖືກຕາມເປົ້າໝາຍເພື່ອໃຫ້ມີປະສິດທິພາບ ແລະຫຼີກເວັ້ນການໃຊ້ງົບທີ່ບໍ່ຈຳເປັນ, ເອົາໃຈໃສ່ປະຕິບັດ 5 ໜ້າທີ່ມະຫາພາກຂອງກະຊວງ ແລະຖືສຳຄັນຫາງສຽງຂອງສັງຄົມໃນການແກ້ໄຂບັນຫາແນໃສ່ການຕີຖອຍຄວາມບໍ່ເຊື່ອໝັ້ນຂອງສັງຄົມ.

     ທ່ານ ສົມດີ ດວງດີ ກ່າວວ່າ: ຜ່ານການຮັບຟັງການສະຫຼຸບລາຍງານຂອງທ່ານລັດຖະມົນຕີ ຍທຂ ເຫັນວ່າໃນໄລຍະ 2 ປີ 2017-2018 ທີ່ຜ່ານມາກະຊວງໄດ້ສູ້ຊົນປະຕິບັດໜ້າທີ່ວຽກງານຂອງຕົນທີ່ປະເທດຊາດ ແລະປະຊາຊົນໄດ້ມອບໝາຍໃຫ້ໄດ້ສຳເລັດຜົນສົມກັບທີ່ເປັນຂະແໜງການປາຍແຫຼມຂອງການພັດ ທະນາເສດຖະກິດແຫ່ງຊາດ, ອັນໄດ້ປະກອບສ່ວນທີ່ສຳຄັນເຂົ້າໃນການພັດທະນາເສດຖະກິດ-ສັງຄົມ ແລະລົບລ້າງ ຄວາມທຸກຍາກຂອງປະຊາຊົນບັນດາເຜົ່າ ໃຫ້ໝົດໄປເປັນກ້າວໆແຕ່ເພື່ອເຮັດໃຫ້ການປະກອບສ່ວນຂອງຂະແໜງການ ໂຍທາທິການ ແລະຂົນສົ່ງເຂົ້າໃນການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ຂອງລັດຖະບານໃຫ້ໄດ້ຮັບ ຜົນດີກວ່າເກົ່າກະຊວງຍັງຈະຕັ້ງສືບຕໍ່ປັບປຸງ ແລະເອົາໃຈ່ໃສ່ຕື່ມເປັນຕົ້ນການ ແກ້ໄຂ 19 ບັນຫາທີ່ຍັງຄົງຄ້າງຂອງຂະແໜງການ ຍທຂ ໂດຍສະເພາະສືບຕໍ່ຄົ້ນຄວ້າເບິ່ງວ່າວິທີການແກ້ໄຂບັນຫາຕ່າງໆດັ່ງກ່າວຜ່ານມານັ້ນຖືກຕ້ອງແລ້ວບໍ່? ແນໃສ່ວາງບາດກ້າວແກ້ໄຂບັນ ຫາໃນຕໍ່ໜ້າໃຫ້ໝົດໄປເທື່ອລະກ້າວ ແລະຮ່າງຄໍາສັ່ງຂອງນາຍົກລັດຖະມົນຕີວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງໂຄງການລົງທຶນຂອງລັດກ່ຽວ ກັບວຽກງານການກໍ່ສ້າງ ແລະສ້ອມແປງ ຂົວທາງ ເພາະຄຳສັ່ງດັ່ງກ່າວຈະເປັນພື້ນຖານທີ່ສຳຄັນໃນການແກ້ໄຂບັນຫາການກໍ່ສ້າງມີລາຄາສູງຄຸນນະພາບຕ່ຳ ແລະ ແກ່ຍາວເວລາການກໍ່ສ້າງໃນຂະແໜງການຂອງ ຍທຂ ໃຫ້ໝົດໄປໃນຕໍ່ໜ້າ.

ພ້ອມນັ້ນ ທ່ານ ສົມດີ ດວງດີ ຍັງເນັ້ນຕື່ມເພື່ອເປັນທິດທາງ ແລະວິທີການໃຫ້ກະຊວງນຳໄປຄົ້ນຄວ້າຕື່ມຕົ້ນຕໍແມ່ນ:

1 ຕ້ອງສືບຕໍ່ສຸມໃສ່ສຶກສາອົບຮົມວຽກ ງານການເມືອງ-ແນວຄິດໃຫ້ບັນດາພະ ນັກງານ-ລັດຖະກອນໃຫ້ຫຼາຍຂຶ້ນກວ່າ ເກົ່າ ແລະເປັນປົກກະຕິ, ແທດເໝາະກັບ ເປົ້າໝາຍແນໃສ່ສ້າງພະນັກງານ-ສະມາຊິກພັກທັງໝົດມີທັດສະນະຫຼັກໝັ້ນການເມືອງອັນໜັກແໜ້ນ, ມີຄວາມເປັນເອກະພາບກັບແນວທາງນະໂຍບາຍຂອງພັກ;

2 ກະຊວງ ຍທຂ ຕ້ອງປະຕິບັດ 5 ໜ້າ ທີ່ມະຫາພາກຄື: ການຕິດຕາມກວດກາ ການຈັດຕັ້ງປະຕິບັດບັນດານິຕິກຳ, ການປະຕິບັດວຽກງານຂອງຂະແໜງ ຍທຂ ຢູ່ທ້ອງຖິ່ນໂດຍສຶກສາຄົ້ນຄວ້າ ແລະນຳ ໃຊ້ວິທະຍາສາດ-ວິທະຍາການ ແລະເຕັກ ໂນໂລຊີໃໝ່ໆເຂົ້າໃນຂະແໜງການຂອງ ຕົນໃຫ້ຫຼາຍຂຶ້ນແນໃສ່ຍົກສູງສະມັດຕະພາບຂອງວຽກງານໃຫ້ມີຄວາມວ່ອງໄວ, ທັນສະໄໝ, ປະຢັດງົບປະມານ ແລະໂປ່ງໃສສາມາດກວດສອບໄດ້.

3 ສຳລັບການກຳນົດແຜນພັດທະນາການກໍ່ສ້າງຂົວທາງໃນໄລຍະຍາວແມ່ນໃຫ້ສືບຕໍ່ປະສານສົມທົບກັບກະຊວງແຜນການ ແລະການລົງທຶນເພື່ອໃຫ້ເຂົ້າກັບແຜນພັດທະນາເສດຖະກິດ-ສັງຄົມແຫ່ງຊາດ ແລະສອດຄ່ອງກັບແຜນພັດທະນາແຕ່ລະຂົງເຂດ, ແນໃສ່ເຮັດໃຫ້ການລົງທຶນໃສ່ການກໍ່ສ້າງຂົວທາງຕ້ອງຮັບໃຊ້ໃຫ້ແກ່ການຜະລິດເປັນສິນຄ້າ ແລະຮັບໃຊ້ໃຫ້ແກ່ການພັດທະນາເສດຖະກິດ-ສັງຄົມຂອງຊາດ, ການເຊື່ອມໂຍງກັບພາກພື້ນ ແລະສາກົນ

4 ເອົາໃຈໃສ່ຢ່າງຈິງຈັງ ແລະ ປະຕິບັດຢ່າງເຂັ້ມງວດເປັນປະຈໍາໃນວຽກງານກວດສອບ-ກວດກາ ໂດຍສະເພາະແມ່ນວຽກງານກວດກາໂຄງການແຕ່ຫົວທີ່ເພາະຂະແໜງ ຍທຂ ແມ່ນຂະ ແໜງພັດທະນາພື້ນຖານໂຄງລ່າງຂອງ ປະເທດ ຊຶ່ງນໍາໃຊ້ງົບປະມານຂອງລັດ ຖະບານເປັນຈຳນວນສ່ວນຫຼາຍໃນແຕ່ລະ ປີ;

5 ໃຫ້ຖືສໍາຄັນຫາງສຽງຂອງສັງຄົມ ກໍຄືປະຊາຊົນທີ່ຜ່ານສາຍດ່ວນສະພາ ແຫ່ງຊາດ, ສາຍດ່ວນລັດຖະບານ ແລະ ສາຍດ່ວນຂອງກະຊວງ ຍທຂ ເພື່ອນໍາມາພິຈາລະນາຄົ້ນຄວ້າ, ກວດກາ ແລະ ແກ້ໄຂໃຫ້ທັນກັບສະພາບການເພາະປະຈຸບັນສື່ສັງຄົມອອນລາຍມີອິດຕິພົນຫຼາຍສົມຄວນໃນສັງຄົມ;

6 ໃຫ້ສືບຕໍ່ເອົາໃຈໃສ່ ແລະໃຫ້ຖືສໍາຄັນຕື່ມກ່ຽວກັບພາວະການປ່ຽນແປງຂອງສະພາບອາກາດໃນປະຈຸບັນຊຶ່ງຕ້ອງໄດ້ຄົ້ນຄວ້າວິເຄາະວິໄຈ ແລະຊອກຫາວິທີທາງໃນການຮັບມືໃຫ້ທັນການເພື່ອບໍ່ໃຫ້ເກີດຜົນເສຍຫາຍອັນໃຫຍ່ຫຼວງໃຫ້ແກ່ຊີວິດ ແລະຊັບສິນຂອງຊາດກໍ່ຄືຂອງປະຊາຊົນລາວບັນດາເຜົ່າ.


ທີ່ມາ: ຟັງຂ່າວ99
  • ແທັກທີ່ກ່ຽວຂ້ອງ