• ເຂົ້າໜົມຖົງ ກັບໂພຊະນາການຂອງເດັກ

ໂດຍ: Admin Mahason 21 ພະຈິກ 2017 (11.09 ນ.) Read : 730

ເດັກມັກເຂົ້າໜົມບໍ່ຕ່າງຫຍັງກັບຂອງຫຼິ້ນ ຈາກຜົນການສຳຫຼວດພົບວ່າ ເດັກອາຍຸແຕ່ 3-5ປີ ໄດ້ຮັບພະລັງງານຈາກອາຫານຫວ່າງ ແລະເຂົ້າໜົມຫຼາຍເກີນຄວາມຈຳເປັນເຮັດໃຫ້ຮ່າງກາຍໄດ້ຮັບສານອາຫານຈາກອາຫານຄາບຫຼັກຫຼຸດລົງ.

ເຂົ້າໜົມທີ່ເດັກນ້ອຍນິຍົມມີສ່ວນປະສົມຈາກແປ້ງຂັດຂາວ, ເກືອ, ນໍ້າຕານໃນປະລິມານສູງ ເຮັດໃຫ້ສ່ຽງຕໍ່ການເປັນໂລກຕຸ້ຍ, ແຂ້ວແມງ,​ ຂາດສານອາຫານ ແລະອື່ນໆເພີ່ມຂຶ້ນຢ່າງຫຼວງຫຼາຍ ມີແມ່ຫຼາຍຄົນຍອມຮັບວ່າ ລູກຂອງຕົນກິນເຂົ້າໜົມຕາງເຂົ້າ ແລະຈະອາລະວາດຫາກມື້ໃດບໍ່ໄດ້ຊື້ເຂົ້າໜົມຢູ່ໂຮງຮຽນ.

ນັກໂພຊະນາການອາຫານສຳລັບເດັກໃຫ້ຄຳແນະນຳແນວທາງປະຕິບັດສຳລັບພໍ່ແມ່ວ່າ:

- ເດັກຄວນໄດ້ຮັບອາຫານຄາບຫຼັກ 3ຄາບຕໍ່ວັນ ແລະດື່ມນົມວັນລະ 2-3ຈອກ ຫາກພວກເຂົາຮັບປະທານອາຫານຫຼັກອີ່ມແລ້ວກໍຈະຫຼຸດຜ່ອນການກິນເຂົ້າໜົມຈຸກຈິກລົງ

- ສຳລັບອາຫານຫວ່າງຂອງເດັກ ຄວນຮັບປະທານບໍ່ເກີນ 2 ຄັ້ງຕໍ່ວັນ ໂດຍໃຫ້ພະລັງງານບໍ່ເກີນ 10% ຂອງພະລັງງານທີ່ຄວນໄດ້ຮັບຕໍ່ວັນ ຕົວຢ່າງເດັກອາຍຸ 2-5ປີ ຕ້ອງການພະລັງງານ 1000-1300 Kcl ຄວນໄດ້ຮັບພະລັງງານຈາກຂອງຫວ່າງປະມານ 100-130 Kcl, ແລະໃຫ້ຂອງຫວ່າງຫຼັງອາຫານຄາບຫຼັກຢ່າງໜ້ອຍ 1ຊົ່ວໂມງ

- ອາຫານຫວ່າງທີ່ຄວນມີຕິດຄົວເຮືອນຄື ນົມຈືດ, ໝາກໄມ້ສົດ, ເຂົ້າໜົມ ຫຼືຄຸກກີ້ຈາກທັນຍະພືດ.

- ຫຼີກລ້ຽງການຕຸນອາຫານທີ່ບໍ່ມີປະໂຫຍດໄວ້ໃນຕູ້ເຢັນເຊັ່ນ: ເຂົ້າໜົມຖົງ, ນ້ຳອັດລົມ, ເຂົ້າໜົມອົມ, ກະແລັມ...

- ຫຼີກລ້ຽງການໃຫ້ເຂົ້າໜົມ ຫຼືຂອງກິນຫຼິ້ນຈຸກຈິກເປັນລາງວັນສຳລັບເດັກ.

- ຢ່າລືມນຳນ້ຳສະອາດ, ແອັບເປິ້ນ ຫຼືນົມກ໋ອງນ້ອຍໆໃສ່ກະເປົ໋າໃຫ້ລູກໄປໂຮງຮຽນທຸກໆມື້ ເພື່ອຫຼຸດຜ່ອນການຊື້ເຂົ້າໜົມຈຸກຈິກ ວິທີນີ້ເດັກບາງຄົນອາດບໍ່ພໍໃຈເທົ່າໃດ

ສະນັ້ນ, ທ່ານຄ່ອຍໆປັບດັດ ແລະໂອ້ລົມກັບລູກ ຢ່າໃຊ້ວິທີຫັກດິບຫ້າມລູກກິນເຂົ້າໜົມທັນທີ ແຕ່ທາງທີ່ດີທ່ານຄວນເຝິກລູກມາຕັ້ງແຕ່ຕອນຍັງນ້ອຍໆ ບັນຫານີ້ອາດເປັນສິ່ງທີ່ພໍ່ແມ່ຫຼາຍຄົນຄິດວ່າເປັນເລື່ອງເລັກນ້ອຍ ແຕ່ຄວາມຈິງແລ້ວໂພຊະນາການສຳລັບເດັກເປັນສິ່ງທີ່ສຳຄັນຫຼາຍໃນໄລຍະທີ່ພວກເຂົາພວມຈະເລີນເຕີບໂຕຢ່າງວ່ອງໄວ, ເປັນດັ່ງໂຕກຳນົດຊະຕາກຳສຸຂະພາບຂອງພວກເຂົາໃນອະນາຄົດ ຫາກທ່ານຍັດອາຫານຂີ້ເຫຍື້ອເຂົ້າປາກລູກ ຖືວ່າທ່ານໄດ້ເພີ່ມໂອກາດໃຫ້ໂລກໄພເຂົ້າມາໃກ້ໂຕພວກເຂົາຫຼາຍຂຶ້ນ ແຕ່ຫາກທ່ານຍັດອາຫານທີ່ມີປະໂຫຍດໃສ່ປາກລູກຈົນເປັນອາຈີນພວກເຂົາກໍຈະມີສຸຂະພາບຮ່າງກາຍ ແລະມັນສະໝອງທີ່ແຂງແຮງສົມບູນ ທັງໝົດທັງມວນນັ້ນເປັນສິ່ງທີ່ພໍ່ແມ່ສາມາດເລືອກໄດ້.



ທີ່ມາ:
  • ແທັກທີ່ກ່ຽວຂ້ອງ