• ພົບສານປົນເປື້ອນໃນພືດຜັກ-ໝາກໄມ້ ທີ່ຕະຫຼາດສະຫວັນໄຊ

ໂດຍ: ສີເປື້ອນມື 28 ມີນາ 2019 (09.51 ນ.) Read : 155

ຈາກການເກັບຕົວຢ່າງ ແລະນໍາມາວິໄຈ ຈໍາພວກພືດ, ຜັກ ແລະໝາກໄມ້ ຈໍານວນ 20 ກວ່າຕົວຢ່າງໄດ້ປະກົດວ່າ: ພົບສານປົນເປື້ອນ ແລະຕົກຄ້າງໃນລະດັບທີ່ບໍ່ປອດໄພ ເປັນຈໍານວນຫລາຍເປັນຕົ້ນແມ່ນ: ໃນຫົວຂີງໃຫຍ່, ຜັກໜອກ, ຜັກບົ່ວ, ຜັກຕັງໂອ, ຜັກຫອມປ້ອມ, ໝາກແຕງ, ສາລີນ້ອຍ, ໝາກຖົ່ວຍາວ, ໝາກເລັ່ນ, ໝາກນາວ, ໝາກໂມ, ໝາກກ້ຽງ ແລະໝາກມ່ວງນໍ້າດອກໄມ້ ເຊິ່ງພາຍຫຼັງທີ່ເຈົ້າໜ້າທີ່ກ່ຽວຂ້ອງປະກອບມີ: ພະແນກກະສິກໍາ ແລະປ່າໄມ້ແຂວງ ສະຫວັນນະເຂດ, ສາທາລະນະສຸກແຂວງ ສະຫວັນນະເຂດ, ອຸດສາຫະກໍາ ແລະການຄ້າແຂວງ ສະຫວັນນະເຂດ ໂດຍຮ່ວມກັນລົງກວດກາ ແລະວິໄຈກັບ ທີ່ຕໍ່ພືດຜັກ-ໝາກໄມ້ທີ່ນໍາມາຂາຍ ທີ່ຕະຫລາດປະເພດພືດຜັກ ທີ່ປະຊາຊົນປູກພາຍໃນແຕ່ລະທ້ອງຖິ່ນ ແລະນໍາເຂົ້າຈາກປະເທດເພື່ອນບ້ານໃນວັນທີ 22 ມີນາ 2019 ທີ່ຜ່ານມານີ້.
      ສໍາລັບຜົນຂອງການກວດກາ ແລະວິໄຈປະເພດອາຫານແຊ່ແຂງທີ່ເປັນການນໍາເຂົ້າຈາກປະເທດເພື່ອນບ້ານແມ່ນມີຄວາມປອດໄພ ສາມາດບໍລິໂພກໄດ້ຕາມຄວາມຕ້ອງການ (ບໍ່ພົບສານຟໍມາລິນ) ພາຍ ຫຼັງມີການວິໄຈດ້ວຍການແຊ່ນໍ້າຢາໃຊ້ເວລາ 3-5 ນາທີ ໃນຈໍານວນ16 ຕົວຢ່າງ ໃນຈໍາພວກ: ປາມຶກສົດ, ປາມຶກແຫ້ງ, ປາທູ, ກຸ້ງ, ໄສ້ໝູ, ເຫືອກ, ໄກ່ ແຊ່ແຂງ, ກະປິ.
      ວິຊາການທ່ານໜຶ່ງ ຈາກຂະແໜງປູກຝັງ ພະແນກກະສິກໍາ ແລະປ່າໄມ້ ແຂວງ ສະຫວັນນະເຂດ ໄດ້ໃຫ້ສໍາພາດວ່າ:ໃນການລົງມາກວດກາ ແລະວິໄຈ ຕໍ່ກັບພືດຜັກ ແລະໝາກໄມ້ ທີ່ຂາຍຢູ່ພາຍໃນຕະຫລາດສະຫວັນໄຊ ໃນຄັ້ງນີ້ປະກົດວ່າພົບສານປົນເປື້ອນທີ່ຕົກຄ້າງໃນລະດັບທີ່ບໍ່ປອດໄພເປັນຈໍານວນຫຼາຍຊະນິດຂອງພືດຜັກ ແລະໝາກໄມ້ ເຊິ່ງໜ້າຕົກໃຈຫຼາຍ ໂດຍຕົວສານດັ່ງກ່າວນີ້ ຖ້ານໍາໄປບໍລິໂພກສະສົມເປັນເວລາດົນ ມັນກໍຈະໃຫ້ເກີດເປັນໂລກມະເຮັງໄດ້. ສິ່ງທີ່ຕ້ອງປະຕິບັດ ເພື່ອປ້ອງກັນຄື: ຜູ້ທີ່ນໍາໄປບໍລິໂພກຄວນລ້າງ ແລະແຊ່ນໍ້າເກືອໃຫ້ດົນ ພ້ອມທັງປ່ອຍໃຫ້ນໍ້າໄຫຼຜ່ານພືດຜັກຕະຫລອດຈົນກວ່າເຮົາຈະໝັ້ນໃຈ. ນອກນັ້ນ, ຮຽກຮ້ອງຜູ້ທີ່ຊື້ຊອກຮູ້ແຫລ່ງທີ່ມາຂອງການປູກພືດເສຍກ່ອນຈະເປັນການດີ.


ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ