• ຍຶດຊີ້ນໝູຜິດກົດໝາຍໄດ້ອີກແລ້ວ 5.400 ກິໂລກຣາມ

ໂດຍ: Admin Mahason 27 ມີນາ 2019 (11.39 ນ.) Read : 489

     ພາຍຫຼັງທີ່ມີການລະບາດຂອງອະຫິວາໝູອາຟຣິກາ ຢູ່ສປ ຈີນ ແລະ ສສ ຫວຽດນາມ. ສະນັ້ນ, ເພື່ອເປັນການສະກັດກັ້ນ ແລະ ປ້ອງກັນບໍ່ໃຫ້ພະຍາດດັ່ງກ່າວແຜ່ລາມເຂົ້າສູ່ ສປປລາວ ລັດຖະມົນຕີ ກະຊວງ ກະສິກຳ ແລະ ປ້າໄມ້ ຈຶ່ງໄດ້ອອກແຈ້ງການ ຫ້າມນໍາໝູ, ຜະລິດຕະພັນໝູທຸກຊະນິດ ລວມທັງຜະລິດຕະພັນປຸງແຕ່ງເບື້ອງຕົ້ນຈາກສປຈີນ ແລະ ສສ ຫວຽດນາມ ເຂົ້າສູ່ ສປປລາວ.

     ເພື່ອເປັນການປ້ອງກັນ ແລະ ເຂັ້ມງວດໃນການສະກັດກັ້ນການນຳເຂົ້າໝູ ຈາກຕ່າງປະເທດ ເຂົ້າສູ່ ສປປ ລາວ ຫຼາຍໆພື້ນທີ່ໂດຍສະເພາະແຂວງທີ່ມີຊາຍແດນຕິດຈອດກັບຈີນ ແລະ ຫວຽດນາມ ຍິ່ງຕ້ອງເພີ່ມຄວາມລະມັດລະວັງ ແລະ ເອົາໃຈໃສ່ເປັນພິເສດເຊັ່ນດຽວກັນກັບ ແຂວງຫຼວງນໍ້າທາກໍ່ໄດ້ເອົາໃຈໃສ່ຕິດຕາມກວດກາຢ່າງເຂັ້ມງວດ ໂດຍສະເພາະແມ່ນຢູ່ຕາມດ່ານຊາຍແດນທີ່ຕິດກັບ ສປຈີນ ເຊັ່ນ:

     ດ່ານສາກົນບໍ່ເຕ່ນ, ດ່ານປາກໄຮ່ ແລະ ດ່ານທ້ອງຖິ່ນບ້ານປາກມ່ອມ ໄດ້ຕິດຕາມ ແລະ ບໍ່ອະນຸຍາດໃຫ້ນຳເຂົ້າໝູ ແລະ ຜະລິດຕະພັນໝູທຸກຊະນິດ ລວມທັງຜະລິດຕະພັນປຸງແຕ່ງເບື້ອງຕົ້ນນໍາຈຳໜ່າຍ ຫຼື ຕິດຕົວຜູ້ໂດຍສານ ຫຼື ຜູ້ທີ່ເດີນທາງເຂົ້າມາລາວ ມາບໍລິໂພກສ່ວນຕົວ ຫຼື ໃນຄອບຄົວຢ່າງເດັດຂາດ.

     ຫຼ້າສຸດໃນວັນທີ 24 ມີນາ 2019 ເຈົ້າໜ້າທີ່ສັດຕະວະແພດ ພະແນກກະສິກຳ ແລະ ປ່າໄມ້ແຂວງຫຼວງນໍ້າທາ ທີ່ປະຈຳການຢູ່ດ່ານສາກົນບໍ່ເຕ່ນ ໄດ້ກວດພົບລົດຕ້ອງສົງໄສ ໝາຍເລກທະບຽນ ບກ ຫຼວງນໍ້າທາ 0725 ເຈົ້າໜ້າທີ່ຈິ່ງໄດ້ກວດຄົ້ນພົບເຫັນຊີ້ນໝູ ແລະ ຜະລິດຕະພັນໝູແຊ່ແຂງ ຈຳນວນ 200 ເປົາ ຫຼື ປະມານ 5.400 ກິໂລກຣາມ ຈາກນັກທຸລະກິດຜູ້ປະກອບການຄ້າຂາຍຊີ້ນໝູ ຊາວຈີນ ເປົ້າໝາຍແມ່ນນຳໄປຈຳໜ່າຍຢູ່ໃນນະຄອນຫຼວງວຽງຈັນ ຈຶ່ງຖືກເຈົ້າໜ້າທີ່ຢຶດ ແລ້ວແຈ້ງໃຫ້ເຈົ້າໜ້າທີ່ກ່ຽວຂ້ອງດຳເນີນໃນຂັ້ນຕອນຕໍ່ໄປ.

     ຈາກນັ້ນ, ໃນວັນທີ 25 ມີນາ 2019 ພະແນກກະສິກຳ ແລະ ປ່າໄມ້ ຮ່ວມກັບເຈົ້າໜ້າທີ່ປະຈໍາດ່ານສາກົນບໍ່ເຕ່ນ ແລະ ພາກສ່ວນທີ່ກ່ຽວຂ້ອງໄດ້ຈັດພິທີທຳລາຍຊີ້ນໝູ ແລະ ຜະລິດຕະພັນໝູທີ່ຢຶດໄດ້ ຈຳນວນ 5.400ກິໂລ ມູນຄ່າ 81 ລ້ານກີບ ຂຶ້ນຢູ່ທີ່ເຂດເສດຖະກິດພິເສດບໍ່ເຕັນ ໂດຍມີ ທ່ານ ເຈີ່ ສັນຕິສຸກ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ, ທ່ານ ຄໍາແພງ ພະນາວັນ ຫົວໜ້າຂະ ແໜງລ້ຽງສັດ ແລະ ການປະມົງ, ເຈົ້າໜ້າທີ່ປະຈຳການດ່ານສາກົນບໍ່ເຕ່ນ ພ້ອມພະນັກງານວິຊາການພາກສ່ວນທີ່ກ່ຽວຂ້ອງເຂົ້າຮ່ວມ.

     ທ່ານ ຄຳແພງ ພະນາວັນ ໄດ້ໃຫ້ຮູ້ວ່າ: ການຢຶດໄດ້ຊີ້ນໝູ ແລະ ຜະລິດຕະພັນໝູແຊ່ແຂງ ຈາກນັກທຸລະກິດຊາວຈີນ ທີ່ຫວັງມາຈຳໜ່າຍໃນ ສປປ ລາວ ຄັ້ງນີ້ ແມ່ນເປັນການລະເມີດຕໍ່ກັບການຫ້າມນໍາເຂົ້າໝູ, ຜະລິດຕະພັນໝູທຸກຊະນິດລວມທັງຜະລິດຕະພັນເບື້ອງຕົ້ນຈາກ ສປຈີນ ແລະ ສສ ຫວຽດນາມເຂົ້າສູ່ ສປປລາວ ເຊິ່ງພວກເຮົາໄດ້ມີການກ່າວຕັກເຕືອນຜູ່ກ່ຽວທີ່ໄດ້ລ່ວງລະເມີດ ແລະ ເຮັດບົດບັນທຶກ ຫາກລະເມີດໃນຄັ້ງຕໍ່ໄປກໍ່ຈະມີການລົງໂທດຕາມລະບຽບກົດໝາຍ.

     ພ້ອມນັ້ນ, ທ່ານກໍ່ຍັງຮຽກຮ້ອງເຖິງຜູ້ປະກອບການ ແລະ ນັກທຸລະກິດຫ້າມນໍາເຂົ້າໝູ ແລະ ຜະລິດຕະພັນໝູຈາກສປຈີນ ເພື່ອເປັນການປ້ອງກັນ ແລະ ສະກັດກັ້ນບໍ່ໃຫ້ພະຍາດອະຫິວາໝູອາຟຣິກາແຜ່ລະບາດເຂົ້າສູ່ ສປປລາວຢ່າງເດັດຂາດ.


ທີ່ມາ: ຟັງຂ່າວ99
  • ຮູບພາບ

  • ແທັກທີ່ກ່ຽວຂ້ອງ