• ຈໍລະເຂ້ ຫວັງຄອງຕະຫຼາດວັດສະດຸກໍ່ສ້າງໃນລາວ

ໂດຍ: ສີເປື້ອນມື 25 ມີນາ 2019 (15.44 ນ.) Read : 191

ໃນວັນທີ 21 ມີນາ 2019 ຜ່ານມາ ໄດ້ຈັດພິທີເປີດຫ້ອງການຂອງບໍລິສັດ JORAKAY CORPORATION ຜູ້ຜະລິດ ແລະຈຳໜ່າຍສິນຄ້າ, ຊີມັງກາວຢາແນວ ເຄມີພັນ ຄັນເລີຊີເມັນ ແລະວັດສະດຸຕົບແຕ່ງ ປະຈຳ ສ ປປ ລາວ ຢ່າງເປັນທາງການ ທີ່ບ້ານ ທ່າພະລາດໄຊ ເມືອງ ສີສັດຕະນາກ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມງານໄດ້ແກ່: ທ່ານ ໂຍທິນ ຍະມົນຍົງ ຜູ້ຊ່ວຍກໍາມະການຜູ້ຈັດການໃຫຍ່ຝ່າຍຂາຍ ຈໍລະເຂ້ ຄອບເປີເລຊັ່ນ ຈຳກັດ ຜູ້ນຳໃນການຜະລິດ ແລະຈຳໜ່າຍສິນຄ້າວັດຕະກຳ ເພື່ອງານກໍ່ສ້າງ ສ້ອມແປງ ແລະຕົບແຕ່ງ ຍີ່ຫໍ້ ຈໍລະເຂ້, ທ່ານ ຍານີ ສີມີໄຊ ອັກຄະລະຖະທູດ ທີ່ປຶກສາຝ່າຍການພານິດ, ທ່ານ ວິກິດ ກັນສາຍ ຜູ້ອຳນວຍການຝ່າຍຂາຍຜູ້ແທນຈຳໜ່າຍ, ທ່ານ ນໍລະວີ ເສດຖິ່ນ ຜູ້ອຳນວຍການຝ່າຍສື່ສານການຕະຫຼາດ.

    ທ່ານ ໂຍທິນ ຍະມົນຍົງ ໄດ້ກ່າວວ່າ: ປັດຈຸບັນ ບໍລິສັດມີແຜນຈະບຸກຕະຫຼາດວັດສະດຸກໍ່ສ້າງ ໃນ ອາຊີຕາເວັນອອກສ່ຽງໃຕ້, ໂດຍກ່ອນໜ້ານີ້ໄດ້ເປີດສຳນັກງານຫຼັກຢູ່ທີ່ເມືອງ ຢ່າງກຸ້ງ ປະເທດ ມຽນມາ. ສ່ວນການເປີດສຳນັກງານທີ່ນະຄອນຫຼວງວຽງຈັນ ປະເທດລາວ ໃນຄັ້ງນີ້ ເນື່ອງຈາກຊ່ວງຫຼາຍປີທີ່ຜ່ານມາ  ບໍລິສັດ  ຈໍລະເຂ້ ໄດ້ເຂົ້າມາເຮັດຕະຫຼາດກ່ອນແລ້ວ. ຈຸດປະສົງຂອງການເປີດສຳນັກງານ ກໍເພື່ອໃຫ້ກຸ່ມລູກຄ້າຂອງບໍລິສັດ ສາມາດຕິດຕໍ່ປະສານງານຕ່າງໆໄດ້ສະດວກ ແລະເພີ່ມປະສິດທິພາບ ໃນການໃຫ້ບໍລິການຫຼາຍຂຶ້ນ.

      ສໍາລັບຕະຫຼາດວັດສະດຸກໍ່ສ້າງໃນລາວ ເປັນຕະຫຼາດທີ່ຂ້ອນຂ້າງໃຫຍ່ ເຊິ່ງໄດ້ແບ່ງພື້ນທີ່ຕາມພູມີພາກ ແຕ່ທຸລະກິດໂດຍລວມຍັງຢູ່ແຕ່ໃນເມືອງຫຼັກ ເຊັ່ນ: ນະຄອນຫຼວງວຽງຈັນ, ຈໍາປາສັກ, ຄໍາມ່ວນ, ສະຫວັນນະເຂດ ແລະບໍລິຄຳໄຊ... ເປັນໂອກາດອັນດີທີ່ເຮັດໃຫ້ທຸລະກິດຂະຫຍາຍຕົວໄດ້ຢ່າງວ່ອງໄວ. ສິນຄ້າຂອງ ຈໍລະເຂ້ ແລະຊາລະວັນ ໄດ້ນໍາເຂົ້າມາຈໍາໜ່າຍໃນລາວ ເປັນໄລຍະເວລາຍາວນານພໍສົມຄວນ ເຮັດໃຫ້ເປັນທີ່ຍອມຮັບ ແລະມີຊື່ສຽງໃນຕະຫຼາດວັດສະດຸກໍ່ສ້າງຂອງລາວ.

ສໍາລັບປີນີ້ ທາງບໍລິສັດ ໄດ້ຕັ້ງເປົ້າຍອດຂາຍໃນຕ່າງປະເທດໃຫ້ໄດ້ 10% ຈາກຍອດຂາຍລວມຂອງບໍລິສັດ ແລະວາງເປົ້າໝາຍການເຕີບໃຫຍ່ຂຶ້ນ 15-20% ເຊິ່ງປັດຈຸບັນ ບໍລິສັດ ຈໍລະເຂ້ ໄດ້ເຂົ້າເຮັດຕະຫຼາດໃນປະເທດມຽນມາ, ລາວ, ກຳປູເຈຍ, ຫວຽດນາມ ແລະມາເລເຊຍ ລວມເຖິງການເຂົ້າໄປຂະຫຍາຍຕະຫຼາດໃນປະເທດອື່ນໆ ໃນອາຊີຕາເວັນອອກສຽງໃຕ້ດ້ວຍ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ