• ໄຟໄໝ້ເຮືອນປະຊາຊົນຢູ່ສະຫວັນນະເຂດ ເສຍເຫາຍ 1 ຕື້ກວ່າກີບ

ໂດຍ: ສີເປື້ອນມື 25 ມີນາ 2019 (14.12 ນ.) Read : 165

ເກີດເຫດໄຟໄໝ້ເຮືອນຂອງປະຊາຊົນເຂດບ້ານ ສຸນັນທາ, ໜ່ວຍທີ 4 ນະຄອນໄກສອນ ພົມວິຫານ ແຂວງ ສະຫວັນນະເຂດ ໃນຄໍ່າຄືນຂອງວັນທີ 20 ມີນາ 2019 ນີ້, ມີ​ຜົນ​ເສຍ​ຫາຍຕໍ່ເຫດການດັ່ງກ່າວ ພໍ່ແມ່ປະຊາຊົນທີ່ຢູ່ເຮືອນໃກ້ຄຽງ, ຍາດຕິພີ່ນ້ອງ, ໝູ່ເພື່ອນ, ອຳນາດການປົກຄອງກໍໄດ້ຊ່ວຍກັນຍົກຍ້າຍເຄື່ອງ ແລະຊ່ວຍ​ເຈົ້າ​ໜ້າ​ທີ່ຕໍາຫຼວດມອດໄຟດັບໄຟທີ່ລຸກໄໝ້ຈົນດັບມອດສໍາເລັດ. ຜ່ານການກວດສອບຊັນນະສູດຂອງເຈົ້າໜ້າທີ່ຕໍາຫຼວດ, ການຈັດຕັ້ງທີ່ກ່ຽວຂ້ອງ ແລະການຢັ້ງຢືນຂອງວິຊາການໄຟຟ້າໃນສະຖານທີ່ເກີດເຫດອັກຄີໄພຈຸດທີ່ຕົ້ນເພີງແມ່ນເກີດມາຈາກເຮືອນຂອງ ທ້າວ ບຸນເລີດ ໄຊຍະລາດ ສາເຫດທີ່ເກີດອັງຄີໄພໃນຄັ້ງນີ້ ແມ່ນມາຈາກການນໍາໃຊ້ເຄື່ອງໃຊ້ໄຟຟ້າບໍ່ໄດ້ມາດຕະຖານ (ການໄຕ້ທຽນທູບໄຟຟ້າໄວ້ເທິງຮ້ານພຣະເປັນເວລາດົນ) ເຮັດໃຫ້ເກີດເຫດໄຟໄໝ້ເຮືອນ ແລະຊັບສິນເສຍຫາຍເກືອບໝົດຈໍານວນ 3 ຫຼັງຄາເຮືອນ, ຖືກໄຟລວກເລັກໜ້ອຍ 1 ຫຼັງ, ຜ່ານການສອບຖາມຂອງເຈົ້າໜ້າທີ່ຊາບວ່າເຈົ້າຂອງເຮືອນຫຼັງທໍາອິດທີ່ເປັນຕົ້ນເພີງຊື່ວ່າ: ທ້າວ ບຸນເລີດ ໄຊຍະລາດ ອາຍຸ 53 ປີອາຊີບຄ້າຂາຍລວມມູນຄ່າຄວາມເສຍຫາຍເປັນເງິນກີບ 320 ລ້ານກີບ ແລະເງິນບາດ 301.250 ບາດ, ຫຼັງທີ່ສອງຊື່ ທ້າວ ສົມໃຈແກ້ວລື ຄໍາໄຂ ອາຍຸ 49 ປີ ອາຊີບພະນັກງານ ຕໍາຫຼວດ ລວມມູນຄ່າຄວາມເສຍຫາຍ 525 ລ້ານກີບ, ຫຼັງທີສາມຊື່ທ້າວ ທອງສາ ໄຊຍະລາດ ອາຍຸ 67 ປີ ອາຊີບ ປະຊາຊົນ ລວມມູນຄ່າຄວາມເສຍຫາຍເງິນກີບ 105 ລ້ານກີບ ແລະເງິນບາດ 20.000 ບາດ ແລະຫຼັງທີສີ່ເປັນເຮືອນທີ່ຖືກໄຟລວກເລັກໜ້ອຍເປັນເຮືອນຂອງນາງ ສົມນຶກ ຊຸມພົນພັກດີ ອາຍຸ 67 ປີ ອາຊີບຄ້າຂາຍລວມມູນຄ່າຄວາມເສຍຫາຍ 1,7 ລ້ານກີບ. 
      ຕໍ່​ເຫດ​ການ​ດັ່ງກ່າວ ຈຶ່ງຮຽກຮ້ອງໃຫ້ອໍານາດການປົກຄອງທີ່ກ່ຽວຂ້ອງ ຫຼືພໍ່ແມ່ປະຊາຊົນທົ່ວໄປຜູ້ທີ່ມີນໍ້າໃຈເອື້ອເຟື້ອເພື່ອແຜ່ຊ່ວຍເຂົ້າມາໃຫ້ຄວາມຊ່ວຍເຫຼືອທັງ 4 ຄອບຄົວນີ້ດ້ວຍ.


ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ