• ງານສະແດງສິນຄ້າ-ອາຫານ ຍິ່ງໃຫຍ່ລະດັບໂລກທີ່ ປະເທດໄທ “THAIFEX – World of food ASIA 2019”

ໂດຍ: ສີເປື້ອນມື 16 ມີນາ 2019 (14.05 ນ.) Read : 86

ໃນວັນທີ 15 ມີນາ 2019 ຜ່ານມາ ໄດ້ມີການຈັດງານຖະແຫຼງຂ່າວ ເຊີນຊວນ ພາກສ່ວນທຸລະກິດໃນລາວ ຮ່ວມງານ ສະແດງສິນຄ້າ-ອາຫານ ຍິ່ງໃຫຍ່ລະດັບໂລກທີ່ ປະເທດໄທ “THAIFEX – World of food ASIA 2019” ທີ່ສູນການຄ້າ ລາວ-ໄອເຕັກ (ຕຶກເກົ່າ) ໃຫ້ກຽດເຂົ້າຮ່ວມມີ: ທ່ານ ວິດທະຍາກອນ ມະນີເນດ ຮອງອະທິບໍດີ ກົມສົ່ງເສີມການຄ້າລະຫວ່າງປະເທດ ກະຊວງພານິດໄທ ໃນຖານະຜູ້ແທນຈັດງານຈາກລັດຖະບານໄທ, ທ່ານ ນາງ ຍານີ ສີມີໄຊ ຜູ້ອໍານວຍການສໍານັກງານ ສົ່ງເສີມການຄ້າໃນຕ່າງປະເທດ ປະຈໍາລາວ ແລະທ່ານ ນາງ ວະຣິສະຣາ ໄນຍະຊິດ ຜູ້ອໍານວຍການ ໂຄງການ Koelnmesse ຈໍາກັດ ພ້ອມດ້ວຍແຂກທີ່ຖືກເຊີນ.

ກົມສົ່ງເສີມການຄ້າລະຫວ່າງປະເທດ ກະຊວງພານິດ ຮ່ວມມືກັບຫໍການຄ້າໄທ ແລະ Koelnmesse ປະເທດເຢຍລະມັນ ຈັດງານວາງສະແດງສິນຄ້າ-ອາຫານ ແລະເຄື່ອງດື່ມລະດັບໂລກ THAIFEX – World of food ASIA 2019 ທີ່ປະເທດໄທ. ດັ່ງນັ້ນ, ຈຶ່ງໄດ້ເຊີນຊວນໃຫ້ບັນດາຫົວໜ່ວຍທຸລະກິດຈາກທົ່ວໂລກ ໂດຍສະເພາະແມ່ນ ສປປ ລາວ ເຂົ້າຮ່ວມເຈລະຈາກັບຜູ້ຜະລິດ, ສົ່ງອອກ, ນໍາເຂົ້າ ແລະຕົວແທນຈໍາໜ່າຍສິນຄ້າໃນທຸລະກິດ ກະສິກໍາ, ອາຫານ ແລະເຄື່ອງດື່ມຈາກປະເທດໄທ ແລະ40 ປະເທດທົ່ວໂລກ ຫຼາຍກວ່າ 2.700 ລາຍການ ປະມານ 5.800 ຮ້ານຄ້ານ້ອຍ ໃນພື້ນທີ່ 100.000 ຕາແມັດ. ງານດັ່ງກ່າວຈະຈັດຂຶ້ນໃນວັນທີ 28 ພຶດສະພາ ຫາ ວັນທີ 1 ມິຖຸນາ 2019 ເວລາ 10:00-18:00 ໂມງທີ່ຕຶກ Impact Challenger 1-3 ແລະຕຶກ IMPACT EXHIBITION HALL 5-12 ສູນສະແດງສິນຄ້າ ແລະການປະຊຸມ ອິມແພັກ ເມືອງ ທອງທານີ ແຂວງ ນົນທະບູລີ ປະເທດໄທ.

ງານດັ່ງກ່າວມີບັນດາຫົວໜ່ວຍທຸລະກິດທີ່ມີຊື່ສຽງຂອງລາວເຂົ້າຮ່ວມ ເຊັ່ນ: ກາເຟສີໜຸກ, ກາເຟ ແລະໝາກໄມ້ອົບແຫ້ງ ດາວເຮືອງ, ຊາຜົ້ງສາລີ ແລະຜະລິດຕະພັນ ເບຍລາວ ເປັນຕົ້ນ. ນອກນັ້ນ, ທາງຜູ້ຈັດງານຍັງໃຫ້ສິດທິພິເສດແກ່ບັນດາຜູ້ປະກອບການໃນລາວ 10 ບໍລິສັດທໍາອິດ ຟຣີ ແບບບໍ່ໄດ້ເສຍຄ່າບູ໊ດ ຈາກລາຄາ 20 ກວ່າລ້ານກີບ. ສາມາດລົງທະບຽນໄດ້ແລ້ວເລີ່ມຕັ້ງແຕ່ມື້ນີ້ເປັນຕົ້ນໄປ ຈົນເຖິງ ວັນທີ 22 ມີນາ 2019 ນີ້. ສອບຖາມຂໍ້ມູນເພີ່ມຕື່ມທີ່ເບີໂທ 021 413 701 ແລະ 021 413 706.


ທີ່ມາ:
  • ຮູບພາບ