• ບຸນກິນຈຽງຊົນເຜົ່າມົ້ງ ປະຈໍາປີ 2019 ທີ່ ສວນພຶກສາ

ໂດຍ: ສີເປື້ອນມື 09 ມັງກອນ 2019 (15.23 ນ.) Read : 1,028

ໃນວັນທີ 06 ມັງກອນ 2019 ຜ່ານມາໄດ້ມີການຈັດງານເປີດງານບຸນປະເພນີກິນຈຽງຊົນເຜົ່າມົ້ງ ປະຈໍາປີ 2019 ຢ່າງເປັນທາງການ ທີ່ສວນພຶກສາ ບ້ານ ດ່ານຊີ ເມືອງ ນາຊາຍທອງ ນະຄອນຫຼວງວຽງຈັນ. ໃຫ້ກຽດເປັນປະທານເຂົ້າຮ່ວມ ໂດຍ: ທ່ານ ພູວົງ ພະມີສິດ ປະທານຮ້ານຄໍາພູວົງ ແລະປະທານ ສວນພຶກສາ ແລະທ່ານ ວິລະສັກ ນາມມຸນຕີ ເຈົ້າເມືອງໆ ນາຊາຍທອງ ພ້ອມດ້ວຍການນໍາພາກລັດ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ພູວົງ ພະມີສິດ ໄດ້ກ່າວວ່າ: ການຈັດງານປະເພນີບຸນກິນຈຽງຊົນເຜົ່າມົ້ງຢູ່ສວນພຶກສານີ້ ຖືວ່າເປັນປີທີ 2 ແລ້ວ ຈຸດປະສົງຂອງການຈັດງານແມ່ນເພື່ອ ຮັກສາວັດທະນະທໍາ ແລະຮີດຄອງປະເພນີອັນດີງາມຂອງຊົນເຜົ່າມົ້ງໄວ້, ສ້າງຄວາມສາມັກຄີໃຫ້ປວງຊົນບັນດາເຜົ່າ ໃຫ້ມີກິດຈະກໍາຮ່ວມກັນ ແລະສົ່ງເສີມການທ່ອງທ່ຽວລາວ ເນື່ອງຈາກປະເທດລາວເຮົາເປີດປີທ່ອງທ່ຽວ. ປັດຈຸບັນ ສວນພຶກສາກໍໄດ້ມີການພັດທະນາມາຫຼາຍສົມຄວນ ພ້ອມນັ້ນໃນສວນພຶກສາພວກເຮົາ ໄດ້ມີພະນັກງານເຜົ່າມົ້ງຢູ່ປະມານ 60% ແລະສວນພຶກສາແຫ່ງນີ້ ກໍມີຄວາມເໝາະສົມແກ່ການຈັດການດັ່ງກ່າວ.

ກິດຈະກໍາໃນງານປະເພນີບຸນກິນຈຽງເຜົ່າມົ້ງ ມີການແຂ່ງຂັນກີລາບານເຕະ, ຕີໝາກຂ່າງ, ຕີໝາກຄອນ, ເປຕັງ, ຍິງໜ້າເກັກ, ການສະແດງສິລະປະ-ວັນນະຄະດີ ແລະການປະກວດນາງສາວງາມເຜົ່າມົ້ງ ນະຄອນຫຼວງວຽງຈັນ ປະຈໍາປີ 2019 ໃນຄໍ່າຄືນຂອງວັນທີ 12-13 ມັງກອນ 2019. ສໍາລັບງານປະເພນີບຸນກິນຈຽງຊົນເຜົ່າມົ້ງຈະເລີ່ມຕັ້ງແຕ່ວັນທີ 09-13 ມັງກອນ 2019 ທີ່ສວນພຶກສາ ບ້ານດ່ານຊີ ເມືອງ ນາຊາຍທອງ ນະຄອນຫຼວງວຽງຈັນ ເປັນອີກສະຖານທີ່ທ່ອງທ່ຽວອີກແຫ່ງໜຶ່ງທີ່ມີຄວາມສວຍສົດງົດງາມ ແລະບັນຍາກາດດີ ເໝາະແກ່ການພັກຜ່ອນ.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ