• ຊົມວິວດອຍກາວ ພູເຂົາທະເລໝອກ

ໂດຍ: ແມວດຳ 08 ມັງກອນ 2019 (13.41 ນ.) Read : 1,787

ພູຜາປ່າໄມ້, ສາຍໝອກ ແລະອາກາດເຢັນ ເປັນແຫຼ່ງທ່ອງທ່ຽວທີ່ຫຼາຍທ່ານໄຝ່ຫາໃນລະດູໜາວ ແລະແນ່ນອນແລ້ວວ່າແຫຼ່ງທ່ອງທ່ຽວແບບນີ້ມັກຈະມີຢູ່ທີ່ພາກເໜືອຂອງປະເທດລາວ. ເຊິ່ງ ດອຍກາວ ເມືອງໄຊສະຖານ ກໍເປັນສະຖານທີ່ໜຶ່ງທີ່ຈະເຮັດໃຫ້ທ່ານໄດ້ດື່ມດໍ່າກັບທະມະຊາດທ່າມກາງທະເລໝອກໄດ້.

ເມືອງໄຊສະຖານ ແຂວງໄຊຍະບູລີ ເປັນເມືອງໃໝ່ທີ່ຖືກສ້າງຕັ້ງຂຶ້ນໃນປີ 2009, ເຊິ່ງຫຼາຍທ່ານມັກເອີ້ນກັນວ່າ: “ເຂດສະແມດ-ສັນແຕ”, ໃນເມື່ອກ່ອນເມືອງແຫ່ງນີ້ຖືໄດ້ວ່າເປັນເຂດທີ່ທຸກຍາກທີ່ສຸດຂອງແຂວງໄຊຍະບູລີ, ແຕ່ປັດຈຸບັນມັນໄດ້ຖືກພັດທະນາ ແລະກາຍເປັນແຫ່ງທ່ອງທ່ຽວທີ່ມີຊື່ສຽງຍ້ອນມີຈຸດພິເສດທາງດ້ານທຳມະຊາດໂດຍສະເພາະທະເລໝອກ, ປະຊາຊົນຍັງຮັກສາວັດທະນະທຳ, ວິຖີຊີວິດແບບພື້ນເມືອງ, ເຮັດໃຫ້ມີນັກທ່ອງທ່ຽວຈາກທົ່ວທຸກສາລະທິດເຂົ້າມາທ່ຽວຊົມຢ່າງຫຼວງຫຼາຍ ໂດຍສະເພາະໃນລະດູແລ້ງ, ເຊິ່ງນັກທ່ອງທ່ຽວທີ່ມາທ່ຽວຊົມຈະສາມາດກາງເຕັ້ນນອນເພື່ອສຳຜັດກັບອາກາດທີ່ໜາວເຢັນ, ເຫັນທະເລໝອກແບບໃກ້ຊິດ ແລະເບິ່ງຕາເວັນຂຶ້ນໃນຕອນເຊົ້າໄດ້. ນອກຈາກນີ້, ນັກທ່ອງທ່ຽວຍັງສາມາດທ່ຽວຊົມບ້ານເຮືອນຂອງປະຊາຊາຊົນ, ວິຖີຊີວິດຂອງຊົນເຜົ່າໄປຼ່, ໄປເບິ່ງຕົ້ນຊາໃຫຍ່ 1000 ປີ, ໄປຊີມນໍ້າຊາອາຍຸຍືນ, ເກັບສະຕໍເບີຣີ່ສົດໆຈາກສວນ, ຢ້ຽມຊົມເຮືອນຍາວ ແລະເຮືອນເສົາດຽວ.

ສຳລັບການເດີນທາງຕັ້ງແຕ່ເມືອງພຽງ ໄປຫາ ດອຍກາວ ເມືອງໄຊສະຖານແມ່ນຕ້ອງຜ່ານເທດສະບານແຂວງໄຊຍະບູລີໄປທາງທິດເໜືອ ໄລຍະທາງ 95 ກິໂລແມັດ, ໂດຍໃຊ້ເວລາ 3 ຊົ່ວໂມງ (ສຳລັບລົດຈັກ), ສ່ວນລົດໃຫຍ່ອາດຈະໃຊ້ເວລາດົນກວ່າເລັກໜ້ອຍ. ເຖິງແມ່ນວ່າການເດີນທາງຈະຍາວໄກ ແຕ່ ຕະຫຼອດການເດີນທາງທ່ານຈະໄດ້ສຳຜັດກັບທຳມະຊາດທີ່ມີທິວທັດທີ່ສວຍງາມຈົນທ່ານລືມຄວາມອິດເມື່ອຍ, ສຳລັບນັກທ່ອງທ່ຽວທ່ານໃດທີ່ມັກຄວາມຕື່ນເຕັ້ນ, ມັກທຳມະຊາດ, ວິຖີຊີວິດແບບພື້ນບ້ານ ຕ້ອງລອງໄປສຳຜັດ ແລະສູດອາກາດບໍລິສຸດໃຫ້ເຕັມປອດທີ່ ດອຍກາວ ເມືອງໄຊສະຖານ.





ທີ່ມາ: Face book Page: ເມືອງໄຊສະຖານ-Saysathan district.
  • ຮູບພາບ