• ເລີ່ມກວດສອບຄຸນນະພາບເຄື່ອງໃຊ້ໄຟຟ້າ ແລະເອເລັກໂຕຣນິກໃນລາວ

ໂດຍ: ສີເປື້ອນມື 28 ກຸມພາ 2019 (14.13 ນ.) Read : 124

ໃນວັນທີ 26 ກຸມພາ 2019 ກະຊວງວິທະຍາສາດ ແລະເຕັກໂນໂລຊີ (ກວຕ) ໄດ້ເປີດຫ້ອງກວດສອບຄຸນນະພາບເຄື່ອງໃຊ້ໄຟຟ້າ ແລະເຄື່ອງເອເລັກໂຕຣນິກທີ່ນໍາເຂົ້າ, ຈໍາໜ່າຍ ແລະຜະລິດຢູ່ ສປປ ລາວ ປະຈໍາສາງທ່ານາແລ້ງນະຄອນຫຼວງວຽງຈັນ ເຊິ່ງເປັນຫ້ອງກວດສອບທີສອງ ຂອງ ສປປ ລາວ (ຫ້ອງກວດສອບທໍາອິດ ແມ່ນຢູ່ດ່ານບໍ່ເຕນ ແຂວງຫຼວງນໍ້າທາ ພາຍໃຕ້ເປັນປະທານ ໂດຍທ່ານ ບໍ່ວຽງຄໍາ ວົງ ດາລາ ລັດຖະມົນຕີກະຊວງ ກວຕ, ທັງເປັນປະທານສະພາວິທະຍາສາດແຫ່ງຊາດ, ມີບັນດາຫົວໜ້າກົມ, ສະຖານບັນ, ຫົວໜ້າຫ້ອງການແຂກຖືກເຊີນ ແລະພາກສ່ວນກ່ຽວຂ້ອງເຂົ້າຮ່ວມ.

      ທ່ານ ວຽງທອງ ວົງທະວິໄລ ຫົວໜ້າກົມມາດຕະຖານ ແລະວັດແທກ ໄດ້ກ່າວວ່າ: ຫ້ອງກວດສອບຄຸນນະພາບເຄື່ອງໃຊ້ໄຟຟ້າ ແລະເຄື່ອງເອເລັກໂຕຣນິກທີ່ນໍາເຂົ້າ, ຈໍາໜ່າຍ ແລະຜະລິດຢູ່ລາວ ປະຈໍາສາງທ່ານາແລ້ງນະຄອນຫຼວງວຽງຈັນ ເຊິ່ງເປັນຫ້ອງກວດທໍາອິດຂອງ ສປປ ລາວ ໂດຍມີຈຸດປະສົງ ເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ ແລະເປັນການເອື້ອອໍານວຍຄວາມສະດວກໃຫ້ແກ່ພາກລັດ ແລະເອກະຊົນໃຫ້ຮັບປະກັນຄຸນນະພາບ ແລະຖືກຕ້ອງຕາມມາດຕະຖານແຫ່ງຊາດ ແລະສາກົນ, ທັງຍັງເປັນການຕອບສະໜອງນະໂຍບາຍຂອງລັດຖະບານໃນການສ້າງພື້ນຖານໂຄງລ່າງດ້ານຄຸນນະພາບແຫ່ງຊາດໃຫ້ມີຄວາມເຂັ້ມແຂງສະໜອງການ ບໍລິການກວດສອບຄຸນນະພາບຜະລິດຕະພັນເຄື່ອງໃຊ້ໄຟຟ້າ ແລະເຄື່ອງເອເລັກໂຕຣນິກໃຫ້ກັບສັງຄົມ, ຮັບປະກັນຄຸນນະພາບຜະລິດຕະພັນ ຮັບປະກັນຄວາມປອດໄພຂອງຜູ້ຊົມໃຊ້, ເປັນການປັບປຸງລະບົບມາດຕະຖານຂອງຜະລິຕະພັນ ແລະສອບຄ່ອງກັບການກໍານົດລະບຽບການ ຊ່ວຍກໍ່ສ້າງພະນັກງານດ້ານກວດສອບໃຫ້ມີຄວາມສາມາດ ແລະເປັນທີ່ຍອມຮັບ, ທັງສາມາດເຊື່ອມໂຍງກັບພາກພື້ນ ແລະສາກົນໄດ້.

      ສໍາລັບການກວດສອບແມ່ນອີງຕາມ ຄຸນລັກສະນະທີ່ສໍາຄັນຂອງການກໍານົດໃນມາດຕະຖານເຊັ່ນ: ທົດສອບຄວາມທົນຕໍ່ແຮງໄຟ, ທົດສອບຄວາມຕ້ານຂອງສະນວນ, ທົດສອບກະແສໄຟຮົ່ວ, ທົດສອບທາງຜ່ານລົງດິນ, ທົດສອບຄວາມສອດຄ່ອງຂອງສະຫຼາກ. ສ່ວນຄ່າບໍລິການກວດສອບແມ່ນບົນພື້ນຖານ ຄວາມຖືກຕ້ອງຕາມລະບຽບຫຼັກການກົດໝາຍ ແລະມາດຕະຖານແຫ່ງຊາດ ໂດຍສອດຄ່ອງກັບລະບຽບການຂອງພາກພື້ນ ແລະສາກົນ, ໃນນັ້ນການກວດສອບຈະເລັງໃສ່ເຄື່ອງໃຊ້ໄຟຟ້າໃນຄົວເຮືອນ, ເຄື່ອງມືຊ່າງ, ສາຍໄຟ, ເຄື່ອງວັດແທກ ແລະອື່ນໆ ເຊິ່ງມີມູນຄ່າກວດສອບແຕ່ 1 ພັນກີບ ຫາ 6 ແສນກີບ.
                                                ຂ່າວ: ນສພ ເສດຖະກິດ-ສັງຄົມ


ທີ່ມາ: ເສດຖະກິດ-ສັງຄົມ
  • ແທັກທີ່ກ່ຽວຂ້ອງ