• ຮອງປະທານປະເທດ ເນັ້ນໃຫ້ເອົາໃຈໃສ່ໂຄງປະກອບບຸກຄະລາກອນ

ໂດຍ: ສີເປື້ອນມື 27 ກຸມພາ 2019 (10.13 ນ.) Read : 702

ການພົບປະໂອ້ລົມພະນັກງານຫຼັກແຫຼ່ງຢູ່ແຂວງ ສະຫວັນນະເຂດ ຂອງທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສ.ປ.ປ ລາວ ໃນຄັ້ງ ວັນທີ 21 ກຸມພາ 2019 ຢູ່ທີ່ຫ້ອງປະຊຸມໃຫຍ່ຫໍວັດທະນະທຳ ໄກສອນພົມວິຫານ. ໂດຍມີທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງໆ ສະຫວັນນະເຂດ ພ້ອມດ້ວຍຄະນະປະຈຳພັກແຂວງ, ກຳມະການພັກແຂວງ, ບັນດາການນຳຫຼັກແຫຼ່ງໃນທົ່ວແຂວງເຂົ້າຮ່ວມ.
      ໂອກາດດັ່ງກ່າວທ່ານ ສັນຕິພາບ ພົມວິຫານ ກໍໄດ້ຕາງໜ້າໃຫ້ແກ່ພະນັກງານຫຼັກແຫຼ່ງໃນທົ່ວແຂວງກ່າວຕ້ອນຮັບ ທ່ານ ພັນຄຳ ວິພາວັນ ຢ່າງເປັນທາງການ ໃນການມາພົບປະຢ້ຽມຢາມ ແລະໂອ້ລົມ ໃນຄັ້ງນີ້.
      ຈາກນັ້ນ, ທ່ານ ພັນຄຳ ວິພາວັນ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ໃນການຊີ້ນຳ-ນຳພາວຽກງານຮອບດ້ານຂອງອົງຄະນະພັກແຂວງສະຫວັນນະເຂດ, ໃນໂອກາດດັ່ງກ່າວທ່ານໄດ້ຍົກໃຫ້ເຫັນການຈັດຕັ້ງການເຄື່ອນໄຫວຂອງກອງປະຊຸມໃຫຍ່ ຄັ້ງທີ X ຂອງພັກ ໂດຍເລີ່ມແຕ່ກອງປະຊຸມຄັ້ງປະ ຖົມມະລຶກຈົນເຖິງປະຈຸບັນ ເຫັນວ່າ: ພັກເຮົາໄດ້ເອົາໃຈໃສ່ແກ້ໄຂບັນຫາຢ່າງຈິງຈັງ ແລະມີຜົນສຳເລັດໃນຫຼາຍດ້ານ ເປັນຕົ້ນແມ່ນ ມີສະຖຽນລະພາບທາງດ້ານການເມືອງ, ມີຄວາມສະຫງົບເປັນລະບຽບຮຽບຮ້ອຍໃນທົ່ວສັງຄົມ, ເສດຖະກິດໄດ້ຮັບການພັດທະນາຢ່າງຕໍ່ເນື່ອງ, ສ່ວນບັນດາປະກົດການຫຍໍ້ທໍ້ໃນສັງຄົມໄດ້ ຮັບການແກ້ໄຂເຊັ່ນ: ການປະຕິບັດຄຳສັ່ງເລກທີ 15/ນຍ ເຫັນວ່າສ່ວນຫຼວງຫຼາຍແມ່ນໄດ້ດີ, ອີກຢ່າງ ການປະຕິບັດວິໄນຕໍ່ພະນັກງານສະມາຊິກພັກ ຜູ້ກະທຳຜິດລະບຽບໃນແຕ່ລະດ້ານກໍ່ເຫັນວ່າໄດ້ປະຕິບັດຢ່າງຕໍ່ເນື່ອງ ແລະມີການກວດກາຫຼາຍຂຶ້ນ, ອັນທີ່ຍັງອ່ອນອີກອັນໜຶ່ງເຫັນວ່າພະນັກງານສ່ວນຫຼາຍການຮ່ຳຮຽນຢາກໄດ້ແຕ່ປະກາສະນີຍະບັດ ແຕ່ບໍ່ຄຳນຶງເຖິງຄວາມຮູ້ຄວາມສາມາດພໍມາເຮັດວຽກຕົວຈິງ ຊ້ຳພັດພົບຂໍ້ຫຍຸ້ງຍາກ, ກ່ຽວກັບພະນັກງານທີ່ເຮັດວຽກງານບໍລິການ ຍັງເຮັດບໍ່ໄດ້ດີເຮັດພຽງເອົາໜ້າ. ດັ່ງນັ້ນ, ຝາກເຖິງທຸກພາກສ່ວນ ຈົ່ງພ້ອມກັນນຳໃຊ້ຄວາມຮູ້ຄວາມສາມາດໃນການພັດທະນາວຽກງານຂອງຕົນຢ່າງເຕັມຮູບແບບ, ເຂົ້າສູ່ລະບົບເພື່ອກ້າວສູ່ການພັດທະນາປະເທດຊາດໃຫ້ມີຄວາມຈະເລີນກ້າວໜ້າໃນອະນາຄົດ.
      ທ່ານ ພັນຄຳ ວິພາວັນ ຍັງໄດ້ເນັ້ນໜັກໃຫ້ຄະນະພັກທຸກຂັ້ນຂອງແຂວງ ສະຫວັນນະເຂດ ຕໍ່ການດຳເນີນກອງປະຊຸມໃຫຍ່ 3 ຂັ້ນ ໂດຍສະເພາະກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງສະ ຫວັນນະເຂດ ທີ່ຈະເປີດຂຶ້ນໃນກາງປີ 2020. ດັ່ງນັ້ນ, ບົດລາຍງານການເມືອງຂອງຄະນະພັກແຕ່ລະຂັ້ນຕ້ອງໃຫ້ມີຄວາມແທດເໝາະກັບຄວາມຈິງ, ມີການວິເຄາະ, ວິໄຈເນື້ອໃນບັນຫາ, ບົດຮຽນໃນດ້ານຕ່າງໆ ເພື່ອມາປຽບທຽບກັບໜ້າທີ່ວຽກງານທີ່ໄດ້ປະຕິບັດຜ່ານມາ, ສ່ວນໂຄງປະກອບດ້ານບຸກຄະລາກອນຕ້ອງມີການຄັດເລືອກ ເຊິ່ງໃນນັ້ນໄດ້ແບ່ງອອກເປັນ 3 ຮຸ່ນຄື: ຮຸ່ນອາວຸໂສ, ຮຸ່ນກາງ ແລະຮຸ່ນໜຸ່ມ, ສຳລັບຊັດສ່ວນໃນແຕ່ລະຮຸ່ນຕ້ອງເບິ່ງວ່າ: ຮຸ່ນກາງ ແລະຮຸ່ນໜຸ່ມຄວນຈະມີອັດຕາສ່ວນຫຼາຍກວ່າຮຸ່ນອາວຸໂສ; ໃນນັ້ນ ໃຫ້ເບິ່ງທັງຄວາມຮູ້, ຄວາມສາມາດ ແລະປະສົບການຫຼີກລ້ຽງຄົນເຈົ້າຄົນຂ້ອຍ, ຍາດພີ່ນ້ອງ, ຄົນໃກ້ຊິດ ເຊິ່ງຈະກໍໃຫ້ເກີດຂໍ້ຂັດແຍ່ງໃນຫຼາຍດ້ານ ເຮັດໃຫ້ການຊີ້ນຳ-ນຳພາພົບຂໍ້ຫຍຸ້ງຍາກ. ບັນຫານີ້ຕ້ອງຝາກເຖິງຄະນະພັກທຸກຂັ້ນ ຕ້ອງເອົາໃຈໃສ່ເພື່ອໃຫ້ໄດ້ບຸກຄະລາກອນທີ່ມີຄຸນະພາບ.

ສະຫວັນພັດທະນາ ຂ່າວ / Savanhphuttana News


ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ