• ສ​ປ​ປ ລາວ ​ປັບ​ປຸງ​ຄວາມ​ສະ​ດວກ​ດ້ານ​ການ​ຄ້າ ຕາມ​ມາດ​ຕະ​ຖານ​ສາ​ກົນ

ໂດຍ: Admin Mahason 18 ກຸມພາ 2019 (10.01 ນ.) Read : 210

     ໃນ​ວັນ​ທີ 15 ກຸມ​ພານີ້, ກະ​ຊວງ​ການ​ເງິນຮ່ວມ​ກັບ​ສະ​ພາ​ການ​ຄ້າ ແລະ ອຸດ​ສາ​ຫະ​ກຳ​ແຫ່ງ​ຊາດ​ລາວ ໄດ້​ຈັດ​ກອງ​ປະ​ຊຸມ​ຄົ້ນ​ຄວ້າ​ປຶກສາຫາລື ແລະ ປັບປຸງລະ​ບຽບ​ວ່າ​ດ້ວຍ​ການ​ຄຸ້ມ​ຄອງ​ຜູ້​​​ປະ​ກອບ​ການ​ຕາມ​ມາດ​ຕະ​ຖານ (AEO) ແລະ ລະ​ບຽບ​ການ​ຄຸ້ມ​ຄອງ​ຜູ້​ບໍ​ລິ​ການ​ແຈ້ງ​ພ​າ​ສີຂຶ້ນທີ່ນະຄອນຫລວງວຽງຈັນ, ເຊິ່ງໄດ້​ຮັບ​ການ​ສະ​ໜັບ​ສ​ະ​ໜູນ​ຂອງ​ອົງ​ການ​ການ​ເງິນ​ສາ​ກົນ ແລະ ກຸ່ມ​ສະ​ມາ​ຊິກ​ຂອງ​​ທະ​ນາ​ຄານ​ໂລກ. ​
     ກອງປະຊຸມຄັ້ງນີ້ ​ເພື່ອ​ສະ​ໜອງ​ຂໍ້​ມູນ ແລະ ຄຳ​ແນະ​ນຳ​ ກ່ຽວ​ກັບ​ຮ່າງ​ບົດ​ແນະ​ນຳ​ຂອງ​ ກະ​ຊວງ​ການ​ເງິນ ວ່າ​ດ້ວຍ​ການ​ຄຸ້ມ​ຄອງ​ຜູ້​​​ປະ​ກອບ​ການ​ຕາມ​ມາດ​ຕະ​ຖານ ແລະ ​ການ​ຄຸ້ມ​ຄອງ​ຜູ້​ບໍ​ລິ​ການ​ແຈ້ງ​ພ​າ​ສີ. ເພື່ອພ້ອມກັນ​ຊ່ວຍ​ປະ​ກອບ​ຂໍ້​ມູນ​ເຂົ້າ​ໃນ​ການ​ປັບ​ປຸງ​ຮ່າງ​ບົດ​ແນະ​ນຳ​ດັ່​ງ​ກ່າວທາງດ້ານຫລັກ​ການ, ຂໍ້​ບັງ​ຄົບ ແລະ ເງື່ອນ​ໄຂຕາມ​ທີ່​ໄດ້​ລະ​ບຸໄວ້​ໃນ​ກອບ​ມາດ​ຕະ​ຖານ​ເພື່ອ​ຄວາມ​ປອດ​ໄພ ແລະ ອຳ​ນວນ​ຄວາມ​ສະ​ດວກ​ໃຫ້​ແກ່​ການ​ຄ້າ​ ແລະ ຂອງ​ອົງ​ການ​ພາ​ສີ​ໂລກ. ໃນ​ຂໍ້​ຕົກ​ລົງ​ວ່າ​ດ້ວຍ​ການ​ອຳ​ນວຍ​ຄວາມ​ສະ​ດວກ​ດ້ານ​ການ​ຄ້າ ແລະ ຂອງ​ອົງ​ການ​ການ​ຄ້າ​ໂລກ.
     ຮອງ​ຫົວ​ໜ້າ​ກົມ​ພາ​ສີ ກ່າວ​ວ່າ: ແຜນ​ງານ ວ່າ​ດ້ວຍ​ການ​ຄຸ້ມ​ຄອງ​ຜູ້​​​ປະ​ກອບ​ການ​ຕາມ​ມາດ​ຕະ​ຖານ AEO ແມ່ນກອບ​ວຽກ​ອັນ​ໃໝ່ ສຳ​ລັບ​ເຈົ້າ​ໜ້າ​ທີ່​ພາ​ສີ ແລະ ຜູ້​ປະ​ກອບ​ການ ເຊິ່ງກອງ​ປະ​ຊຸມ​ໃນ​ຄັ້ງນີ້ ແມ່ນ​ບາດ​ກ້າວ​ທີ່​ສຳ​ຄັນ​ໜຶ່ງ ສຳ​ລັບ​ພາ​ສີ​ລາວ ເພື່ອ​ຍັບ​ໃກ້​ເຂົ້າ​ໄປ​ສູ່​ການ​ຈັດ​ຕັ້ງ​ປະ​ຕິ​ບັດ​ແຜນ​ງານດັ່ງກ່າວ ແລະ ຈະ​ຊ່ວຍ​ປັງ​ປຸງ​ສະພາບ​ແວດ​ລ້ອມ ແລະ ​ເອື້ອ​ອຳ​ນວຍທາງ​ດ້ານ​ການ​ຄ້າ​ຢູ່ ສ​ປ​ປ ລາວ ໃຫ້​ສອດ​ຄ່ອງ​ກັບ​ສະ​ພາບ​ຕົວ​ຈິງ​ຫລາຍ​ຂຶ້ນ.

ທີ່ມາ: ລາວພັດທະນາ
  • ແທັກທີ່ກ່ຽວຂ້ອງ