• ງານ Lao ICT Expo 2019 ຈະຈັດຂຶ້ນໃນເດືອນ ມິຖຸນາ 2019

ໂດຍ: ສີເປື້ອນມື 14 ກຸມພາ 2019 (17.08 ນ.) Read : 90

ໃນວັນທີ 14 ກຸມພາ 2019 ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີຖະແຫຼງຂ່າວ ການຈັດງານວາງສະແດງເຕັກໂນໂລຊີສື່ສານຂໍ້ມູນຂ່າວສານ ປະຈໍາປີ 2019 “Lao ICT Expo 2019” ທີ່ໂຮງແຮມ ຄລາວ ພລາຊາ. ໃຫ້ກຽດເປັນປະທານເຂົ້າຮ່ວມໄດ້ແກ່: ທ່ານ ປອ. ທັນສະໄໝ ກົມມະສິດ ລັດຖະມົນຕີ ກະຊວງ ປທສ, ບັນດາຕາງໜ້າກະຊວງ, ອົງການທຽບເທົ່າ, ສະຖາບັນສຶກສາ ແລະບໍລິສັດຕ່າງຢ່າງຫຼວງຫຼາຍ.

ທ່ານ ປອ. ທັນສະໄໝ ກົມມະສິດ ໄດ້ກ່າວວ່າ: ງານວາງສະແດງປີນີ້ ຈັດຂຶ້ນພາຍໃຕ້ຄໍາຂວັນ ສ້າງ ແລະສົ່ງເສີມ ການຫັນເປັນດິຈິຕອນໃນລາວ (Create and Promote Lao Digital Transformation) ໂດຍການຫັນເປັນດິຈິຕອນ ແມ່ນຂະບວນການປ່ຽນແປງ ທີ່ເກີດຈາກການນໍາໃຊ້ ເຕັກໂນໂລຊີດິຈິຕອນ ໃນທຸກຂົງເຂດຂອງສັງຄົມ ເຊິ່ງມັນໄດ້ສ້າງຄວາມສາມາດອັນໃໝ່ ບໍ່ພຽງແຕ່ເປັນການສະໜັບສະໜູນ ແລະເພີ່ມພູນ ວິທີການແບບດັ້ງເດີມ ແຕ່ຍັງເປັນການສ້າງຮູບແບບໃໝ່ ທີ່ມີລັກສະນະເປັນນະວັດຕະກໍາ ແລະສ້າງສັນຢ່າງຊັດເຈນ.

ກິດຈະກໍາພາຍໃນງານ Lao ICT Expo 2019 ຄັ້ງທີ 3 ປະກອບມີ: ວາງສະແດງເຕັກໂນໂລຊີ ດິຈິຕອນ,​ ຂາຍສິນຄ້າໄອທີ ທັງປະເພດ ຮາດແວ ແລະຊອບແວ. ງານດັ່ງກ່າວຈະຈັດຂຶ້ນໃນລະຫວ່າງວັນທີ 12-16 ມິຖຸນາ 2019 ທີ່ສູນການຄ້າລາວ-ໄອເຕັກ (ຕຶກເກົ່າ). ນອກນີ້, ຍັງຈະໄດ້ຈັດກອງປະຊຸມສົນທະນາສາກົນ ວ່າດ້ວຍການຫັນເປັນດິຈິຕອນ (International Forum on Digital Transformation) ໂດຍນັກຊ່ຽວຊານຈາກຕ່າງປະເທດ, ຈັດກອງປະຊຸມສໍາມະນາເປີດກວ້າງວ່າດ້ວຍການສົ່ງເສີມການນໍາໃຊ້ ICT ຢູ່ລາວ ໂດຍຕົວແທນຂອງບັນດາໂຄງການສົ່ງເສີມການນໍາໃຊ້ ICT ທັງພາກລັດ ແລະເອກະຊົນ ເພື່ອນໍາສະເໜີຜົນສໍາເລັດຂອງການນໍາໃຊ້ ICT ໃນການຫັນເປັນທັນສະໄໝ ແລະກອງປະຊຸມວິຊາສະເພາະ ເຊັ່ນ: ການບໍລິຫານລັດດ້ວຍເອເລັກໂຕຼນິກ, ຄວາມປອດໄພ ຂອງເຕັກໂນໂລຊີສື່ສານຂໍ້ມູນຂ່າວສານ, ອຸດສາຫະກໍາ ແລະທຸລະກິດ ດ້ານໄອທີ ແລະອື່ນໆ. ນອກນັ້ນ, ຍັງຈະມີການປະກວດ ລາງວັນລາວໄອທີຊີ 2019 “Lao ICT Award 2019” ເພື່ອເປັນຕົວແທນປະເທດລາວ ສົ່ງເຂົ້າແຂ່ງກັບບັນດາປະເທດອາຊຽນ ຊີງລາງວັນ ASEAN ICT Award 2019.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ