• ບໍລິຫານກາເຟ ກາເຟເກຣດດີ ລາຄາເປັນມິດ

ໂດຍ: ດວງຕາວັນ 29 ພະຈິກ 2018 (16.57 ນ.) Read : 778


ສະບາຍດີທ່ານຜູ້ອ່ານ! ອາກາດໜາວໆແບບນີ້ຫາກໄດ້ກາເຟຫອມໆຮ້ອນໆຈັກຈອກຈັກໃດຄົງຈະດີບໍ່ໜ້ອຍເລີຍເນາະ. ສະນັ້ນ,  ສະບັບນີ້ຊວນຊິມເລີຍແວ່ໄປທັກທາຍພິທີກອນໜຸ່ມອາລົມດີ ຕຸ້ຍ ໂອເວີແດນ ທີ່ຮ້ານກາເຟສຸດຊິວ ຊື່ຮ້ານ ບໍລິຫານກາເຟ ຢາກຮູ້ວ່າຮ້ານນີ້ມີຄວາມພິເສດແນວໃດ ເຂົ້າໄປສຳຜັດພ້ອມໆກັນເລີຍ!

ໜຸ່ມຕຸ້ຍເລົ່າສູ່ຟັງວ່າ ແຮງບັນດານໃຈທີ່ເປີດກະຕິກນ້ຳຮ້ອນຊົງກາເຟແມ່ນໄດ້ມາຈາກການໄປທ່ອງທ່ຽວ ແລະໄດ້ຊິມກາເຟຢູ່ຫຼາຍບ່ອນທັງພາຍໃນ ແລະຕ່າງປະເທດ ກໍເລີຍມີຄວາມຄິດຢາກມີຮ້ານກາເຟນ້ອຍໆເປັນຂອງຕົນເອງ ບວກກັບຄອບຄົວກໍໃຫ້ການສະໜັບສະໜູນ ແລະຊ່ວຍເຫຼືອເຕັມທີ່, ຮ້ານບໍລິຫານກາເຟກໍເລີຍໄດ້ເກີດຂຶ້ນ ໂດຍການຣີໂນເວດໜ້າບ້ານຂອງຕົນເອງໃຫ້ເປັນຮ້ານກາເຟສຸດອົບອຸ່ນ.

ຄວາມພິເສດຂອງບໍລິຫານກາເຟ ແມ່ນຢູ່ທີ່ການຄັດສັນກາເຟພັນດີທີ່ປູກໃນພື້ນທີ່ພູພຽງບໍລະເວນ ແຫຼ່ງທີ່ຂຶ້ນຊື່ວ່າຜະລິດກາເຟທີ່ດີທີ່ສຸດໃນປະເທດ ໂດຍທາງຮ້ານໄດ້ຮັບຊື້ກາເຟຈາກກຸ່ມຜູ້ປູກໂດຍກົງ ທັງນີ້ກໍເປັນການສົ່ງເສີມຜົນຜະລິດຂອງພວກເຂົາເຈົ້າ  ແລະທາງຮ້ານເອງກໍໄດ້ກາເຟລະດັບພຣີມຽມທຽບເທົ່າກັບກາເຟທີ່ສົ່ງໄປຂາຍໃນຮ້ານຊັ້ນນຳ ແຕ່ສາມາດຊື້ໄດ້ໃນລາຄາທີ່ຖືກກວ່າ.

ເມນູຂອງທາງຮ້ານຫຼັກໆແມ່ນກາເຟລົດຊາດຂ້ອນຂ້າງເຂັ້ມຂຸ້ນ ບໍ່ວ່າຈະເປັນຄາປູຊິໂນ, ມັອກຄາ, ລາເຕ້,... ມີບັນດາເຄື່ອງດື່ມເຊັ່ນ ໂກໂກ້, ຊາຂຽວເຂົ້າມາເສີມ. ນອກນີ້, ກໍມີຂອງຫວານຈໍາພວກເຄັກ, ເບີເກີລີ້, ແຊນວິດທີ່ທາງຮ້ານເຮັດເອງແບບສົດໃໝ່ ແລະໃນອະນາຄົດອາດຈະມີອາຫານຫວານຄາວເຂົ້າມາເພີ່ມຕື່ມເພື່ອເປັນທາງເລືອກໃຫ້ກັບລູກຄ້າ.

ບໍລິຫານກາເຟ ຕັ້ງຢູ່ບ້ານດົງໝ້ຽງ, ເມືອງຈັນທະບູລີ, ນະຄອນຫຼວງວຽງຈັນ ໃກ້ກັບສີ່ແຍກໄຟແດງໂຮງກາຍະສິນ ເປີດບໍລິການທຸກມື້ຕັ້ງແຕ່ 8:00-17:00 ເບີໂທລະສັບ: ໂອ່! ລືມບອກໄປ ທາງຮ້ານຍັງຮັບຈັດກາເຟ ແລະຂອງຫວານສົ່ງໃຫ້ກັບງານປະຊຸມ ແລະງານກິດຈະກຳຕ່າງໆ ພ້ອມທັງມີການຈັດສົ່ງແບບເດລິເວີຣີອີກເດີ. ສາມາດສອບຖາມໄດ້ທີ່ເບີໂທ: 020  234 56614. ຢ່າລືມແວ່ໄປອຸດໜຸນ ແລະເອີ້ນໃຊ້ເພິ່ນໄດ້.

 




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ