• ລາວໂທລະຄົມ ສະຫຼຸບວຽກງານການເຄື່ອນໄຫວ ປະຈໍາປີ 2018

ໂດຍ: ສີເປື້ອນມື 13 ກຸມພາ 2019 (15.59 ນ.) Read : 489

ໃນວັນທີ 13 ກຸມພາ 2019 ທາງບໍລິສັດ ລັດວິສາຫະກິດ ລາວ ໂທລະຄົມມະນາຄົມ ໄດ້ຈັດກອງປະຊຸມ ປະຈໍາປີ 2018 ຂຶ້ນຢ່າງເປັນທາງການ ທີ່ສໍານັກງານໃຫຍ່. ພາຍໃຕ້ການເປັນປະທານຂອງ ທ່ານ ຖາວອນ ສົມສະກຸນ ຜູ້ອໍານວຍການໃຫຍ່ ບໍລິສັດ ລັດວິສາຫະກິດ ລາວ ໂທລະຄົມມະນາຄົມ, ໃຫ້ກຽດເຂົ້າຮ່ວມມີ: ທ່ານ ປອ. ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ທ່ານ ສຸທິເດດ ປິ່ນທິພາ ຕົວແທນສະພາຂາຫຸ້ນຝ່າຍຕ່າງປະເທດ, ຜູ້ແທນຈາກ ລລທ ສູນກາງ ແລະສາຂາແຂວງທົ່ວປະເທດ.

ທ່ານ ຖາວອນ ສົມສະກຸນ ໄດ້ຂຶ້ນກ່າວບົດສະຫຼຸບຜົນງານການເຄື່ອນໄຫວໃນປີຜ່ານມາ ແລະວາງແຜນການໃນຕໍ່ໜ້າ ເຊິ່ງທ່ານໄດ້ຍົກໃຫ້ເຫັນເຖິງຜົນງານທີ່ພົ້ນເດັ່ນທີ່ ລາວໂທລະຄົມຍາດມາໄດ້ ເປັນຕົ້ນແມ່ນ ການລົງທຶນຂະຫຍາຍຕາໜ່າງລະບົບໂທລະຄົມມະນາຄົມ ໃນມູນຄ່າ 60 ລ້ານໂດລາສະຫະລັດ. ປັດຈຸບັນ ລາວ ໂທລະຄົມ ມີສະຖານີມືຖື 2G, 3G, 4G ແລະ4.5G ທັງໝົດ 6.653 ສະຖານີ, ມີສັນຍານໂທລະສັບມືຖືຄວບຄຸມໄດ້ທົ່ວ 18 ແຂວງ, 148 ເມືອງ, 8.500 ກວ່າບ້ານ; ໃນນີ້, 2G ກວມ 72%, 3G ກວມ 62%, 4G ກວມ 49% ແລະ4.5G ກວມ 22% ຂອງຕົວເມືອງໃຫຍ່.

ປັດຈຸບັນ ມີລູກຄ້າທີ່ຊົມໃຊ້ເຄືອຂ່າຍຂອງລາວໂທລະຄົມ ຈໍານວນ 1,6 ລ້ານ ໝາຍເລກ, ໂທລະສັບຕັ້ງໂຕະ 40.000 ໝາຍເລກ, ໂທລະສັບວິນໂຟນ 430.000 ໝາຍເລກ ແລະອິນເຕີເນັດ 1.4 ລ້ານ ລູກຄ້າ ເຊິ່ງສາມາດສ້າງລາຍຮັບໄດ້ທັງໝົດ 1.868.7 ຕື້ກີບ (ລວມອາກອນ) ໃນນັ້ນມີກໍາໄລ 322.7 ຕື້ກີບ, ພັນທະໃຫ້ລັດຖະບານ ຈໍານວນ 541.5 ຕື້ກີບ ແລະຊ່ວຍເຫຼືອສັງຄົມ 1.4 ຕື້ກວ່າກີບ.

ສໍາລັບແຜນການໃນຕໍ່ໜ້າ ລາວ ໂທລະຄົມຈະສູ້ຊົນສ້າງຖານລູກຄ້າໃໝ່ໃຫ້ເພີ່ມຂຶ້ນ ແລະສ້າງລາຍຮັບໃຫ້ໄດ້ຫຼາຍກວ່າປີ 2018 ເພີ່ມຂຶ້ນ 6,3% ແລະກໍາໄລເພີ່ມຂຶ້ນ 19,8% ແລະຄາດຄະເນວ່າ ຈະສາມາດມອບພັນທະ ແລະເງິນປັນຜົນໃຫ້ລັດຖະບານ ຈໍານວນ 579,5 ຕື້ກີບ. ນອກນັ້ນ, ຍັງຈະໄດ້ໃຊ້ທຶນເບື້ອງຕົ້ນ ສືບຕໍ່ປັບປຸງ ແລະຂະຫຍາຍຕາໜ່າງລະບົບໂທລະຄົມມະນາຄົມ ໂດຍສະເພາະແມ່ນອິນເຕີເນັດ ໃຫ້ຮັບປະກັນທາງດ້ານປະລິມານ ແລະຄຸນນະພາບ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ

  • LaoTelecom