• ຄຳມ່ວນ ເຮັດແທ້! ຄວບຄຸມລາຄາສິນຄ້າຕາມທ້ອງຕະຫລາດ

ໂດຍ: ສີເປື້ອນມື 08 ກຸມພາ 2019 (14.35 ນ.) Read : 161

      ໃນວັນທີ 6 ກຸມພາ 2019 ເຈົ້າໜ້າທີ່ກວດກາສິນຄ້າຂະແໜງການຄ້າພາຍໃນ ພະແນກອຸດສາຫະກຳ ແລະການຄ້າ ແຂວງ ຄຳມ່ວນ ໄດ້ລົງເຄື່ອນໄຫວກວດກາຕິດຕາມຄວບຄຸມ ລາຄາສິນຄ້າປະເພດຊີ້ນ, ເຂົ້າ, ປາ ແລະອາຫານແຫ້ງ ຕາມບັນດາຫ້າງຮ້ານໃນຕະຫລາດໃຫຍ່ ຫລັກ 02 ແລະ ຕະຫລາດນາໂບ ເນື່ອງໃນໂອກາດບຸນປີໃໝ່ຂອງພີ່ນ້ອງຊາວຫວຽດນາມ ແລະຊາວຈີນ ລວມເຖິງບຸນນະມັດ ສະ ການພຣະທາດສີໂຄດຕະບອງ ປະຈຳປີ 2019 ທີ່ຈະໄດ້ຈັດຂຶ້ນໃນໄວໆນີ້.

ເພື່ອສະກັດກັ້ນບໍ່ໃຫ້ບັນດາຜູ້ປະກອບການ, ພໍ່ຄ້າ, ແມ່ຄ້າ ຂາຍເຄື່ອງບໍລິໂພກບາງກຸ່ມ ສວຍໂອກາດຂຶ້ນລາຄາສິນຄ້າໂດຍພາລະການ ແລະລະເມີດລະບຽບຄ້າຂາຍ ຕາມໂຄງປະກອບລາຄາສິນຄ້າທີ່ລັດກຳນົດໄວ້.

ທ່ານ ບຸນໂຮມ ມຸກດາສັກ ຮອງຫົວໜ້າໜ້າພະແນກອຸດສາຫະກຳ ແລະການຄ້າແຂວງ ຄໍາມ່ວນ ໄດ້ກ່າວວ່າ: ການລົງກວດກາຄັ້ງນີ້ ເປັນການປ້ອງກັນ ບໍ່ໃຫ້ຊາວຄ້າ-ຂາຍ ເອົາລັດເອົາປຽບຕໍ່ຜູ້ບໍລິໂພກໂດຍສະເພາະແມ່ນລາຄາຊີ້ນໝູ, ຊີ້ນງົວ, ຊີ້ນຄວາຍ, ຊີ້ນປາ ແລະສິນຄ້າປະເພດເຂົ້າ. ສະນັ້ນ, ຂະແໜງ ການຄ້າພາຍໃນ ຈຶ່ງເພີ່ມຄວາມເຂັ້ມງວດໃນການຕິດຕາມ, ກວດກາ, ພ້ອມທັງຮຽກຮ້ອງມາຍັງຄະນະຮັບຜິດຊອບຈັດສັນຕະຫລາດແຕ່ລະແຫ່ງຈົ່ງໃຫ້ການຮ່ວມມື ແລະອຳນວຍຄວາມສະດວກ ໃນການປະຕິບັດງານຂອງເຈົ້າໜ້າທີ່, ມີສ່ວນຮ່ວມໃນການແກ້ໄຂຕໍ່ບັນຫາດັ່ງກ່າວໃຫ້ຫລາຍຂຶ້ນ.

ພ້ອມທັງຢ້ຳໃຫ້ບັນດາຜູ້ປະກອບການຄ້າ-ຂາຍ ເອົາໃຈໃສ່ເປັນເຈົ້າການປະຕິບັດລະບຽບການຄ້າຂາຍຕາມໂຄງປະກອບແຈ້ງລາຄາສິນຄ້າທີ່ທາງພະແນກ ອຸດສາຫະກໍາ ແລະການຄ້າ ໄດ້ວາງອອກ ແລະຖ້າຫາກພົບເຫັນການເອົາລັດເອົາປຽບດ້ານລາຄາ ສາມາດແຈ້ງ ຫລືໂທລະສັບ ແຈ້ງສາຍດ່ວນ 1510 ໄດ້ 24 ຊົ່ວໂມງ ເພື່ອໃຫ້ປະຊາຊົນຂໍຄວາມເປັນທຳ.

ຂໍ້ມູນ: ປະເທດລາວ


ທີ່ມາ: ຂ່າວປະເທດລາວ
  • ຮູບພາບ

  • ແທັກທີ່ກ່ຽວຂ້ອງ