• ສາທາລະນະສຸກ ອາດສະພັງທອງ ສະຫຼຸບວຽກງານ ປີ 2018

ໂດຍ: ສີເປື້ອນມື 31 ມັງກອນ 2019 (13.52 ນ.) Read : 239

ໃນວັນທີ 25 ມັງກອນ 2019 ນີ້, ຫ້ອງການສາທາລະນະສຸກ ເມືອງ ອາດສະພັງທອງ ໄດ້ຈັດພິທີສະຫຼຸບການເຄື່ອນໄຫວວຽກງານໃນໄລຍະ 1 ປີ ຜ່ານມາ 2018 ແລະວາງທິດທາງແຜນການໃນ 1 ປີຕໍ່ໜ້າ 2019 ຂຶ້ນຢ່າງເປັນທາງການ, ໂດຍພາຍໃຕ້ການເຂົ້າຮ່ວມ ເປັນປະທານຂອງທ່ານ ສຸລິໂຍ ສີລາວົງ ຄະນະປະຈໍາພັກເມືອງ ຮອງເຈົ້າເມືອງ ອາດສະພັງທອງ ທັງເປັນປະທານກໍາມະທິການສົ່ງເສີມສຸຂະພາບແມ່ຍິງ ແລະເດັກນ້ອຍຂັ້ນເມືອງ, ມີ ທ່ານ ນາງ ດຣ ຈັນດອນ ມະນີພູໃສ ຮອງຫົວໜ້າພະແນກສາທາລະນະສຸກແຂວງ, ນອກນັ້ນ, ຍັງມີກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ທະຫານ, ຕໍາຫຼວດພະນັກງານລັດຖະກອນພາຍໃນຫ້ອງການ, ຫົວໜ້າສຸກສາລາ 8 ແຫ່ງຕະຫຼອດຮອດບັນດານາຍບ້ານທີ່ຖືກເຊິນກໍໄດ້ເຂົ້າຮ່ວມ.
        ໃນພິທີ, ທ່ານ ນາງ ສຸພາບ ອິນສີຊຽງໃໝ່ ກໍາມະການພັກເມືອງ ຫົວໜ້າຫ້ອງການສາທາ ລະນະສຸກເມືອງອາດສະພັງທອງ ໄດ້ກ່າວວ່າ: ໃນໄລຍະ 1 ປີ ຜ່ານມາ, ຫ້ອງການສາທາລະນະສຸກເມືອງ ກໍຄືໂຮງໝໍເມືອງ ອາດສະພັງທອງແມ່ນໄດ້ກວດທ້ອງແມ່ມານກ່ອນຄອດໄດ້ 1.234 ຄົນ, ເທົ່າກັບ 107,16%, ເກີດລູກຢູ່ສະຖານທີ່ບໍລິການໄດ້ 847 ຄົນ, ເທົ່າກັບ 73,08%, ເກີດລູກມີແພດຊ່ວຍໄດ້ 873 ຄົນ, ເທົ່າກັບ 75,32%, ເກີດລູກຢູ່ບ້ານມີແພດຊ່ວຍໄດ້ 26 ຄົນ, ເທົ່າກັບ 2,24%, ກວດແມ່ຫຼັງເກີດລູກ (3 – 42 ວັນ) ໄດ້ 814 ຄົນ, ເທົ່າກັບ 70,23%, ວາງແຜນຄອບຄົວ ( ກໍລະນີໃໝ່) ໄດ້ 861 ຄົນ, ເທົ່າກັບ 7,43%, ວາງແຜນຄອບຄົວ (ກໍລະນີສືບຕໍ່) ໄດ້ 6254 ຄົນ, ເທົ່າກັບ 53,89%, ກວດສຸຂະພາບເດັກດີ (ກໍລະນີໃໝ່) ໄດ້ 3452 ຄົນ, ເທົ່າກັບ 65,14% ແລະກວດເດັກນ້ອຍກິນນໍ້ານົມ ແມ່ພຽງຢ່າງດຽວຮອດອາຍຸ 6 ເດືອນ ໄດ້ເທົ່າກັບ 65,73%.

ນອກນັ້ນ, ໃນກອງປະຊຸມຍັງ ໄດ້ວາງທິດທາງແຜນການຕໍ່ໜ້າ ໂດຍທ່ານໄດ້ເນັ້ນໃສ່ວຽກງານບໍລິການສັກຢາກັນພະຍາດແມ່ນສູ້ຊົນສັກຢາກັນພະຍາດວັນນະໂລກໃຫ້ເດັກນ້ອຍລຸ່ມ 1 ປີໃຫ້ໄດ້ 98%, ສັກຢາກັນພະຍາດອັກເສບຕັບບີດຽວໃຫ້ໄດ້ 85%, ຢອດຢາກັນ ເປ້ຍຫຼ່ອຍເຂັມທີ 3 ເດັກຕໍ່າກວ່າ 1 ປີ ໃຫ້ໄດ້ 95 % ແລະສັກຢາ ກັນພະຍາດອື່ນໆອີກຈໍານວນໜຶ່ງຕື່ມອີກດ້ວຍ.

ພ້ອມດຽວກັນນີ້; ໃນພິທີດັ່ງກ່າວກໍໄດ້ຈັດ ພິທີມອບ-ຮັບໃບຢັ້ງຢືນເອົາ 5 ບ້ານຄື: ບ້ານ ດົງຂວາງ, ນາໄລ່ດົງ, ຫ້ວຍ, ສະພັງແກ້ວ ແລະບ້ານສາມັກຄີໄຊ ທີ່ຂຶ້ນກັບເມືອງ ອາດສະພັງທອງ ເປັນບ້ານສາທາລະນະສຸກແບບຢ່າງ ເຊິ່ງໃຫ້ກຽດມອບໃບຢັ້ງຢືນໂດຍ ທ່ານ ສຸລິໂຍ ສີລາວົງ ຄະນະປະຈໍາພັກເມືອງຮອງເຈົ້າເມືອງ ອາດສະພັງທອງ ທັງເປັນປະທານກໍາມະທິການສົ່ງເສີມສຸຂະພາບແມ່ຍິງ ແລະເດັກ ນ້ອຍຂັ້ນເມືອງໃຫ້ກຽດມອບຢ່າງສົມກຽດໂດຍຊ້ອງໜ້າກັບບັນດາແຂກຜູ້ເຂົ້າຮ່ວມເປັນສັກຂີພະຍານນໍາດ້ວຍ.

ແຫຼ່ງຂ່າວ: ສະຫວັນພັດທະນາ ຂ່າວ / Savanhphuttana News



ທີ່ມາ: ສະຫວັນພັດທະນາ ຂ່າວ / Savanhphuttana News
  • ແທັກທີ່ກ່ຽວຂ້ອງ