• ແອບເປີ້ນ ອາດຫຼຸດລາຄາ iPhone ໃນບາງປະເທດ

ໂດຍ: ສີເປື້ອນມື 31 ມັງກອນ 2019 (10.42 ນ.) Read : 178

ສໍານັກຂ່າວຕ່າງປະເທດລາຍງານຈາກເມືອງ ຊານຟຣານຊິດໂກ ສະຫະລັດອາເມຣິກາ ໃນວັນທີ 30 ມັງກອນ 2019 ບໍລິສັດແອັບເປີ້ນໄດ້ລາຍງານວ່າ: ລາຍໄດ້ຈາກການຈໍາໜ່າຍໄອໂຟນທຸກລຸ້ນ ຖືເປັນສິນຄ້າຫຼັກຂອງບໍລິສັດ ຫຼຸດລົງເຖິງ 15% ໃນໄຕມາດຫຼ້າສຸດ ເຊິ່ງສິ້ນສຸດເມື່ອທ້າຍປີ 2018 ສ່ວນລາຍໄດ້ທັງໝົດຂອງບໍລິສັດໃນພາບລວມແມ່ນ 84.300 ລ້ານໂດລາສະຫະລັດ ຫຼຸດລົງ 5% ຈາກປີຜ່ານມາ ໂດຍໄອໂຟນລຸ້ນຫຼ້າສຸດຂອງແອັບເປີ້ນຄື “iPhone xs” ໃນເດືອນກັນຍາປີ 2018 ລາຄາຢູ່ທີ່ເລີ່ມຕົ້ນ 999 ໂດລາສະຫະລັດ.

ປັດຈຸບັນ ທ່ານ ທິມ ຄຸກ ປະທານຄະນະເຈົ້າໜ້າທີ່ບໍລິຫານ (CEO) ຂອງແອັບເປິ້ນ ກໍາລັງຫາລືກັບທີມງານເພື່ອ ປັບປ່ຽນລາຄາຈໍາໜ່າຍຂອງໄອໂຟນ ບາງລຸ້ນໃນຕະຫຼາດ ໃນບາງປະເທດເພື່ອໃຫ້ສອດຄ້ອງກັບສະຖຽນລະພາບຂອງສະກຸນເງິນທ້ອງຖິ່ນ ໃນປະເທດນັ້ນເມື່ອທຽບກັບສະກຸນເງິນໂດລາສະຫະລັດທີ່ແຂງຄ່າຂຶ້ນໃນຊ່ວງນີ້ ເຊິ່ງຫາກເປັນຄວາມຈິງຈະຖືເປັນຄັ້ງທີ 2 ໃນຮອບ 12 ປີທີ່ ບໍລິສັດ ແອັບເປີ້ນ ປັບຫຼຸດລາຄາຈໍາໜ່າຍໄອໂຟນ ແຕ່ເຫດຜົນຂອງການປັບຫຼຸດລາຄາໄອໂຟນຄັ້ງທໍາອິດໃນປີ 2007 ຕາມແນວຄິດຂອງທ່ານ ສະຕີຟ ຈ໊ອບ ຜູ້ບໍລິຫານສູງສຸດຂອງ ບໍລິສັດ ແອັບເປີ້ນ ໃນເວລານັ້ນ ເປັນເຫດຈາກອຸປະສັກຕ່າງໆຢ່າງຫຼວງຫຼາຍ.

ເຖິງຢ່າງໃດກໍຕາມ ລາຍງານຂອງແອັບເປີ້ນ ຍັງບໍ່ໄດ້ລະບຸວ່າ ໄອໂຟນໃດທີ່ຈະມີການປັບຫຼຸດລາຄາ ແລະຕະຫຼາດຂອງປະເທດໃດແດ່ ທີ່ຈະໄດ້ຮັບໂອກາດນີ້ ແຕ່ມີຄວາມເປັນໄປໄດ້ວ່າ ພູມີພາກຈີນເຊິ່ງລວມເຖິງຈີນແຜ່ນດິນໃຫຍ່, ຮົງກົງ, ມາເກົ້າ ແລະໃຕ້ຫວັນ ຈະຢູ່ໃນແຜນການນີ້ ເນື່ອງຈາກຫາກຈໍາແນກອອກເປັນພູມີພາກພົບວ່າ: ຍອດຈໍາໜ່າຍໄອໂຟນໃນຈີນ ຕົກລົງຫຼາຍກວ່າ 25% ເຊິ່ງຜູ້ບໍລິການແອັບເປີ້ນກ່າວວ່າ ເປັນຜົນມາຈາກສົງຄາມການຄ້າລະຫວ່າງສະຫະລັດກັບຈີນ ແລະກໍລະນີນີ້ພາດເຖິງເລື່ອງຫົວເຫວີຍທີ່ເປັນຕົວຈູດກະແສຊາດນິຍົມໃນຈີນໃຫ້ລຸກຂຶ້ນຢ່າງແຮງ.

ຂໍ້ມູນ: ABC Laos news ສຳນັກຂ່າວເອບີຊີລາວ


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ