• ຮ້ານອາຫານຄັກໆ ຊາວຕ່າງຊາດມັກແຮງ

ໂດຍ: ດວງຕາວັນ 24 ສິງຫາ 2018 (13.53 ນ.) Read : 1,841

ຊວນຊິມສະບາຍດີ! ສະບັບນີ້ພວກເຮົາຈະພາໄປຮູ້ຈັກກັບຮ້ານອາຫານຈຳນວນໜຶ່ງ ທີ່ນິຍົມໃນໝູ່ນັກທ່ອງທ່ຽວ ແລະຊາວຕ່າງຊາດ ອາດຈະເປັນເພາະບັນຍາກາດ, ສະຕາຍຂອງຮ້ານ, ເມນູອາຫານ ຫຼືອີ່ຫຍັງກໍຕາມແຕ່ ເຮົາລອງໄປຮູ້ຈັກພ້ອມໆກັນເລີຍ ບາງຄັ້ງອາດຈະເປັນແນວທາງໃຫ້ທ່ານໄດ້ລອງໄປສຳຜັດກໍເປັນໄດ້.

1. ຮ້ານອາຫານໂດຍຂ້ານ້ອຍ.
ໂດຍຂ້ານ້ອຍ ເປັນຮ້ານອາຫານລາວຕົ້ນຕຳລັບ ທີ່ມີເອກະລັກສະເພາະໂຕ ເລີ່ມຕົ້ນຈາກການຕົບແຕ່ງຮ້ານ, ບັນຍາກາດທີ່ຄ້າຍໆຄືກັບນັ່ງຮັບປະທານອາຫານຢູ່ເຮືອນ ແລະພິເສດໄປກວ່ານັ້ນຄືເມນູອາຫານຈະຖືກປ່ຽນໄປໃນທຸກໆມື້ ແລະມີເມນູອາຫານຕາມລະດູການ ເຊັ່ນ ລະດູເຫັດປົ່ງ ກໍຈະມີແກງເຫັດທຳມະຊາດ, ຍາມໃດມີໄຂ່ມົດ ທາງຮ້ານກໍຈະມີເມນູໄຂ່ມົດໃຫ້ລູກຄ້າໄດ້ຮັບປະທານຢ່າງອີ່ມໜຳສຳລານດ້ວຍລົດຊາດທີ່ເປັນລາວແທ້ໆ 100% ເຮັດໃຫ້ຮ້ານນີ້ເປັນທີ່ຖືກອົກຖືກໃຈຊາວຕ່າງຊາດທີ່ຢາກຮູ້ຈັກອາຫານລາວໃຫ້ຫຼາຍຂຶ້ນ.
ຮ້ານໂດຍຂ້ານ້ອຍ ຕັ້ງຢູ່ບ້ານ ນາໄຊ ເມືອງໄຊເສດຖາ ນະຄອນຫຼວງວຽງຈັນ (ກ່ອນຈະຮອດສະຖານທູດຍີ່ປຸ່ນ) ເປີດບໍລິການຕັ້ງແຕ່ວັນ ອັງຄານ-ວັນອາທິດ ໂທລະສັບ: 020 55898959. ອັບເດດເມນູອາຫານທຸກໆມື້ໄດ້ທີ່ facebook: Doi Ka Noi

2. Kung Café ກຸ້ງກາເຟລາວ
ຫາກຈະຄິດເຖິງຄາເຟ່ແລ້ວ ຫຼາຍຄົນອາດຄິດເຫັນຮ້ານໃຫຍ່ໆຕົບແຕ່ງຢ່າງຫຼູຫຼາທີ່ຕັ້ງຢູ່ກາງຕົວເມືອງ ແຕ່ສຳລັບຮ້ານນີ້ຄົນລະເລື່ອງເລີຍຂໍບອກ! ກຸ້ງກາເຟລາວ ຫຼື Kung Café ເປັນຮ້ານນ້ອຍໆທີ່ຖືກປະຍຸກຈາກເຮືອນຊົງເກົ່າໆໃຫ້ກາຍມາເປັນມຸມນັ່ງກິນ-ນັ່ງດື່ມສຸດຊິວ ແລະແນ່ນອນ! ມັນຄືສະຕາຍທີ່ແປກ ແຫກແນວ, ມີສະເໜ່ສະເພາະໂຕ ຈົນຊາວຕ່າງຊາດຫຼາຍຄົນກາຍເປັນຂາຍປະຈຳເລີຍກໍວ່າໄດ້. ມາລອງເບິ່ງເດີ! ກາແຟຮ້ານນີ້ຫອມສຸດໆ ແຖມລາຄາກໍຖືກນຳອີກ.
Kung Café ຕັ້ງຢູ່ບ້ານເພຍວັດ, ເມືອງຈັນທະບູລີ ນະຄອນຫຼວງວຽງຈັນ ເປີດທຸກໆມື້ຕັ້ງແຕ່ 7:00-15:00 ໂທລະສັບ: 021 219101. Facebook: Kung’café Lao

3. ຮ້ານຊຸ່ມໄກ່ (La Cage Du Coq)
ຊື່ຮ້ານຊຸ່ມໄກ່ ແຕ່ຂາຍອາຫານຝຣັ່ງ ຟັງແລ້ວອາດຂັດຫູ. ແຕ່ພໍແວ່ເຂົ້າໄປສໍາຜັດແລ້ວ ເປັນອີ່ຫຍັງທີ່ແປກຫູແປກຕາ ແລະລົງໂຕຫຼາຍ. ຊຸ່ມໄກ່ ນອກຈາກຈະມີອາຫານຝຣັ່ງຄຸນນະພາບດີແລ້ວ ຍັງເປັນບ່ອນນັ່ງດື່ມວາຍຊິວໆຟັງເພງສະບາຍສະບາຍອີກບ່ອນໜຶ່ງໃນຍ່ານກາງເມືອງທີ່ທ່ານຕ້ອງມາລອງຈັກຄັ້ງ ເຊັ່ນດຽວກັບບັນດານັກທ່ອງທ່ຽວຊາວຕ່າງຊາດທີ່ພັກຢູ່ໃນບໍລິເວນໃກ້ຄຽງ.
ຮ້ານຊຸ່ມໄກ່ ຕັ້ງຢູ່ບ້ານຫາຍໂສກ, ເມືອງຈັນທະບູລີ, ນະຄອນຫຼວງວຽງຈັນ (ຕິດກັບໂຮງແຮມໄວຍາກອນ) ເປີດບໍລິການທຸກມື້ ຍົກເວັ້ນວັນ ອັງຄານ ຕັ້ງແຕ່ເວລາ 11:00-14:30 ແລະ 17:30-21:30. Facebook: La Cage Du Coq.

4. ຂອບໃຈເດີ
ຕົບທ້າຍດ້ວຍຮ້ານອາຫານເຈົ້າເກົ່າ ທີ່ເປີດມາຢ່າງຍາວນານ ຈົນເປັນທີ່ຮູ້ຈັກກັນດີຂອງທັງຊາວລາວ ແລະຊາວຕ່າງຊາດ ດ້ວຍຈຸດເດັ່ນຂອງທາງຮ້ານທີ່ມີອາຫານຢ່າງຫຼາກຫຼາຍ ບໍ່ວ່າຈະເປັນອາຫານລາວ, ອາຫານຍີ່ປຸ່ນ ຫຼືອາຫານທາງຝັ່ງຕາເວັນຕົກ ເອີ້ນໄດ້ວ່າມາແລ້ວ ຈະໄດ້ຮັບປະທານອາຫານເກືອບທຸກຮູບແບບ ແລະມີໂຊນທີ່ເປັນບາ ສຳລັບຜູ້ທີ່ຢາກມາດື່ມ ຫຼືສັງສັນ. ຮ້ານນີ້ຖືໄດ້ວ່າເປັນຮ້ານທີ່ນັກທ່ອງທ່ຽວບອກຕໍ່ໆກັນຫຼາຍທີ່ສຸດອີກຮ້ານໜຶ່ງເລີຍກໍວ່າໄດ້.
ຮ້ານອາຫານຂອບໃຈເດີຕັ້ງຢູ່ຂ້າງນໍ້າພຸ ເປີດບໍລິການທຸກໆມື້ ແລະຍັງມີອີກໜຶ່ງຮ້ານ ທີ່ເປັນເຈົ້າຂອງດຽວກັນ ນັ້ນກໍຄື Sun Tara ຕັ້ງຢູ່ແຄມຂອງ ຍ່ານ walking street .





ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ