• ການນໍາແຂວງໄຊຍະບູລີ ວາງພວງມະລາຢູ່ສຸສານທະຫານໃນວັນສ້າງຕັ້ງກອງທັບຄົບຮອບ 70 ປີ

ໂດຍ: Admin Mahason 23 ມັງກອນ 2019 (09.37 ນ.) Read : 164

     ເນື່ອງໃນໂອກາດວັນສ້າງຕັ້ງກອງທັບປະຊາຊົນປະຕິວັດລາວຄົບຮອບ 70 ປີ ທີ່ໝູນ ວຽນມາອີກວາລະໜຶ່ງນັ້ນ, ໃນ ວັນທີ 18 ມັງກອນ 2019, ການນໍາຂອງແຂວງໄຊຍະບູລີ, ນໍາໂດຍ ທ່ານ ພົງສະຫວັນ ສິດທະວົງ, ເຈົ້າແຂວງໆ ໄຊຍະບູລີ, ໄດ້ໄປວາງກະຕ່າດອກໄມ້ທີ່ອານຸສອນສະຖານທ່ານ ປະທານ ໄກສອນ ພົມວິຫານ. ໃນໂອກາດນີ້, ທ່ານ ພົນຈັດຕະວາ ຄໍາໝັ້ນ ວັນນະວົງ, ຫົວໜ້າການເມືອງກອງບັນຊາ ການທະຫານແຂວງ ໄດ້ຜ່ານບົດສະດຸດດີ, ທ່ານໄດ້ກ່າວວ່າ: ປະທານ ໄກສອນ ພົມວິຫານ ແມ່ນປັນຍາຊົນຜູ້ຍິ່ງໃຫຍ່ທີ່ມີນ້ຳໃຈຮັກຊາດອັນດູດດື່ມ ແລະ ຮັກແພງປະຊາຊົນ ບັນດາເຜົ່າຢ່າງສຸດຊຶ້ງ. ຕະຫຼອດໄລຍະແຫ່ງການຕໍ່ສູ້ປົດປ່ອຍປະເທດຊາດ ຍາມໃດປະທານກໍ່ໄດ້ອຸທິດຕົນເພື່ອຊາດ ເພື່ອປະຊາຊົນ, ມີນ້ຳໃຈເດັດດ່ຽວ ອົງອາດກ້າຫານ, ດຸໝັ່ນຂະຫຍັນພຽນ, ມີທັດສະນະມະຫາຊົນສະເໝີຕົ້ນ ສະເໝີປາຍ ທັງນຳໜ້າດ້ານທິດສະດີ ແລະ ເປັນແບບຢ່າງໃນພາກປະຕິບັດຕົວຈິງ ໃນສະໄໝການປະຕິວັດຊາດ ປະຊາທິປະໄຕ, ມີຫຼາຍບັ້ນຮົບທີ່ທ່ານປະທານໄດ້ເຂົ້າຮ່ວມບັນຊາໂດຍກົງ, ປະທານເປັນນັກທິດສະດີ, ນັກກົດໝາຍ, ນັກໂຄສະນາ ຂົນຂວາຍທີ່ເກັ່ງ, ສາມາດເປັນຕົວແທນ, ເປັນຄັນທຸງນຳໜ້າ, ເປັນແກນນຳ, ແລະ ເປັນເສົາຄ້ຳໃນການເຕົ້າໂຮມຄວາມສາມັກຄີ ພາຍໃນ ພັກ.
     ຈາກນັ້ນ, ບັນດາທ່ານການນໍາຂອງແຂວງ ກໍ່ໄດ້ເຂົ້າວາງພວງມະລາທີ່ສຸສານທະຫານ, ທັງນີ້ກໍ່ເພື່ອເປັນການໄຫວ້ອາໄລ ແລະ ລະນຶກເຖິງບຸນຄຸນ ແລະ ຄຸນງາມຄວາມດີຂອງດວງວິນຍານພະນັກງານ-ນັກຮົບປະຕິວັດທີ່ໄດ້ເສຍສະຫລະຊີວິດເລືອດເນື້ອໃນປາງສົງຄາມ, ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ແລະ ເພື່ອປະຊາຊົນໃນໄລຍະຕໍ່ສູ້ກູ້ຊາດ, ເພື່ອຍາດເອົາເອກະລາດ ແລະ ຜືນແຜ່ນດິນອັນຄົບຖ້ວນຂອງຊາດ, ເວົ້າລວມ, ເວົ້າສະເພາະ ກໍ່ແມ່ນເຂດນໍ້າແດນດິນຂອງແຂວງ ໄຊຍະບູລີ ໄວ້ໃຫ້ໝັ້ນຄົງ.

ທີ່ມາ: ABC Laos News
  • ຮູບພາບ

  • ແທັກທີ່ກ່ຽວຂ້ອງ