• Au8ust Café ລົດຊາດກາເຟຍອດຢ້ຽມລະດັບພຣີມ້ຽມ

ໂດຍ: ດວງຕາວັນ 13 ກໍລະກົດ 2018 (11.16 ນ.) Read : 2,484

ສະບາຍດີທ່ານຜູ້ອ່ານ ມື້ນີ້ພວກເຮົາຂໍເອົາໃຈຄໍກາເຟ ກັບຄາເຟ້ທີ່ບໍ່ໄດ້ມີດີພຽງບັນຍາກາດແຕ່ລົດຊາດກາເຟກໍຍອດຢ້ຽມລະດັບພຣີມຽມເຊັ່ນດຽວກັນ.
AUGUST Café ເປັນຄາເຟ່ທີ່ເປີດໃໝ່ທີ່ຜູ້ຂຽນລອງຍ່າງເຂົ້າໄປໂດຍບັງເອີນຕາມພາສາຄົນມັກຊີມ ອິອິ ບັນຍາກາດໂດຍລວມຖືວ່າຕົບແຕ່ງອອກມາໄດ້ຢ່າງສວຍງາມ, ເປັນລະບຽບຮຽບຮ້ອຍ ເປັນຕາເຂົ້າໄປນັ່ງ ໂດຍທາງຮ້ານຈະມີທັງໝົດ 2 ຊັ້ນ ແບບເປັນຫຼາຍໂຊນ, ໃຫ້ຄວາມຮູ້ສຶກຫຼາກຫຼາຍອາລົມ ອາດເວົ້າໄດ້ວ່າມາຮ້ານນີ້ຮ້ານດຽວ ໄດ້ຮູບ 108 ມຸມໃຫ້ໂພສລົງອິນສະຕຣາແກມເລີຍລະ! ທີ່ສຳຄັນ ຍັງມີມຸມເປັນຫ້ອງຂອງຫຼິ້ນ ເພື່ອອຳນວຍຄວາມສະດວກໃຫ້ກັບລູກຄ້າ ທີ່ມີລູກນ້ອຍຕິດສ້ອຍຫ້ອຍຕາມມານຳ ເວລານັດແຂກມາລົມວຽກ ຫຼື ມາກັນແບບຄອບຄົວ ສ່ວນຣົດຊາດກາເຟນັ້ນຫວາ...ຍົກໂປ້ໃຫ້ເລີຍ!

ເຈົ້າຂອງຮ້ານໄດ້ເລົ່າໃຫ້ຟັງວ່າ ຄາເຟ້ດັ່ງກ່າວຫາກໍເປີດແບບ Soft opening ເມື່ອເດືອນກຸມພາທີ່ຜ່ານມາ ດ້ວຍເຫດຜົນທີ່ວ່າເຈົ້າຂອງຮ້ານເປັນຜູ້ທີ່ມາຄວາມຫຼົງໄຫຼໃນກາເຟ ແລະຂອງຫວານ ເລີຍຕັດສິນໃຈໄປຮຽນເຮັດກາເຟໂດຍກົງຈາກປະເທດເພື່ອນບ້ານກ່ອນຈະກັບມາເປີດຄາເຟ່ເປັນຂອງຕົນເອງ ນອກຈາກນີ້ ກໍຍັງ ມີທິມງານມືອາຊີບມາເປັນຜູ້ເບິ່ງແຍງຕັ້ງແຕ່ຂັ້ນຕອນເລືອກເຟັ້ນກາເຟເກຣດພຣີມຽມ, ການຂົ້ວບົດ ລວມໄປເຖິງການຊົງ ເອີ້ນວ່າໃສ່ໃຈກັນແບບຈອກຕໍ່ຈອກຈົນໄປເຖິງຂັ້ນຕອນການເສີບໃຫ້ກັບລູກຄ້າກັນເລີຍ.

ສ່ວນເມນູອື່ນໆທີ່ສາມາດຮັບປະທານເຂົ້າກັນເປັນຢ່າງດີກໍແມ່ນຈຳພວກຂອງຫວານ ເຊັ່ນ ຄຸກກີ້,ເຄັກ, ຊີສເຄັກຕ່າງໆ ທີ່ທາງຮ້ານປຸງແຕ່ງເອງທຸກເມນູ ສົດໃໝ່ແບບມື້ຕໍ່ມື້ ຈຸດພິເສດຂອງຂອງຫວານເຫຼົ່ານີ້ແມ່ນຈະມີລັກສະນະຄ້າຍຄືເຂົ້າໜົມຢີ່ປຸ່ນ ຫຼາຍກວ່າທາງຕາເວັນຕົກ ນັ້ນກໍຄືຫຼຸດຜ່ອນປະລິມານຄຣີມ, ຄວາມຫວານ, ເນັ້ນການໃຊ້ໝາກໄມ້ສົດຕາມລະດູການ, ບໍ່ແຕ່ງສີແຕ່ງກິ່ນ ເພື່ອໃຫ້ກາຍເປັນອາຫານຫວ່າງແບບເບົາໆເອົາໃຈສາວໆທີ່ຮັກສຸຂະພາບໂດຍສະເພາະ ແຕ່ໃນຕໍ່ໜ້າທາງຮ້ານຈະໄດ້ເພີ່ມເມນູອາຫານເພື່ອສຸຂະພາບຕື່ມອີກ.

AUGUST Café ຕັ້ງຢູ່ຖະໜົນໂພນສີນວນ ເປີດບໍລິການທຸກມື້ຕັ້ງແຕ່ເວລາ 9:00-19:00 ທ່ານສາມາດຕິດຕາມຂໍ້ມູນໄດ້ທີ່ເພຈ໌ Au8ust Café and Bakery ເບີໂທລະສັບ 020 566 55459.

ພິເສດໃນໄລຍະນີ້ທາງຮ້ານຍັງມີການສະສົມແຕ້ມໃຫ້ກັບລູກຄ້າເພື່ອແລກຮັບເຄື່ອງດື່ມ ແລະຂອງຫວານຟຣີອີກດ້ວຍ.






ທີ່ມາ: Photos by: ZaZa, Kaewkun, August café
  • ຮູບພາບ

  • ແທັກທີ່ກ່ຽວຂ້ອງ