• ອົງການກາແດງລາວ ຊ່ວຍເຫລືອປະຊາຊົນເມືອງສະໝາມໄຊຫລາຍກວ່າ ພັນລ້ານ ກີບ

ໂດຍ: Admin Mahason 22 ມັງກອນ 2019 (09.48 ນ.) Read : 171

     ຂປລ.ໃນວັນທີ 13-18 ມັງກອນ 2019, ອົງການກາແດງລາວ ໄດ້ໃຫ້ຄວາມຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ ຈາກສັນເຄື່ອນເຊປຽນ-ເຊນຳ້ນ້ອຍແຕກ ເມື່ອປີຜ່ານມາ ແລະ ໄດ້ສ້າງຄວາມເສຍຫາຍທາງດ້ານຊີວິດຊັບສິນ ເປັນຈຳນວນຫລວງຫລາຍ ແລະ ອົງການກາແດງລາວ ກໍໄດ້ປະກອບສ່ວນຊ່ວຍເຫລືອ ທາງດ້ານວັດຖຸສິ່ງຂອງ ໃຫ້ພໍ່ແມ່ປະຊາຊົນຢູ່ເມືອງດັ່ງກ່າວ, ມາຮອດປັດຈຸ ບັນ ໄດ້ສືບຕໍ່ໃຫ້ການຊ່ວຍເຫລືອເປັນເງິນສົດ 1.047 ລ້ານກີບ, ໃນຈໍານວນ 1.464 ຄອບຄົວ, 6.127 ຄົນ, 9 ບ້ານທີ່ໄດ້ຮັຜົນກະທົບຈາກໄພນຳ້ຖ້ວມ ມີ ບ້ານໃໝ່, ທ່າຫີນ, ທ່າອ້ວນ, ດອນມ່ວງ, ທ່າແສງຈັນ, ຫີນລາດສະໜອງ, ຕາມໍຢອດ ແລະ ບ້ານປີນດົງ.
      ການໃຫ້ຄວາມຊ່ວຍເຫລືອໃນຄັ້ງນີ້, ຄອບຄົວທີ່ມີຈຳນວນຄົນ 1-4 ຄົນແມ່ນໄດ້ຮັບເງິນ ຄອບຄົວລະ 6 ແສນກີບ, ຄອບຄົວທີ່ມີ 5 ຄົນຂຶ້ນໄປ ແມ່ນໄດ້ຮັບເງິນ 9 ແສນກີບ ຢູ່ ທີ່ສູນພັກເຊົາ 4 ສູນ. ຕາງໜ້າກ່າວມອບໂດຍ, ທ່ານ ທອງພະຈັນ ສອນນະສິນ ຮອງປະທານອົງການກາແດງລາວ, ມີພະແນກແຮງງານສະຫວັດດີການ-ສັງຄົມແຂວງ, ກາແດງແຂວງ ແລະ ເມືອງເຂົ້າຮ່ວມ. ການໃຫ້ຄວາມຊ່ວຍເຫລືອເງິນສົດໃນຄັ້ງ, ກໍ່ເພື່ອເຮັດໃຫ້ຊີວິດການເປັນຢູ່ເຂົາເຈົ້າດີຂຶ້ນ, ມີເງິນໃຊ້ຈ່າຍຕາມຄວາມຈຳເປັນໃນຊິວິດປະຈຳວັນ.

ທີ່ມາ: ປະເທດລາວ
  • ແທັກທີ່ກ່ຽວຂ້ອງ