• ກອງປະຊຸມເປີດກວ້າງເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ

ໂດຍ: ແມວດຳ 18 ມັງກອນ 2019 (11.51 ນ.) Read : 138

ໃນວັນທີ 17 ມັງກອນນີ້, ຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ (ຄຊກມດ) ໄດ້ຈັດກອງປະຊຸມຄົບຄະນະຂອງຕົນຂຶ້ນ ທີ່ໂຮງແຮມລາວພລາຊາ, ໂດຍການເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ພ້ອມດ້ວຍລັດຖະມົນຕີ, ຮອງລັດຖະມົນຕີທີ່ເປັນຮອງປະທານຄະນະກຳມາທິການ ຄກມດ, ມີບັນດາທ່ານຕ່າງໜ້າກະຊວງ, ອົງການ, ບັນດາແຂວງ ແລະນະຄອນຫລວງວຽງຈັນເຂົ້າຮ່ວມຢ່າງຫລວງຫລາຍ.

ໃນກອງປະຊຸມໄດ້ສະຫລຸບຕີລາຄາຄືນການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ ແລະວຽກງານແມ່-ເດັກ ປະຈຳປີ 2018, ປຶກສາຫາລືກ່ຽວກັບທິດທາງແຜນການເຄື່ອນໄຫວສຳລັບປີ 2019. ໃນໂອກາດດັ່ງກ່າວ ທ່ານ ສອນໄຊ ສີພັນດອນ ໄດ້ເນັ້ນວ່າ: ໃຫ້ເອົາໃຈໃສ່ປັບປຸງກົງຈັກການຈັດຕັ້ງຂອງ ຄກມດ ຂັ້ນກະຊວງ, ອົງການ, ແຂວງ ແລະນະຄອນຫລວງ ລວມທັງຫ້ອງການກອງເລຂາ ຄຊກມດ ແລະເສນາທິການຊ່ວຍວຽກແຕ່ລະຂັ້ນ ໂດຍສະເພາະແມ່ນວຽກປະສານງານທັງພາຍໃນ ແລະພາຍນອກໃຫ້ເປັນລະບົບກົມກຽວກວ່າເກົ່າ ແລະເອົາໃຈໃສ່ຈັດຕັ້ງຜັນຂະຫຍາຍບົດປະກອບຄຳເຫັນມ້ວນທ້າຍຂອງຄະນະກຳມະການຊີດໍສາກົນ ຕໍ່ບົດລາຍງານແຫ່ງຊາດປະຈຳໄລຍະທີ 8 ແລະ 9 ໃນການຈັດຕັ້ງປະຕິບັດສົນທິສັນຍາຊີດໍ ໃນ ສປປ ລາວ ແລະຂໍ້ສະເໜີແນະຂອງອົງການ ສປຊ ຕໍ່ບົດລາຍງານແຫ່ງຊາດປະຈຳໄລຍະທີ 3-6 ກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກໃຫ້ມີຜົນສຳເລັດ; ສ້າງກົດໝາຍວ່າດ້ວຍຄວາມສະເໝີພາບຍິງ-ຊາຍໃຫ້ສຳເລັດ ເພື່ອສາມາດນຳເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ໃນທ້າຍປີ 2019. ສືບຕໍ່ໂຄສະນາເຜີຍແຜ່ ແລະປູກຈິດສຳນຶກກ່ຽວກັບການສົ່ງເສີມຄວາມກ້າວໜ້າໃຫ້ແມ່ຍິງ, ຄວາມສະເໝີພາບຍິງ-ຊາຍ, ການປົກປ້ອງສິດ ແລະຜົນປະໂຫຍດຂອງແມ່ ແລະເດັກ ກໍຄືການລຶບລ້າງທຸກຮູບການຈຳແນກ ແລະການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະເດັກໃຫ້ກວ້າງຂວາງ ແລະທົ່ວເຖິງ ເພື່ອເຮັດໃຫ້ສັງຄົມຮັບຮູ້ ແລະເຂົ້າໃຈເຖິງບັນຫາດັ່ງກ່າວຢ່າງຈະແຈ້ງ.

ພ້ອມນີ້, ທ່ານຍັງໄດ້ເນັ້ນໜັກໃຫ້ ຄກມດ ແຂວງ ຈັດສັນງົບປະມານທີ່ເໝາະສົມເພີ່ມໃຫ້ສະຫະພັນແມ່ຍິງ ເພື່ອຮັບໃຊ້ວຽກງານສົ່ງເສີມຄວາມກ້າວໜ້າຂອງແມ່ຍິງ ແລະວຽກງານແມ່-ເດັກມີປະສິດທິຜົນສູງຂຶ້ນ.



ທີ່ມາ: ໜັງສືພິມລາວພັດທະນາ
  • ແທັກທີ່ກ່ຽວຂ້ອງ