• ມອບອຸປະກອນເພື່ອສ້ອມແປງທາງໃຫ້ປະຊົນ ແຂວງຄໍາມ່ວນ

ໂດຍ: ແມວດຳ 18 ມັງກອນ 2019 (09.19 ນ.) Read : 388

ເພື່ອເປັນການພັດທະນາ ໃຫ້ພໍ່ແມ່ປະຊາຊົນໃຫ້ຫຼຸດພົ້ນ ອອກຈາກຄວາມທຸກຍາກ ຈາກໄພນໍ້າຖ້ວມໃນປີ 2018 ຂອງຊາວເມືອງໜອງບົກ, ໃນວັນທີ 16 ມັງກອນ 2019 ທີ່ຜ່ານມາ ທາງໂຄງການສົ່ງເສີມການເຂົ້າເຖິງແຫຼ່ງທຶນຂອງຜູ້ທຸກຍາກໃຫ້ຫຼາຍຂື້ນ (UNDP) ໄດ້ເດີນທາງໄປພົບປະ ແລະມອບອຸປະກອນເພື່ອໃຊ້ເຂົ້າໃນການຊ້ອມແປງເສັ້ນທາງທີ່ເປ່ເພຈາກໄພນ້ຳຖ້ວມໃນປີທີ່ຜ່ານມາໃຫ້ກັບພໍ່ແມ່ປະຊາຊົນ ບ້ານຫາດຊຽງດີ ແລະບ້ານນາມັນປາ ເມືອງໜອງບົກ ແຂວງຄໍາມ່ວນ ໂດຍການນໍາພາຂອງ ທ່ານ ໄພວັນ ໄຊປັນຍາ ຫົວໜ້າຫ້ອງການແຮງງານ ແລະສະຫວັດດີການ-ສັງຄົມເມືອງ ຜູ້ຊີ້ນຳກຸ່ມຫາດຊຽງດີ, ທ່ານ ບຸນມີ ຈິດຕະວົງ ຫົວໜ້າຫ້ອງການຍຸຕິທຳເມືອງ ຜູ້ຊີ້ນຳກຸ່ມນາມັນປາ ພ້ອມດ້ວຍພະນັກງານສະຫະປະຊາຊາດ, ໜ່ວຍງານທີ່ກ່ຽວຂ້ອງ ແລະຫ້ອງການອ້ອມຂ້າງເມືອງ, ພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ.

ອຸປະກອນທີ່ລົງມອບໃຫ້ຊຸມຊົນຊາວ ບ້ານຫາດຊຽງດີ ແລະບ້ານນາມັນປາ ເພື່ອໃຊ້ເຂົ້າໃນການສ້ອມແປງເສັ້ນທາງທີ່ເປ່ເພໃນໄລຍະໄພນໍ້າຖ້ວມບ້ານລະ 03 ຢ່າງຄື: ລໍ້ຂົນດິນ 10 ລໍ້, ສຽມຈົກຂຸດດິນ 10 ດວງ, ຊວ້ານຕັກດິນ 10 ດວງ ລວມເປັນຈຳນວນ 60 ຊຸດ, ສຳລັບໄລຍະທາງໃນການສ້ອມແປງທາງແຕ່ ບ້ານຫາດຊຽງດີ ຫາ ບ້ານດົງສະຫງຳ ເມືອງໜອງບົກ ມີໄລຍະຄວາມຍາວ 1000 ແມັດ, ບ້ານນາມັນປາ ໄລຍະທາງ 4000 ແມັດ. ໃນການອອກແຮງງານສ້ອມແປງທາງດັ່ງກ່າວ ແມ່ນໃຊ້ເວລາຢູ່ 05 ວັນ, ບ້ານຫາດຊຽງດີ ກຳນົດເອົາວັນລະ 144 ຄົນ, ບ້ານ ນາມັນປາ ກຳນົດເອົາວັນລະ 156 ຄົນ ແລະຈະໃຊ້ແຮງງານຄົນເທົ່ານັ້ນເພື່ອເປັນການສາມັກຄີໃຫ້ແກ່ພໍ່ແມ່ປະຊາຊົນ.

ສຳລັບໂຄງການສົ່ງເສີມການເຂົ້າເຖິງແຫຼ່ງທຶນຂອງຜູ້ທຸກຍາກໃຫ້ຫຼາຍຂື້ນ (UNDPແມ່ນແຜນການຮ່ວມມືລະຫວ່າງກອງທຶນສະຫະປະຊາຊາດ ທີ່ມີຈຸດປະສົງເພື່ອເຮັດໃຫ້ຄົວເຮືອນທີ່ມີລາຍຮັບຕໍ່າ ແລະຜູ້ປະກອບການຂະໜາດນ້ອຍແບບຍືນຍົງ ແລະຫົວໜ່ວຍທຸລະກິດ ເຂົ້າເຖິງການບໍລິການ ທາງດ້ານການເງິນເພີ່ມຂຶ້ນ.


ທີ່ມາ: ນ ສົມສະໄຫວ ເພັດວິຫານ
  • ແທັກທີ່ກ່ຽວຂ້ອງ