• ລາວໂທລະຄົມ ແລະບີລາຍ ສາມາດໃຊ້ຮ່ວມກັນໄດ້

ໂດຍ: Admin Mahason 17 ມັງກອນ 2019 (10.59 ນ.) Read : 1,446

     ໃນຕອນບ່າຍຂອງວັນທີ 16 ມັງກອນ 2019 ຢູ່ທີ່ສຳນັກງານໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ມີພິທີລົງນາມເຊັນສັນຍາຊື້-ຂາຍຮຸ້ນ ລະຫວ່າງ ລັດຖະບານລາວ ຕາງໜ້າໂດຍກະຊວງການເງິນ ແລະບໍລິສັດ ລາວ ໂທລະຄົມມະນາຄົມ ມະຫາຊົນ ຂຶ້ນ ໂດຍການເປັນປະທານຮ່ວມຂອງ ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງໄປສະນີ-ໂທລະຄົມມະນາຄົມ ແລະການສື່ສານ ປະທານສະພາບໍລິຫານ ລາວ ໂທລະຄົມ, ທ່ານ ສີລາ ວຽງແກ້ວ ຮອງລັດຖະມົນຕີ ກະຊວງການເງິນ ຫົວໜ້າຄະນະກຳມະການຂາຍຮຸ້ນ ບໍລິສັດ ວິມເປວຄອມລາວ ຈຳກັດ. ມີບັນດາທ່ານຫົວໜ້າກົມ, ຮອງຫົວໜ້າກົມ, ຫົວໜ້າສູນອິນເຕີເນັດແຫ່ງຊາດ, ຄະນະກຳມະການຂາຍຮຸ້ນ ບໍລິສັດ ວິມເປວຄອມລາວ ຈຳກັດ ພ້ອມດ້ວຍຄະນະບໍລິຫານທັງສອງຝ່າຍເຂົ້າຮ່ວມ.

     ການລົງນາມເຊັນສັນຍາຊື້-ຂາຍຮຸ້ນໃນຄັ້ງນີ້ ຝ່າຍລັດຖະບານລາວ ແມ່ນ ທ່ານ ສີລາ ວຽງແກ້ວ ຮອງລັດຖະມົນຕີ ກະຊວງການເງິນ ຫົວໜ້າຄະນະກຳມະການຂາຍຮຸ້ນ ບໍລິສັດ ວິມເປວຄອມລາວ ຈຳກັດ ແລະ ທ່ານ ຖາວອນ ສົມສະກຸນ ຜູ້ອຳນວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໂດຍຊ້ອງໜ້າການນຳ, ຄະນະຜູ້ບໍລິຫານທັງສອງຝ່າຍ.

     ບໍລິສັດ ລາວ ໂທລະຄົມມະນາຄົມ ມະຫາຊົນ ເປັນຜູ້ນຳໃນການໃຫ້ບໍລິການດ້ານການສື່ສານໂທລະຄົມມະນາຄົມ ຄົບວົງຈອນຜູ້ທຳອິດໃນ ສປປ ລາວ ນັບຕັ້ງແຕ່ ປີ 1996 ເປັນຕົ້ນມາ ແລະຍ້ອນຄະນະຜູ້ບໍລິຫານມີຄວາມຕັດສິນໃຈສູງ ໃນການພັດທະນາ ແລະຂະຫຍາຍການບໍລິການໃຫ້ກວ້າງຂວາງເພື່ອຕອບສະໜອງເຕັກໂນໂລຊີດ້ານໂທລະຄົມມະນາຄົມ ແລະການສື່ສານທີ່ທັນສະໄໝ, ການໃຫ້ບໍລິການທີ່ດີເລີດ ແລະມີຄຸນນະພາບໃນສັງຄົມລາວເທື່ອລະກ້າວ ຈຶ່ງເຮັດໃຫ້ ບໍລິສັດ ລາວໂທລະຄົມມະນາຄົມ ມະຫາຊົນ ເປັນຜູ້ຊະນະການປະມູນຊື້ຮຸ້ນ ບໍລິສັດ ວິມເປວຄອມລາວ ຈຳກັດ ໃນວົງເງິນທັງໝົດ 42,000,000 USD (ສີ່ສິບສອງລ້ານໂດລາສະຫະລັດ) ໃນວັນທີ 19 ພະຈິກ 2018. ພາຍຫຼັງການເຊັນສັນຍາຊື້-ຂາຍສຳເລັດຈະເຮັດໃຫ້ຜູ້ຊົມໃຊ້ເບີ Beeline ຫຼືເບີຫຼັກ 7 ສາມາດນຳໃຊ້ໄດ້ທົ່ວປະເທດຮ່ວມກັບເຄືອຂ່າຍຫຼັກເບີຫຼັກ 5 (ເປັນອັນໜຶ່ງອັນດຽວກັນ) ນັບແຕ່ເດືອນ ມັງກອນ 2019 ເປັນຕົ້ນໄປ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ