• ແຕ່ງໜ້າໂທນສຸພາບ ງົດງາມ ຫຼູຫຼາ ຖືກກາລະເທສະ

ໂດຍ: ແມວດຳ 14 ພະຈິກ 2017 (11.43 ນ.) Read : 544

ການແຕ່ງໜ້າ ນອກຈາກຈະເນລະມິດໃຫ້ແມ່ຍິງສວຍງາມຂຶ້ນແລ້ວ ຍັງສາມາດເປັນໂຕບົ່ງບອກບຸກຄະລິກ ຄວາມເປັນຕົວຂອງຕົວເອງໄດ້ເປັນຢ່າງດີ ເຊັ່ນ ການແຕ່ງໜ້າໃນລຸກສາວອ່ອນຫວານອ່ອນໄວ, ລຸກເຊັກຊີ້, ລຸກເລິກລັບ.... ແຕ່ສິ່ງທີ່ສາວໆຄວນຄໍານຶງທຸກຄັ້ງທີ່ແຕ່ງໜ້ານັ້ນກໍຄືກາລະເທສະ ຖືເປັນການສ້າງພາບລັກທີ່ດີງາມໃຫ້ແກ່ຕົນເອງອີກປະການໜຶ່ງ. 

ລັກສະນະການແຕ່ງໜ້າທີ່ແມ່ຍິງຄວນຈະຮຽນຮູ້ໄວ້ເປັນອັນພື້ນຖານນັ້ນກໍຄືການແຕ່ງໜ້າໃນໂທນສຸພາບ ທີ່ຂາດບໍ່ໄດ້ໃນຊີວິດປະຈຳວັນ ເຊັ່ນ: ການໄປສະໝັກວຽກ, ງານທາງລັດຖະການ, ໄປໂຮງຮຽນ, ໄປເຮືອນດີ ຫຼືແມ້ກະທັ້ງໄປຫາຜູ້ອາວຸໂສຕ່າງໆ. ການແຕ່ງໜ້າໂທນສຸພາບມີເທັກນິກງ່າຍດາຍດັ່ງນີ້:

1.ບາງເບົາບໍ່ແມ່ນໂບກ ລົງຮອງພື້ນເທື່ອລະໜ້ອຍ ແລະທາຢ່າງບາງເບົາໃຫ້ຜິວໜ້າມີສະໝ່ຳສະເໝີ ສໍາລັບຄົນທີມີຮອຍຕຳໜິ ເຊັ່ນ ຝ້າ, ກະ, ຮອຍດຳ, ຮອຍແດງ, ສິວ...ບໍ່ຕ້ອງໃຊ້ຮອງ ພື້ນທັບແລ້ວທັບອີກ ແຕ່ຄວາມປົກປິດດ້ວນຄອນຊິລເລີ້ຈະເໝາະສົມກວ່າ. ຫຼັງຈາກທໍາການປົກປິດແລ້ວກໍລົງທ້າຍດ້ວຍແປ້ງຝຸ່ນໂປ່ງແສງເພືອໃຫ້ຮອງພື້ນຢູ່ຕົວ ແລະກົມກືນໄປກັບຜິວຫຼາຍຂຶ້ນ ທີ່ສໍາຄັນຍັງສາມາດຄວບຄຸມຄວາມມັນໄດ້ອີກ.

2.ສີກົມກືນກັນ ເລືອກໃຊ້ຮອງພື້ນເຂົ້າກັບສີຜິວ ປັບລະດັບໂທນສີລະຫວ່າງໜ້າກັບຄໍໃຫ້ກົມກືນເປັນສີດຽວກັນ (ຢ່າເຮັດເຮັດໜ້າຂາວວອກແຕ່ຄໍແຫຼ້ເດັດຂາດ) ສ່ວນສີສັນຕ່າງໆທີ່ທາລົງໄປກໍຕ້ອງໃຫ້ຄຸມໂທນ ເຊັ່ນ ທາເປືອກຕາສີນ້ຳຕານ, ປັດແກ້ມສີບົວອົມສົ້ມ ຫຼີກລ້ຽງການຕ້ອງໜ້າໃຊ້ສີຈັດໆສີປາກສີຕາຕັດກັນຄືນາງແບບໃນງານແຟຊັ້ນແຟນຊີ.

3.ແຕ່ງຕາເລັກນ້ອຍ ແຕ້ມຄິ້ວເບົາໆ ຍິ່ງງານກາງເວັນກໍຕົບແຕ່ງດວງຕາຍິ່ງຕ້ອງເບົາມື, ຂີດອາຍໄລເນີ້ເສັ້ນນ້ອຍໆບາງໆ, ປັດມາສຄາລາພໍປະມານຢ່າໃຫ້ໜາເປັນຂາແມງວັນ ຫາກເປັນງານຕອນແລງສາມາດຕິດຂົນຕາປອມໄດ້ ໂດຍເລືອກແບບເປັນທຳມະຊາດ. ສຳລັບຄິ້ວນັ້ນ ເນັ້ນການແຖໃຫ້ເຂົ້າຮູບແຕ້ມແບບເບົາມື ຢ່າໃຫ້ໜາດຳ ໂດຍສະເພາະບໍລິເວນຫົວຄິ້ວ ເພາະການແຕ້ມຄິ້ວຫົວຕັດ ແລະໃຫຍ່ຄືເອົາຖ່ານມາຂີດຈະເຮັດໃຫ້ໜ້າແຂງກະດ້າງເກີນໄປ.

ສະຫຼຸບລວມແລ້ວການແຕ່ງໜ້າສຸພາບແມ່ນເນັ້ນງານລະອຽດຂອງຜິວ ພະຍາຍາມຫຼິ້ນສີສັນໃຫ້ໜ້ອຍທີ່ສຸດ ສຳລັບໂທນສີທີ່ເໝາະສຳລັບການແຕ່ງໜ້າສຸພາບໄດ້ແກ່ ອາຍຊາໂດສີນ້ຳຕານ, ບັຊອອນສີສົ້ມອົມບົວ, ບົວອົມນ້ຳຕານ ຫຼືບົວນົມ; ລິບສະຕິກສີສົ້ມອົມນ້ຳຕານ, ສີນູ໊ດອົມນ້ຳຕານ... ຫຼີກລ້ຽງໃຊ້ສີແຈດໆທັງຫຼາຍທັງປວງ, ກິດເຕີ່ແວວວາວເກີນໄປ ຫຼືຄອນແທັກເລນສີແປກໆ. ສໍາລັບການແຕ່ງໜ້າແບບສຸພາບນີ້ສາມາດແຕ່ງໄດ້ທຸກໆມື້ ຫຼືເປັນevery look ນຳອີກ.



ທີ່ມາ: