• ກອງທັບຊ້ອມສວນສະໜາມກຽມສະເຫຼີມສະຫຼອງ ຄົບຮອບ 70 ປີ

ໂດຍ: Admin Mahason 15 ມັງກອນ 2019 (10.24 ນ.) Read : 332

     ຕອນເຊົ້າຂອງ ວັນທີ 14 ມັງກອນ 2018 ທີ່ຄ້າຍວິທະຍາຄານກົມມະດຳ ( ນໍ້າຊວງ ) ໄດ້ເປີດພິທີຊ້ອມໃຫຍ່ສະແດງບັນດາລາຍການ ແລະ ກ້ອນກຳລັງຕ່າງໆ ໂດຍການເຂົ້າຮ່ວມຂອງ ທ່ານ ພັນຄຳ ວິພາວັນ ຮອງປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດ ພ້ອມດ້ວຍການນຳ, ອະດີດການນຳ, ບັນດາມວນຊົນ ແລະ ກ້ອນກຳລັງເຂົ້າຮ່ວມ
      ການສະແດງຝຶກຊ້ອມຄັ້ງນີ້ ນອກຈາກເປັນການກຽມພ້ອມໃຫ້ແກ່ການສະແດງ ໃນວັນທີ 20 ມັງກອນແລ້ວຍັງເປັນການສະແດງໃຫ້ບັນດາໃຫ້ມວນຊົນ ແລະ ບັນດາອ້າຍນ້ອງທະຫານອ້ອມຂ້າງນະຄອນຫຼວງ ເຂົ້າຮ່ວມຮັບຊົມ ເຊິ່ງລາຍການສະແດງໃນຄັ້ງນີ້ແມ່ນເປັນການເຄື່ອນຍ້າຍກ້ອນກຳລັງທີ່ມີທັງໝົດຄື: ກ້ອນທຸງໄຊກອງທັບປະຊາຊົນລາວ, ກ້ອນທະຫານກອງທັບລາວອິດສະຫຼະ, ກ້ອນກອງທັບປົດປ່ອຍປະຊາຊົນລາວ, ກ້ອນກອງຮ້ອຍກຳລັງໄຟເພດຍິງ, ກ້ອນກອງທັບປົດປ່ອຍປະຊາຊົນລາວ, ກ້ອນກອງຮ້ອຍກຳລັງໄຟເພດຍິງ 369, ກ້ອນກຳລັງນາຍທະຫານບົກ, ກ້ອນນາຍທະຫານອາກາດ, ກ້ອນກຳລັງທະຫານຊາຍແດນ, ກ້ອນທະຫານຮາບ, ກ້ອນກຳລັງທະຫານຕີພິເສດ, ກ້ອນເຫຼົ່າຮົບລົດຕັງ - ຍານເກາະ, ກ້ອນເຫຼົ່າຮົບປືນໃຫຍ່ໜ້າດິນ, ກ້ອນເຫຼົ່າຮົບປ້ອງກັນອາກາດ, ກ້ອນເຫຼົ່າຮົບຊ່າງແສງ, ກ້ອນເຫຼົ່າຮົບສື່ສານ, ກ້ອນເຫຼົ່າຮົບເສນາຮັກ, ກ້ອນກຳລັງທະຫານທ້ອງຖິ່ນ, ກ້ອນກອງຫຼອນ, ກ້ອນກຳລັງປ້ອງກັນຕົວ, ສະຫະພັນນັກຮົບເກົ່າແຫ່ງຊາດ, ລາຍການໂດດຈ້ອງ ແລະ ລາຍການອື່ນໆອີກ.
      ທ່ານ ປ້າ ຫົງທອງ ສິດທິເດດ ອາຍຸ 64 ປີ ພະນັກງານບຳນານ ກ່າວວ່າ: ຂ້າພະເຈົ້າມາແຕ່ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ຮູ້ວ່າຢູ່ຄ້າຍນີ້ເພິ່ນຈະມີການສະເຫຼີມສະຫຼອງວັນສ້າງຕັ້ງກອງທັບ ຄົບຮອບ 70 ປີ ກໍຢາກມາເບິ່ງມາຊົມ ເຊິ່ງໃນເມື່ອກ່ອນຂ້າພະເຈົ້າແມ່ນເປັນທະຫານປະຈຳຢູ່ກົມເສນາ ແລະ ໄດ້ຜັກຜ່ອນຮັບບຳນານແຕ່ປີ 2011, ການເຂົ້າມາຮ່ວມຊົມພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ທີ່ຄ້າຍວິທະຍາຄານກົມມະດຳ ແຫ່ງນີ້ແມ່ນເຄີຍເຂົ້າຮ່ວມມາແລ້ວ 2 ຄັ້ງ ແລະ ຄັ້ງນີ້ກໍເປັນຄັ້ງທີ 3 ເຊິ່ງມາເບິ່ງແຕ່ລະຄັ້ງກໍເຫັນວ່າມີຄວາມແຕກຕ່າງກັນ ເພາະປີນີ້ຄວາມໂດດເດັ່ນແມ່ນມີການສະແດງໂດດຈ້ອງຫຼາຍກວ່າປີຜ່ານໆມາ, ໃນໂອກາດເຂົ້າມາຊົມການສະແດງຄັ້ັ້ງນີ້ແມ່ນມີຄວາມຮູ້ສຶກດີໃຈຫຼາຍທີ່ໄດ້ເຫັນການຂະຫຍາຍຕົວ ແລະ ພັດທະນາຂອງວຽງງານການສະແດງ, ວຽກງານປ້ອງກັນຊາດ - ປ້ອງກັນ ຄວາມສະຫງົບ ມີການພັດທະນາຂຶ້ນເລື້ອຍໆ.
      ທ່ານ ພັນຕີ ນາງ ວຽງສະໝອນ ແສງເພັດພູວົງ ປະຈຳຢູ່ກອງພັນ 214 ໃຫ້ສຳພາດວ່າ: ຮູ້ສຶກເປັນກຽດ ແລະ ພາກພູມໃຈຫຼາຍທີ່ເຫັນບັນດາກ້ອນກຳລັງກອງທັບ ມີການເຕີບໃຫຍ່ຂະຫຍາຍຕົວຢ່າງວ່ອງໄວ ແລະ ການສະແດງພາຍໃນງານຄັ້ງວັນທີ 14 ນີ້ ກໍມີ ຄວາມແຕກຕ່າງກັບຄັ້ງກ່ອນ ເພາະຄັ້ງທີ່ສະເຫຼີມສະຫຼອງ ຄົບຮອບ 65 ປີ ວັນສ້າງຕັ້ງກອງທັບປະຊາຊົນລາວ ຂ້າພະເຈົ້າກໍໄດ້ມາຮ່ວມ ແຕ່ຄັ້ງນັ້ນແມ່ນເພິ່ນຈະເນັ້ນສະແດງການຊ້ອມຮົບ, ແຕ່ສະເພາະຄັ້ງນີ້ ຄົບຮອບ 70 ແມ່ນສ່ວນຫຼາຍຈະສະແດງການເຄື່ອນກ້ອນກຳລັງແຕ່ລະເຫຼົ່າຮົບ ແລະ ກ້ອນກຳລັງກໍໃຫຍ່ກວ່າຄັ້ງຜ່ານມາ ເຊິ່ງໃນໂອກາດກຽມສະເຫຼີມຫຼອງວັນດັ່ງກ່າວນີ້ ພວກເຮົາກໍໄດ້ມີການສ້າງຂະບວນການຕ່າງໆຂຶ້ນເພື່ອປະກອບສ່ວນໃນການສະເຫຼີມສະຫຼອງ ບໍ່ວ່າຈະເປັນການແຂ່ງຂັນກີລາປະເພດຕ່າງໆ ລວມທັງຈັດວາງກຳລັງອ້າຍນ້ອງຍາມປ້ອງກັນ ແລະ ພ້ອມກັນຈັດຕັ້ງຢ່າງເປັນຂະບວນຟົດຟື້ນ.
      ພໍ່ຕູ້ ຄຳພັນ ສຸລິວົງ ປະຊາຊົນບ້ານໜອງປຸ່ງ ເມືອງໂພນໂຮງ ແຂວງວຽງຈັນ ກ່າວວ່າ: ເຮືອນຂ້າພະເຈົ້າຢູ່ໃກ້ກັບຄ້າຍນີ້ແຕ່ກໍບໍ່ເຄີຍມາເບິ່ງຈັກເທື່ອ ແລະ ຄັ້ງນີ້ກໍເປັນຄັ້ງທຳອິດທີ່ໄດ້ເຂົ້າມາເບິ່ງການສະແດງກະກຽມໃສ່ການສະເຫຼີມສະຫຼອງ ຄົບຮອບ 70 ປີ ວັນສ້າງຕັ້ງກອງທັບປະຊາຊົນລາວ ເຊິ່ງເຫັນວ່າເປັນການສະແດງທີ່ຍິ່ງໃຫຍ່ ແລະ ບໍ່ເຄີຍເຫັນຢູ່ໃສມາກ່ອນຕະຫຼອດອາຍຸເກືອບ 70 ປີ ຂອງຂ້າພະເຈົ້າ, ມາເຫັນແບບນີ້ກໍຮູ້ສຶກດີໃຈ ແລະ ພູມໃຈໃນຄວາມສາມາດຂອງບັນດານັກສະແດງ ຫຼື ກ້ອນກຳລັງອ້າຍນ້ອງທະຫານ ເຊິ່ງມັນສະແດງເຖິງຄວາມພ້ອມພຽງເປັນຈິດໜຶ່ງໃຈດຽວຂອງທະຫານໃນແຕ່ລະກ້ອນກຳລັງ ທີ່ສະແດງ ຫຼື ເຄື່ອນຍ້າຍທີ່ເຫັນວ່າມີຄວາມພ້ອມພຽງກັນຫຼາຍ.

ທີ່ມາ: ຂ່າວເດັ່ນ ຂ່າວດັງ
  • ຮູບພາບ

  • ແທັກທີ່ກ່ຽວຂ້ອງ