• ແຂວງ ບໍ່ແກ້ວ ຢຶດສັດປ່າ ແລະເຄື່ອງປ່າຂອງດົງ ໄດ້ເກືອບ 2 ໂຕນ

ໂດຍ: ສີເປື້ອນມື 10 ມັງກອນ 2019 (11.24 ນ.) Read : 306

ເມື່ອບໍ່ດົນມານີ້, ກົມກວດກາປ່າໄມ້ ສົມທົບກັບກອງກວດກາປ່າໄມ້ ແຂວງ ບໍ່ແກ້ວ ທີມງານຈາກອົງການກອງທຶນອະນຸຮັກທຳມະຊາດໂລກ ປະຈຳ ສປປ ລາວ ໄດ້ປຶກສາຫາລືກັນ ເພື່ອລົງກວດກາການລັກລອບຊື້-ຂາຍ ເຄື່ອນຍ້າຍຜະລິດຕະພັນສັດປ່າ ແລະເຄື່ອງປ່າຂອງດົງ ຢູ່ເຂດດ່ານຖິ່ນ ເມືອງ ຫ້ວຍຊາຍ, ຕົ້ນເຜິ້ງ ແລະເຂດເສດຖະກິດພິເສດສາມຫລ່ຽມຄຳ ແຂວງ ບໍ່ແກ້ວ ໃນ 5 ຮ້ານເປົ້າໝາຍ, ເຊິ່ງສາມາຢຶດສັດປ່າ, ຊີ້ນສ່ວນສັດປ່າ ທັງໝົດເກືອບ 87 ກິໂລກຣາມ ແລະເຄື່ອງປ່າຂອງດົງ 1.850 ກິໂລກຣາມ. ຄາດວ່າກໍາລັງຂົນສົ່ງອອກໄປຍັງປະເທດເພື່ອນບ້ານ ຈາກຜູ້ປະກອບການໃນທ້ອງຖິ່ນ, ສ່ວນຜູ້ກະທໍາຜິດແມ່ນໄດ້ເຮັດບົດບັນທຶກ ແລະຖືກດໍາເນີນຄະດີຕາມລະບຽບກົດໝາຍ.

      ຂອງກາງດັ່ງກ່າວ, ລວມມີ ໜັງຊ້າງ, ເຂົາກວາງ, ຟານ, ນໍແຮດ, ແຂ້ວສັດປ່າ, ເຫລົ້າດອງກະດູກ, ດອງໂຕລິ່ນ, ກະທິງ, ເໝັ້ນ, ເສືອ, ລິ່ນຍັງມີຊີວິດ 1 ໂຕ, ເຄື່ອງປ່າຂອງດົງ ມີ ສະຄານ, ຫວາຍຂົມ, ຫວາຍນົກຂໍ້, ຫວາຍຝາດ ແລະຫົວຕາວ. ການລົງຈັດຕັ້ງປະຕິບັດງານຄັ້ງນີ້, ເພື່ອສຸມໃສ່ຄໍາສັ່ງຂອງທ່ານນາຍົກລັດຖະມົນຕີ ເລກທີ 05/ນຍ ລົງວັນທີ 8 ພຶດສະພາ 2018 ວ່າດ້ວຍການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະກວດກາສັດປ່າ ແລະພືດປ່າ ປະເພດຫວງຫ້າມທົ່ວປະເທດໃຫ້ເກີດຜົນ ເພື່ອການອະນຸຮັກທໍາມະຊາດ, ສັດປ່າ ແລະຢຸດການຄ້າຊື້-ຂາຍສັດປ່າ, ພືດປ່າທີ່ຜິດກົດໝາຍ ໂດຍສະເພາະທີ່ໃກ້ຈະສູນພັນໃນ ສປປ ລາວ.

      ເພື່ອແກ້ໄຂບັນຫາບັນຫາດັ່ງກ່າວ, ກົມກວດກາປ່າໄມ້ໄດ້ມີມາດຕະການ ຄືເພີ່ມທະວີຄວາມເຂັ້ມງວດ ໃນການກວດກາລາດຕະເວນຢູ່ຕາມເຂດຫລໍ່ແຫລມ, ຕ້ອງດຳເນີນຄະດີຕໍ່ຜູ້ກຳທຳຜິດ ຕາມລະບຽບກົດໝາຍຢ່າງເຂັ້ມງວດ, ສຳລັບຂອງກາງທີ່ຢຶດໄດ້ທັງໝົດສັດປ່າທີ່ຕາຍແລ້ວ ໃຫ້ຈັດພິທີທຳລາຍ, ສ່ວນສັດທີ່ຍັງມີຊີວິດ ໃຫ້ນຳເຂົ້າສູນບຳບັດເພື່ອຟື້ນຟູສຸຂະພາບ ແລ້ວປ່ອຍຄືນສູ່ທຳມະຊາດ. ພ້ອມກັນນີ້, ປະເພດເຫລົ້າດອງຊິ້ນສ່ວນສັດປ່າ ແລະຜະລິດຕະພັນສັດປ່າ ແມ່ນໃຫ້ກອງກວດກາປ່າໄມ້ ປົກປັກຮັກສາໄວ້ ເພື່ອນຳໄປສຶກສາຄົ້ນຄວ້າ ແລະສຳລັບຜະລິດຕະພັນຊິ້ນສ່ວນສັດປ່າ ທີ່ຢຶດໄດ້ນັ້ນໃຫ້ເຈົ້າໜ້າທີ່ປ່າໄມ້ ກົມກວດກາປ່າໄມ້ ສົມທົບກັບພາກສ່ວນທີ່ກ່ຽວຂ້ອງ ແລະຜູ້ຊ່ຽວຊານ ນຳໄປພິສູດວ່າຊິ້ນສ່ວນດັ່ງກ່າວເປັນຂອງແທ້ ຫຼືຂອງປອມ ເພື່ອປະກອບເຂົ້າໃນການດຳເນີນຄະດີ.

ຂໍ້ມູນ: ປະເທດລາວ


ທີ່ມາ: https://update.kaomai.co/20779/?fbclid=IwAR0DZtjBM_UjdrEu8FemK8fK0fYsnn5g7m_YBeZpwObNB8rXy_jipvXyjIQ
  • ຮູບພາບ

  • ແທັກທີ່ກ່ຽວຂ້ອງ